ខេត្តព្រៃវែង៖ ស្នូរសម្លេងគ្រាប់កាំភ្លើងបានផ្ទុះឡើងលាន់លឺពេញភូមិ ខណ:កម្លាំងនគរបាលនិងក្រុមចោរប្លន់បានបាញ់តដៃគ្នា បន្ទាប់ពីប្លន់យកលុយផ្ទះអ្នកចាប់ហួយនិងដាក់វីង ស្ថិតនៅឃុំស៊ាងឃ្វាង ស្រុកកំចាយមារ ខេត្តព្រៃវែង កាលពីម៉ោងជាង៧យប់ ថ្ងៃទី១០ ខែមករា ២០១៦ ។
ស្នងការនគរបាល ខេត្តព្រៃវែង លោក ឧត្តមសេនីយ៍ ស្រេង ជា បានប្រាប់ប្រភពព័ត៌មានថា ក្រុមចោរប្លន់អាចមិនទាន់ទៅណាឆ្ងាយទេ ហើយពេលនេះកម្លាំងលោក កំពុងឡោមព័ទ្ធនិងពួនស្ទាក់ ដើម្បីប្រមាញ់ក្រុមជនសង្ស័យ ។
លោកស្នងការបញ្ជាក់ថា “ ក្រុមចោរអាចមានគ្នាពី៣-៥នាក់ ដោយមានបក្សពួកចូលទៅភ្ជង់និងប្លន់ក្នុងផ្ទះមានគ្នា៣នាក់ ប្រដាប់ដោយអាវុធខ្លី១ដើម ពេលនោះក្រុមចោរបានវាយលើជនរងគ្រោះរងរបួសក្បាលបុរសជាប្តីឈ្មោះ សាយ យោគ អាយុ៤៤ឆ្នាំ ប្រពន្ធឈ្មោះ សូ សុផានី អាយុ៤១ឆ្នាំ រស់នៅចំណុចកើតហេតុ ភូមិបាយ៉ាប ឃុំសៀងឃ្វាង ស្រុកកំចាយមារ ដោយមានបក្សពួកចាំខាងក្រៅប្រហែលជា២នាក់ “ ៕
ដោយ៖ ហេង សូរិយា
