ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានមានប្រសាសន៍ប្រកាសជូនដំណឹងដល់ប្រជាពលរដ្ឋទូទាំងប្រទេសឲ្យបានដឹងថា ចាប់ពីថ្ងៃនេះតទៅប្រជាពលរដ្ឋទាំងអស់ដែលធ្វើដំណើរតាមផ្លូវវេងស្រេង ឈប់មានការបង់ថ្លៃទៀតហើយ ។ អ្វីដែលខ្ញុំសុំត្រឡប់មកវិញនោះ ត្រូវគោរពច្បាប់ចរាចរណ៍ទាំងអស់គ្នា កុំឲ្យមានគ្រោះថ្នាក់ ។ ចាប់ពីថ្ងៃទី១ ខែមករា ឆ្នាំ២០១៦ នឹងអនុវត្តច្បាប់ចរាចរណ៍ថ្មីយ៉ាងតឹងរ៉ឹង ។ ភាពតឹងរ៉ឹងនេះមិនមែនគៀបសង្កត់ប្រជាពលរដ្ឋទេ តឹងរ៉ឹងដើម្បីការពារសុវត្ថិភាពប្រជាពលរដ្ឋ ។
សម្តេចតេជោ នាយករដ្ឋមន្ត្រីមានប្រសាសន៍បែបនេះនាព្រឹកថ្ងៃទី២៨ ខែធ្នូ ឆ្នាំ២០១៥ នៅមជ្ឈមណ្ឌលសន្និបាត និងពិព័រណ៍កោះពេជ្រ ក្នុងឱកាសអញ្ជើញជាអធិបតីដ៏ខ្ពង់ខ្ពស់ក្នុងពិធីប្រគល់សញ្ញាបត្រជូននិស្សិតជ័យលាភីថ្នាក់បរិញ្ញាបត្រ និងបរិញ្ញាបត្រជាន់ខ្ពស់ នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ដែលបានបញ្ចប់ការសិក្សារបស់ខ្លួនប្រកបដោយជោគជ័យ ។
សម្តេចតេជោមានប្រសាសន៍សង្ឃឹមថា ប្រជាពលរដ្ឋរបស់យើងនឹងទទួលបាននូវផលប្រយោជន៍ ហើយរោងចក្រដែលនៅតាមផ្លូវវេងស្រេងត្រូវសន្សំប្រាក់នេះដើម្បីបង្កើនឲ្យកម្មករ កម្មការិនី បើមិនបានដំឡើងបៀវត្សរ៍ទេ គឺទុកសន្សំប្រាក់នេះជប់លៀងដល់បងប្អូនកម្មករ កម្មការិនីនៅថ្ងៃទី១ ខែឧសភា រៀងរាល់ឆ្នាំ ។
ទាក់ទឹននឹងផ្លូវវេងស្រេងនេះ សម្តេចតេជោមានប្រសាសន៍ថា មានចំណុចមួយដែលលោកប៉ា សុជាតិវង្សត្រូវដោះស្រាយ។ ចំពោះអ្នកមួយចំនួនដែលបានធ្វើលិខិតមួយសម្រាប់ឆ្លងផ្លូវនោះហើយ ឥឡូវត្រូវយកលុយទៅសងប្រជាពលរដ្ឋវិញ ហើយយកលិខិតនោះត្រឡប់មកវិញ, ប្រជាពលរដ្ឋរស់នៅតាមផ្លូវវេងស្រេងទាំងប៉ុន្មាន តាមស្មានប្រហែលមានរថយន្ត៣០០គ្រឿងហ្នឹងទៅយកលុយដែរ, ណ្ហើយ! ឲ្យផុតកម្មពៀរទៅ យកលុយទៅសងគាត់វិញ បើសិនជាយកលុយក្រុមហ៊ុនមិនទាន់ទេ, មកយកលុយខ្ញុំ ខ្ញុំនឹងខ្ចីលុយលីហួរយកទៅសងសិន ។ដោយឡែក ទាក់ទិននឹងផ្លូវជាតិលេខ៤ បញ្ហានៅត្រង់ប្រជាពលរដ្ឋដែលរស់នៅម្តុំជម្ពូវ័ន ឬនៅជិតៗនោះ គាត់ចង់ទៅមើលចម្ការរបស់គាត់នៅខាងអង់ស្នួល ឬសំរោងទង ។ នៅពេលទៅ គាត់ត្រូវបង់លុយ, ពេលត្រឡប់មកវិញត្រូវបង់លុយមួយលើកទៀត ។ ដល់ពេលយូរទៅ ការទៅចម្ការមើលស្រែ លែងមានពេលទៅមើល ព្រោះទៅបង់លុយ មកវិញបង់លុយ ។ អ្នកដែលនៅជិតៗកន្លែងបង់លុយ ទៅជាលែងចង់ទៅ មកហើយ ព្រោះទៅបង់លុយ មកបង់លុយ ។ ដូច្នេះក្នុងករណីនេះ សម្តេចតេជោស្នើឲ្យធ្វើស្ថិតិចំពោះអ្នកដែលរស់នៅជិតៗក្នុងការចេញ ចូលឆ្លង អត់ត្រូវយកលុយទេ ។
ប៉ុន្តែក្នុងករណីការធ្វើដំណើរផ្លូវវែងពីភ្នំពេញទៅក្រុងព្រះសីហនុ, ភ្នំពេញ-កោះកុង… គឺត្រូវបង់លុយហើយ ។ សម្តេចបានបញ្ជាឲ្យត្រូវរៀបចំកិច្ចការនេះដើម្បីពិនិត្យមើលចំពោះគោលនយោបាយដែលប្រជាពលរដ្ឋរស់នៅតាមដងផ្លូវនៅជិតៗបញ្ជរបង់ប្រាក់នោះ ។សម្តេចតេជោ នាយករដ្ឋមន្ត្រីមានប្រសាសន៍ថា សម្តេចបានទទួលព័ត៌មានពីប្រជាពលរដ្ឋតាមរយៈប្រព័ន្ធទំនាក់ទំនងបណ្តាញសង្គម ដែលប្រជាពលរដ្ឋបានផ្ញើទៅជូនសម្តេច ។ សម្តេចមានប្រសាសន៍ថា« ខ្ញុំមិនមែនជានាយករដ្ឋមន្ត្រីហ្វេសប៊ុកទេ ក៏ប៉ុន្តែខ្ញុំចង់ទទួលព័ត៌មានពីគ្រប់មជ្ឈដ្ឋាន គ្រប់ប្រភពទាំងអស់» ។
សម្តេចតេជោមានប្រសាសន៍ថា ផ្លូវជាតិលេខ៤ត្រូវមានដំណោះស្រាយសមស្របសម្រាប់ប្រជាពលរដ្ឋដែលរស់នៅទាំងសងខាងបញ្ជរបង់ប្រាក់ ៕
ដោយ៖ ហេង សូរិយា
