ជនកម្ពុជា មិនថាអ្នករស់នៅខេត្តស្វាយរៀង, ខេត្តបណ្តាភាគឦសាន, បាត់ដំបង, បន្ទាយមានជ័យ…ដែលកម្រនឹងធ្វើដំណើរឆ្លងកាត់ផ្លូវជាតិលេខ៤នោះទេ ដែលអបអរសាទរ ពេលដែលទទួលដំណឹងថា ប្រមុខរាជរដ្ឋាភិបាលកម្ពុជា សម្រេចដកហូតសិទ្ធិកាន់កាប់យកប្រាក់ពីក្រុមហ៊ុន AZ លើផ្លូវជាតិលេខ៤វិញនោះ គឺប្រជាពលរដ្ឋទូទាំងប្រទេសបានសម្តែងនូវក្តីរំភើបចំពោះការវះកាត់ដ៏ត្រឹមត្រូវមកនេះ ។ ផ្លូវជាតិលេខ៤ ជាសរសៃឈាមដ៏សំខាន់ ភ្ជាប់រាជធានីភ្នំពេញទៅខេត្តព្រះសីហនុ និងផ្នែកនិរតីនៃប្រទេសមានប្រជាពលរដ្ឋជាលក្ខណៈគ្រួសារ និងសេវាដឹកជញ្ជូនផ្សេងៗច្រើនសន្ធឹកសន្ធាប់ឆ្លងកាត់ផ្លូវនេះ ។
ប្រជាពលរដ្ឋកម្ពុជាសប្បាយរីករាយ គាំទ្រចំពោះចំណាត់ការរបស់ប្រមុខរាជរដ្ឋាភិបាលកម្ពុជានៅវេលានេះ ។ ក្រឡេកទៅមើលបណ្តាញទំនាក់ទំនងសង្គមហ្វេសប៊ុករបស់សម្តេចតេជោ មានប្រជាពលរដ្ឋកម្ពុជាភាគច្រើនលើសលុប បានបង្ហាញការគាំទ្រចំពោះចំណាត់ការនេះ ។ ជាចំណាត់ការដែលប្រជាពលរដ្ឋកម្ពុជារង់ចាំជាយូរ ព្រោះថា ផ្លូវជាតិលេខ៤ជាអំណោយរបស់រដ្ឋាភិបាលអាមេរិក មិនគួរបើត្រូវអនុញ្ញាតឲ្យក្រុមហ៊ុន AZ របស់ឧកញ៉ា អ៊ឹង ប៊ុនហូវ ដាក់បារ៉ាស់ទារប្រាក់ពីប្រជាពលរដ្ឋខែ្មរ ដែលឆ្លងកាត់ផ្លូវនេះក្រោមលេស «ថែទាំ» នោះទេ ។ ឥឡូវនេះ ប្រជាពលរដ្ឋកម្ពុជា ក៏ដូចជាជនបរទេសប្រើប្រាស់ផ្លូវជាតិលេខ៤ដោយមិនបង់ប្រាក់នោះឡើយ ។ អ្វីដែលសំខាន់ គឺបណ្តាជនដែលធ្វើដំណើរឆ្លងកាត់ផ្លូវនេះ ត្រូវគោរពច្បាប់ចរាចរណ៍ដើម្បីចៀសវាងគ្រោះថ្នាក់ ។
ផ្លូវជាតិលេខ៤ភ្ជាប់ពីរាជធានីទៅកាន់ខេត្តព្រះសីហនុចម្ងាយប្រមាណ២២៤គីឡូម៉ែត្រ ដែលជាកេរ្តិ៍ដំណែលស្ថាបនាដោយរដ្ឋាភិបាលអាមេរិក ។ ផ្លូវនេះ ត្រូវបានអនុញ្ញាតឲ្យឧកញ៉ា អ៊ឹង ប៊ុនហូវ តំណាងក្រុមហ៊ុន AZ ធ្វើសេវាកម្មយកលុយរយៈពេល៣៥ឆ្នាំ គិតចាប់តាំងពីឆ្នាំ២០០២ ដោយក្រុមហ៊ុនទទួលបានការលើកទឹកចិត្តរួចពន្ធសព្វសារពើ ។ មានន័យថា បើយោងតាមកិច្ចព្រមព្រៀងសម្បទាន ចុះថ្ងៃទី២៨ ខែមីនា ឆ្នាំ២០០១ រវាងរាជរដ្ឋាភិបាលកម្ពុជា នឹងក្រុមហ៊ុន AZ Investment Co., Ltd. របស់ឧកញ៉ា អ៊ឹង ប៊ុនហូវ លើការធ្វើសេវាកម្ម យកលុយពីអ្នកធ្វើដំណើរឆ្លងកាត់ផ្លូវជាតិលេខ៤នោះ គឺក្រុមហ៊ុនដែលមានសិទ្ធិធ្វើអាជីវកម្មយកលុយ រហូតដល់ឆ្នាំ២០៣៧ ពោលគឺនៅមានរយៈពេលធ្វើសេវាកម្ម២២ឆ្នាំទៀត ។
ប៉ុន្តែដោយមើលឃើញអំពីការលំបាករបស់ប្រជាពលរដ្ឋ ទើបរាជរដ្ឋាភិបាលកម្ពុជាសម្រេចលុបចោលកិច្ចព្រមព្រៀងសម្បទានរវាងរាជរដ្ឋាភិបាល នឹងក្រុមហ៊ុន AZ របស់ឧកញ៉ា អ៊ឹង ប៊ុនហូវ ចាប់ពីម៉ោង១២និង០០នាទីយប់ថ្ងៃទី១៣ ខែមករា ឆ្នាំ២០១៦តទៅ ។ បើតាមការអះអាងរបស់ប្រមុខរាជរដ្ឋាភិបាល ការស្នើសុំរបស់សម្តេចឲ្យលើកលែងការយកប្រាក់ពីប្រជាពលរដ្ឋ ដែលមានលំនៅឋានអមសងខាងផ្លូវជាតិលេខ៤ ចាប់ពីព្រឹកថ្ងៃទី៧ ខែមករា ទៅនោះ ខាងក្រុមហ៊ុន មិនអនុវត្តតាមឡើយ ។ ដូច្នេះ ដើម្បីដោះស្រាយ និងជាកង្វល់របស់ប្រជាពលរដ្ឋ នោះទើបប្រមុខរាជរដ្ឋាភិបាលសម្រេចលុបកិច្ចព្រមព្រៀងនេះចោលទាំងស្រុង ដើម្បីផ្តល់ឱកាសឲ្យប្រជាពលរដ្ឋ ពោលគឺអ្នកធ្វើដំណើរឆ្លងកាត់ផ្លូវជាតិលេខ៤ មិនចាំបាច់បង់ប្រាក់ទៀតទេ ។
វាមិនមែនជារឿងនយោបាយអ្វីឡើយ ។ ប្រមុខរាជរដ្ឋាភិបាលកម្ពុជាបានធ្លាប់មានប្រសាសន៍ជាញឹកញាប់មកហើយថា អ្វីៗគឺដើម្បីផលប្រយោជន៍ប្រជាពលរដ្ឋ ។ នៅពេលនេះ សម្តេចនាយករដ្ឋមន្ត្រីបានទទួលព័ត៌មានដោយផ្ទាល់ពីប្រជាពលរដ្ឋនៅគ្រប់ទិសទី ។ ដូច្នេះ គេមិនអាចលាក់បាំងព័ត៌មាន ឬលាក់បាំងការលំបាករបស់ប្រជាពលរដ្ឋ មិនឲ្យប្រមុខរាជរដ្ឋាភិបាលដឹងនោះទេ ។ ដោយសារតែការដឹងអំពីសុខទុក្ខ និងការលំបាករបស់ប្រជាពលរដ្ឋនោះហើយ ទើបកំណាត់ផ្លូវវេងស្រេងត្រូវបានរាជរដ្ឋាភិបាលទិញយកមកគ្រប់គ្រង ដោយមិនមានការបង់ប្រាក់ចំពោះរថយន្តគ្រប់ប្រភេទ ដែលឆ្លងកាត់កំណាត់ផ្លូវនេះ ។ ដូចគ្នានេះដែរ ផ្លូវជាតិលេខ៤ ដែលជាផ្លូវដ៏មានសារសំខាន់ និងមមាញឹកក្នុងការធ្វើដំណើរ ប្រមុខរាជរដ្ឋាភិបាលទទួលបានព័ត៌មានអំពីការលំបាករបស់ប្រជាពលរដ្ឋ ទើបសម្រេចលុបកិច្ចព្រមព្រៀងនោះចោលតែម្តង ។
សម្រាប់ប្រជាពលរដ្ឋកម្ពុជា ទាំងអ្នកនៅក្នុងស្រុក ក៏ដូចជាអ្នកនៅក្រៅស្រុក ដែលម្តងម្កាលធ្វើដំណើរឆ្លងកាត់ផ្លូវជាតិលេខ៤ គ្រប់គ្នាសុទ្ធតែស្រែក«ជយោ! សម្តេចតេជោ» ដែលបានរំដោះផ្លូវជាតិលេខ៤ពីការកាន់កាប់របស់ឈ្មួញ អ៊ឹង ប៊ុនហូវ យកមកគ្រប់គ្រងដោយរដ្ឋវិញ ។ និយាយឲ្យខ្លី ជាការផ្តល់ឱកាសឲ្យជនគ្រប់រូបធ្វើដំណើរឆ្លងកាត់ផ្លូវជាតិលេខ៤ ដោយមិនបង់ប្រាក់ ។ ផ្លូវជាតិលេខ៤ លែងជាចំណាប់ខ្មាំងរបស់ឈ្មួញអ៊ឹង ប៊ុនហូវ ទៀតហើយ ។ ប៉ុន្តែវាជាកម្មសិទ្ធិរបស់ប្រជាពលរដ្ឋ ដែលត្រូវប្រើប្រាស់ផ្លូវដោយប្រុងប្រយ័ត្ន ខ្លាចក្រែងមានគ្រោះថ្នាក់ដល់អាយុជីវិត ៕
ដោយ៖ ហេង សូរិយា
