ក្រុមឧទ្ទាមបានបើកការវាយប្រហារដោយការបាញ់កាំភ្លើង និងបំផ្ទុះគ្រាប់បែកបណ្តាលឲ្យមនុស្សយ៉ាងតិច៦នាក់បាត់បង់ជីវិត ស្ថិតនៅកណ្តាលរដ្ឋធានីប្រទេសឥណ្ឌូនេស៊ីកាលពីថ្ងៃទី១៤ ខែមករា ឆ្នាំ២០១៦ ។ ប៉ូលិសឥណ្ឌូនេស៊ីបានបញ្ជាក់ថា ការវាយប្រហារនេះបានកើតឡើង ក្រោយមានការគំរាមកំហែងពីក្រុមសកម្មប្រយុទ្ធ រដ្ឋអិស្លាម(IS) ថា នឹងយកប្រទេសឥណ្ឌូនេស៊ីនេះធ្វើជាទីលានប្រយុទ្ធ ។
ប្រព័ន្ធផ្សព្វផ្សាយនៅក្នុងតំបន់បានរាយការណ៍ថា គ្រាប់បែក៦គ្រាប់បានផ្ទុះឡើង ហើយទីភ្នាក់ងារយកព័ត៌មានរ៉យទ័រ បានបញ្ជាក់ថា បានឃើញមនុស្ស៣នាក់បាត់បង់ជីវិត ស្របពេលដែលការផ្ទុះអាវុធនៅតែបន្តកើតឡើងមិនព្រមឈប់នោះ ។ ការប៉ះទង្គិចមួយកើតឡើងនៅហាងកាហ្វេ Starbucks ប៉ុន្តែនៅពេលបន្តិចក្រោយមក កងកម្លាំងសន្តិសុខ បានចូលគ្រប់គ្រងនៅក្នុងអគារទាំងនោះ ។ ប៉ូលិសបានថ្លែងថា ប៉ូលិសដាក់ការសង្ស័យថា ជនវាយប្រហារគ្រាប់បែកអត្តឃាតម្នាក់បានវាយប្រហារយ៉ាងតិចមួយលើក ហើយការវាយប្រហារម្តងនេះ គឺមានក្រុមឧទ្ទាមមានគ្នាប្រមាណ១៤នាក់។
អ្នកថតរូបទីភ្នាក់ងារព័ត៌មានរ៉យទ័រ បានបញ្ជាក់ថា កញ្ចក់ហាងកាហ្វេ Starbucks ត្រូវភ្លើងឆាបឆេះ ។ គេបានឃើញមនុស្ស៣នាក់បាត់បង់ជីវិតនៅលើដងផ្លូវ ។ មានការបាញ់តដៃគ្នារវាងក្រុមឧទ្ទាម និងក្រុមសន្តិសុខ ។ អ្នកខ្លះឈរពីលើដំបូលអគារផងដែរ ។ នៅក្នុងសប្តាហ៍ថ្មីៗចុងក្រោយនេះ ប្រទេសឥណ្ឌូនេស៊ីរងការគំរាមកំហែងពីក្រុមរដ្ឋអិស្លាម IS ដោយសារតែប្រទេសនេះបានធ្វើយុទ្ធនាការប្រឆាំងក្រុមភេរវកម្ម ។ ក្រុមប៉ូលិសបានចាត់វិធានការចំពោះជនទាំងឡាយណាដែលសង្ស័យមានការជាប់ពាក់ព័ន្ធជាមួយក្រុមរដ្ឋអិស្លាម IS ។
លោក Anton Charliyan អ្នកនាំពាក្យស្នងការប៉ូលិសឥណ្ឌូនេស៊ីបានបញ្ជាក់ថា កាលពីពេលថ្មីៗនេះ យើងបានទទួលសារគំរាមមួយពីក្រុមរដ្ឋអិស្លាមថា ប្រទេសឥណ្ឌូនេស៊ីនឹងក្លាយជាទីលានបង្ហូរឈាមមួយ ។ ប្រភពបន្តថា ការប៉ះទង្គិចខាងលើនេះ បណ្តាលឲ្យមនុស្ស៦នាក់បាត់បង់ជីវិត គឺប៉ូលិស៣នាក់ និងជនស៊ីវិល៣នាក់ផងដែរ ។
កងកម្លាំងសន្តិសុខរដ្ឋាភិបាលជាច្រើនរយនាក់ត្រូវបញ្ជូនមកកាន់ទីតាំងកើតហេតុខាងលើ ដើម្បីគ្រប់គ្រងសន្តិសុខ ។
អគាររបស់អង្គការសហប្រជាជាតិស្ថិតនៅជិតកន្លែងកើតហេតុត្រូវបានបិទជាស្ថាពរ មិនអនុញ្ញាតឲ្យមានការចេញ ឬចូលនោះឡើយ ។ មនុស្សច្រើននាក់នៅជិតកន្លែងកើតហេតុត្រូវជម្លៀសផងដែរ ។ នៅភាគខាងលិចតំបន់ជា៧យក្រុង Palmerah នោះផងដែរ ប្រព័ន្ធផ្សព្វផ្សាយក្នុងតំបន់បានរាយការណ៍មានករណីផ្ទុះគ្រាប់បែកផងដែរ ។ ប៉ូលិសអះអាងថា គេនៅមិនទាន់កំណត់ដឹងថា វាជាការវាយប្រហារភេរវកម្មនៅឡើយទេ ។
ឥណ្ឌូនេស៊ីជាប្រទេសដែលមានពលរដ្ឋកាន់សាសនាមូស្លីមច្រើនជាងគេបំផុតនៅក្នុងពិភពលោក ។ ពលរដ្ឋទាំងនោះបានមានជំនឿទៅលើសាសនាសុខៗគ្នាតាមបែបសម័យទំនើប ។
ប្រទេសនេះធ្លាប់ទទួលរងការវាយប្រហារភេរវកម្មដំបូងគេគឺក្នុងឆ្នាំ២០០០ គឺការវាយប្រហារទៅលើក្លឹបរាត្រីមួយកន្លងស្ថិតនៅលើដែនកោះបាលី បណ្តាលឲ្យស្លាប់មនុស្ស២០២នាក់ ភាគច្រើនជាភ្ញៀវទេសចរណ៍បរទេស ។
ជាច្រើនរួចមកហើយនាពេលកន្លងមក ប៉ូលិសបានបំផ្លាញ និងកម្ទេចក្រុមឧទ្ទាមបានយ៉ាងមានប្រសិទ្ធិភាព ប៉ុន្តែទោះបីយ៉ាងណា ប៉ូលិសអះអាងថា ពួកគេមានការព្រួយបារម្ភជាពន្ធពេកចំពោះពលរដ្ឋរបស់ខ្លួនមួយចំនួនដែលទើបត្រឡប់មកពីចូលរួមជាមួយក្រុមរដ្ឋអិស្លាមនោះ ។
កាលពីឆ្នាំ២០០៩ នៅក្នុងខែកក្កដា ក៏មានការវាយប្រហារនៅកណ្តាលទីក្រុង ហ្សាកាតា ផងដែរ គឺការបំផ្ទុះគ្រាប់បែកនៅសណ្ឋាគារ JW Marriott និងសណ្ឋាគារ Ritz Carlton បណ្តាលឲ្យស្លាប់ និងរបួសច្រើននាក់ ៕
