ឈប់ម៉ូតូតាមផ្លូវនិយាយទូរស័ព្ទត្រូវជនមិនស្គាល់មុខគប់ដុំឥដ្ឋរបួសធ្ងន់

ចែករំលែក៖

ភ្នំពេញ ៖ យុវជន២នាក់ខណះកំពុងឈរនិយាយទូរស័ព្ទត្រូវជនមិនស្គាល់មុខគប់មួយដុំឥដ្ឋបណ្តាលឱ្យបែកក្បាលហូរឈាមស្រោចខ្លួន។

ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលម៉ោង៩និង៥០នាទីយប់ថ្ងៃទី១៩ ខែមិថុនា ឆ្នាំ២០១៩ នៅមុខស្ថានីយប្រេងឥន្ធនៈមួយកន្លែង តាមបណ្ដោយមហាវិថីឈ្នះឈ្នះ ហៅផ្លូវទំនប់កប់ស្រូវ កែងផ្លូវជាតិលេខ៤ ភូមិជម្ពូវ័ន សង្កាត់ចោមចៅទី៣ ខណ្ឌពោធិ៍សែនជ័យ ។

ជនរងគ្រោះម្នាក់ខាងលើឈ្មោះ ផៃ សុផា ភេទប្រុស អាយុ២១ឆ្នាំ ជាជាងជួសជុលរថយន្ត ស្នាក់នៅក្នុងការ៉ាស់រថយន្ត តាមបណ្តោយផ្លូវជាតិលេខ៣ ភូមិព្រៃព្រីងខាងត្បូង សង្កាត់ចោមចៅទី៣ ខណ្ឌពោធិ៍សែនជ័យ មានស្រុកកំណើតនៅស្រុកព្រៃឈរ ខេត្តកំពង់ចាម ។ រីឯមិត្តភក្តិម្នាក់របស់ជនរងគ្រោះ មិនស្គាល់ឈ្មោះឡើយ ។ចំណែកក្រុមជនសង្ស័យមិនស្គាល់អត្តសញ្ញាណ បានគេចខ្លួនបាត់ស្រមោល ។

តាមប្រភពព័ត៌មានពីជនរងគ្រោះបាននិយាយប្រាប់ថា នៅមុនពេលកើតហេតុ គាត់និងមិត្តភក្ដិម្នាក់ទៀតបានជិះម៉ូតូមួយគ្រឿងម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ កំពង់ចាម 1Q-8808. ឌុបគ្នាដើរលេង លុះមកដល់ចំណុចកើតហេតុ គាត់អោយមិត្តភក្តិបន្ថយល្បឿនម៉ូតូដើម្បីឈប់និយាយទូរស័ព្ទ ស្រាប់តែឃើញក្រុមជនបង្កខាងលើមានគ្នា៣នាក់ជិះម៉ូតូមួយគ្រឿង ម៉ាកហុងដាឌ្រីម មិនចាំស៊េរី និងស្លាកលេខ បន្ទាប់មកមានជនបង្កម្នាក់ដែលជិះកណ្តាលបានយកដុំឥដ្ឋមកគប់គាត់ពេញទំហឹង បណ្តាលឲ្យចំក្បាលបែកឈាមហូរស្រោចជោកខ្លួនតែម្តង ។ ភ្លាមនោះ គាត់បានស្រែកឱ្យប្រជាពលរដ្ឋជួយដេញតាមដែរ តែក្រុមជនបង្កខាងលើ បានបន្ថែមល្បឿនម៉ូតូជិះរត់គេចខ្លួនបាត់ស្រមោល។

តាមប្រភពដដែលបានបន្តទៀតថា ខណៈពេលនោះ កំលាំងនគរបាលប៉ុស្តិ៍ចោមចៅម្នាក់បានមកដល់កន្លែងកើតហេតុភ្លាមៗផងដែរ ហើយបានអោយជនរងគ្រោះទៅព្យាបាលនៅមន្ទីរពេទ្យ និងអោយជនរងគ្រោះទៅដាក់ពាក្យបណ្ដឹង ដើម្បីឱ្យសមត្ថកិច្ចស៊ើបអង្កេតរកមុខសញ្ញាក្រុមជនបង្កខាងលើយកមកចាត់ការតាមនីតិវិធី ៕សុខាសែនជ័យ