ភ្នំពេញ៖ នៅមិនទាន់ស្ងប់ស្ងាត់នៅឡើយទេក្រោយផ្ទុះការរិះគន់មួយពេញបណ្តាញសង្គមថៃ ពាក់ព័ន្ធការចោទថាភាពយន្តភាគរឿង “ពិសស្នេហ៍” របស់ស្ថានីយទូរទស្សន៍ប៉ុស្តិ៍លេខ៥នៅកម្ពុជា បានលួចចម្លងរឿងពីរឿងល្បីរបស់របស់ថៃ “Pidsawat” ។ នៅតែមានការរិះគន់ខ្លាំងៗនៅឡើយចំពោះផលិតករស្របពេលដែល មានព័ត៌មានចុះផ្សាយថា អ្នកដឹកនាំក្នុងរឿងថៃមួយនេះកំពុងរៀបចំឯកសារប្ដឹងផ្ដល់ហើយ។
គេចាំបានថាកាលពីថ្ងៃទី៣ ខែតុលា ឆ្នាំ២០១៩នេះ អ្នកលេងបណ្ដាញសង្គមថៃបានបង្ហោះរូបភាពប្រៀបធៀបរវាងរឿងថៃ និងរឿងខ្មែរទាំងពីរ គឺរឿងភាគទូរទស្សន៍ “ពិសស្នេហ៍” ដែលសម្តែងដោយកញ្ញា ព្រះកាយច័ន្ទ, ទឹម រដ្ឋា និងលោក សូ ឆានី ថាមានឈុតឆាកដូចគ្នាបេះបិទទៅនឹងរឿងភាគថៃ “Pidsawat” ដែលសម្តែងដោយ Nune Woranut និង Pong Nawat។ ការបង្ហោះនេះបានបង្កឲ្យមានការរិះគន់យ៉ាងខ្លាំងពីសំណាក់ប្រជាជនថៃមកលើផលិតករនៅកម្ពុជា។ ក្រុមអ្នកលេងបណ្ដាញសង្គមថៃបានចោទប្រកាន់ធ្ងន់ៗថាសាច់រឿងខាងលើនេះត្រូវបានលួចចម្លងពីរឿងថៃសុទ្ធសាធ និងសង្ស័យថាមិនបានទិញកម្មសិទ្ធិបញ្ញាយកមកផលិតឡើងវិញនោះឡើយ។ តាមការចុះផ្សាយចុងក្រោយពីសារព័ត៌មាន Kapook នៅពេលនេះ លោក Peeramon Chomdhavat ដែលជាអ្នកដឹកនាំមួយរូបក្នុងរឿងភាគថៃ “Pidsawat” កំពុងតែរៀបចំឯកសារប្ដឹងតវ៉ាហើយចំពោះករណីនេះ ប៉ុន្តែថាតើនឹងមានដំណោះស្រាយបែបណាទៀតនោះ គឺមានតែរង់ចាំតាមដានបន្ត ។ ជនជាតិថៃជាច្រើនបានចូលមកសរសេរសារតិះដៀលថា ខ្មែរមិនចេះបង្កើតថ្មី ចេះតែយករបស់គេមកផលិតដោយគ្មានការអនុញ្ញាតិពីម្ចាស់ដើមថែមទៀត។ បន្ទាប់ពីប៉ុន្មានថ្ងៃ ក្រោយផ្ទុះការរិះគន់ពីខាងថៃ ពលរដ្ឋកម្ពុជាមួយចំនួនក៏បានរិះគន់បន្ត ចំពោះទម្លាប់មិនល្អខាងលើដែលនាំឲ្យបរទេសហ៊ានមកដៀលខ្មែរទាំងមូល។
ស្របគ្នានេះដែរនៅកម្ពុជានៅមិនទាន់មានការបញ្ជាក់ណាមួយពីផលិតករ ឬស្ថាប័នពាក់ព័ន្ធ នៅឡើយ។ ទោះជាយ៉ាងនាតាមការបញ្ជាក់របស់ក្រុមការងារផលិតរឿងភាគបានលើកឡើងថាទូរទស្សន៍ប៉ុស្តិ៍លេខ ៥ មានមូលដ្ឋាននៅក្នុងប្រទេសកម្ពុជា ប៉ុន្តែថ្នាក់ដឹកនាំស្ថានីយប៉ុស្តិ៍លេខ៥ គឺជាជនជាតិថៃ។ ឯអ្នកដឹកនាំរឿងភាគនៃទូរទស្សន៍នេះទៀតសោត ក៏ជាជនជាតិថៃដែរ ដែលកន្លងមកបានយករឿងថៃមកផលិតឡើងវិញ ដោយឲ្យតារាខ្មែរសម្ដែងមួយចំនួនរួចមកហើយ ដោយអះអាងថា បានទិញសិទ្ធិផលិតពីស្រុកថៃមកថតឡើងវិញជាច្រើនឆ្នាំមកហើយពោលគឺរាប់សិបរឿង ប៉ុន្តែគេឆ្ងល់ថាហេតុអ្វីទើបលេចចេញការរិះគន់ខ្លាំងៗបែបនេះ។
ក៏មានការលេចចេញការរិះគន់ខ្លាំងពីសំណាក់ផលិតករក្នុងស្រុកថាមិនគួរបណ្តោយឲ្យលេចចេញការរិះគន់មើលងាយបែបនេះ។ ផលិតករមានដូចជាលោក ហ៊ុយ យ៉ាឡេង ស្នើឲ្យមានវិធានការណាមួយបញ្ចៀសការមើលងាយនិងវាយតម្លៃមិនល្អមកលើផលិតករកម្ពុជា។
លោក ប៉ុក បូរក្ស លើហ្វេសប៊ុករបស់លោក បានអះអាងថា ការថតភាពយន្តភាគទូរទស្សន៍ គឺពុំដែលសុំការអនុញ្ញាតថតពីក្រសួងវប្បធម៌ និងវិចិត្រសិល្ប: នោះទេ ហើយបើទោះបីច្បាប់បានតម្រូវថា រាល់ការផ្សព្វផ្សាយភាពយន្តត្រូវមានទិដ្ឋាការពីក្រសួងវប្បធម៌ និងវិចិត្រសិល្ប: ក៏ក្រសួងព័ត៌មាន ដែលជាអ្នកគ្រប់គ្រងស្ថានីយទូរទស្សន៍ មិនខ្វល់អនុវត្តតាមដែរ។ ស្របគ្នានេះដែរលោក ខៀវ កាញ៉ារីទ រដ្ឋមន្ត្រីក្រសួងព័ត៌មានបានឆ្លើយតបនៅលើហ្វេសប៊ុករបស់ឯកឧត្តមថា ក្រសួងព័ត៌មានមើលការខុសត្រូវតែលើប្រភេទភាពយន្តឯកសារទេ។ ដោយឡែកកុនរឿង(feature) គឺជាសមត្ថកិច្ចរបស់ក្រសួងវប្បធម៌។
ទោះជាយ៉ាងណា លោក ស៊ិន ច័ន្ទសាយ៉ា ទីប្រឹក្សាក្រសួងវប្បធម៌ និងវិចិត្រសិល្បៈ បានលើកឡើងថា អ្វីៗនឹងអាចប្រសើរឡើង ប្រសិនបើក្រសួងទាំងពីរ អាចអង្គុយទល់មុខគ្នា ហើយលើកយកបញ្ហាភាពយន្ត មកជជែកដោះស្រាយ។ ប៉ុន្តែទិដ្ឋភាពបែបនេះ មិនដែលកើតមានទេ រាប់ទសវត្សរ៍មកហើយ។យ៉ាងណា ឯកឧត្តម មិនបានបង្ហើបឲ្យដឹងទេថា មូលហេតុអ្វីដែលរាំងស្ទះដល់ជំនួបការងាររវាងសាមីក្រសួងទាំងពីរលើករណីការគ្រប់គ្រងភាពយន្តនោះ។ ក្រោយពីមិនទាន់ដឹងថា ស្ថាប័នមួយណា រវាងក្រសួងវប្បធម៌ និងក្រសួង៕
ដោយ៖ វឌ្ឍនា
