ភ្នំពេញ៖ យុវជនមួយក្រុមមានគ្នា៣នាក់ អង្គុយផឹកស៊ីនៅខាងមុខផ្ទះស្រវឹងស្រាជោកជាំ បានយកកាំភ្លើងអាកាភ្ជង់ចេញពីក្នុងផ្ទះ និងស្រែកគំរាម គ្រាន់តែបុរសម្នាក់ជាមន្ត្រីអាវុធហត្ថស្លៀកពាក់ស៊ីវិលឈប់ម៉ូតូខាងមុខផ្ទះ បង្កឱ្យមានការភ្ញាក់ផ្អើលកាលពីវេលាម៉ោង០០និង២០នាទីរំលងអធ្រាត្រ ឈានចូលថ្ងៃទី១៤ ខែមករា ឆ្នាំ២០១៦ នៅចំណុចមុខផ្ទះលេខ37C តាមបណ្តោយផ្លូវ៣៨៤ ស្ថិតក្នុងសង្កាត់ទួលស្វាយព្រៃទី១ ខណ្ឌចំការមន រាជធានីភ្នំពេញ ។
បើតាមសម្តីពីបុរសដែលត្រូវបានគេយកកាំភ្លើងភ្ជង់នោះបានប្រាប់ឱ្យដឹងថា នៅមុនពេលកើត ហេតុ គេបានជិះម៉ូតូ ណៃហត ពាក់ស្លាកលេខ ខេមរភូមិន្ទ2 1-0510 ហើយពេលមកដល់ចំណុចមុខផ្ទះកើតហេតុ ក៏បានឈប់ម៉ូតូបំណងចុះបត់ជើងតូច ពេលនោះស្រាប់តែយុវជនម្នាក់ក្នុងចំណោមគ្នីគ្នា៣នាក់ ដែលអង្គុយផឹកស៊ីខាងក្នុងផ្ទះនោះ បានស្រែកជេររូបគាត់ និងបានយកកាំភ្លើងអាកាវែងភ្ជង់ពីក្នុងរបងផ្ទះ ដោយនិយាយថា ( ហ្អែងមកឈប់ទីនេះធ្វើអី ) ទាំងស្ថានភាពស្រវឹងស្រាជោកជាំ ។ តែបុរខាងលើមិនបានតបតអ្វីនោះទេ ហើយយុវជនម្នាក់នោះមិនអស់ចិត្តដោយយកកាំភ្លើងទុក និងចេញមកស្រែកសួរនាំ និងសំឡុតខ្លាំងបង្កឱ្យមានការភ្ញាក់ផ្អើលដល់អ្នកដែលលក់បន្លែជិតនោះ និងបានទំនាក់ទំនងទៅកម្លាំងកងរាជអាវុធហត្ថខណ្ឌឱ្យចុះមកអន្តរាគមន៍ភ្លាមៗផងដែរ ។
ភ្លាមនោះកម្លាំងកងរាជអាវុធហត្ថជាច្រើននាក់បានចុះមកអន្តរាគមន៍ដល់កន្លែងកើតហេតុ ដើម្បីធ្វើការសួរនាំ តែយុវជនខាងម្ចាស់ផ្ទះបានប្រកែកថា ខ្លួនមិនបានដកកាំភ្លើងភ្ជង់នោះទេ ហើយក៏ដើរចូលផ្ទះបិទរបងទ្វារផ្ទះបាត់ទៅ ហើយបុរសជាមន្ត្រីកងរាជអាវុធហត្ថដែលត្រូវគេភ្ជង់ គឺមិនមាននរណាម្នាក់ធ្វើសាក្សីឱ្យគាត់ និងម្យ៉ាងវិញទៀតមិនទាន់មានការបាញ់បោះនិងប៉ះពាល់ដល់ គាត់នោះ ក៏ជិះម៉ូតូចេញទៅដោយខ្ចីចង់ឲ្យមានរឿងវែងឆ្ងាយ ៕
ដោយ៖ ភារ៉ា ដង្កោ
