ខេត្តស្ទឹងត្រែង៖ សត្វត្មាតនិងពួកសត្វស្លាប ផ្សេងៗទៀតកំពុងរស់នៅតំនប់ព្រៃអភិរក្សក្នុងស្រុកសៀមប៉ាងខេត្តស្ទឹងត្រែងត្រូវបានអង្គការជីវិតសត្វស្លាបអន្តរជាតិប្រចាំនៅស្រុកនេះចំណាយថវិកាជាង១០០០ដុល្លារ ទិញចំណីអាហារបន្ថែមឱ្យស៊ីក្នុងមួយខែ៣ដងជាពិសេសនៅក្នុងរដូវដែលវាកំពុងពងកូននេះ។
ក្នុងសកម្មភាពផ្តល់ចំណីសត្វនៅថ្ងៃទី១៩និងទី២០ ឧសភា នេះលោកអ៊ាង សំណាង ប្រធានក្រុមអភិរក្សធនធានជីវចំរុះនៃអង្គការជីវិតសត្វស្លាប់អន្តរជាតិប្រចាំនៅស្រុកសៀមប៉ាងបានបញ្ជាក់ថា៖នៅក្រុមអភិរក្សបានផ្តល់អាហារបន្ថែមឱ្យសត្វត្មាតនិងសត្វស្លាប ផ្សេងៗទៀតក្នុងមួយខែ៣ដងជាប្រចាំដើម្បីយើងអភិរក្សពពួកសត្វដ៏កម្រ ទាំងនេះឱ្យនៅគង់វង់ នឹងរក្សាវាឱ្យនៅក្នុងព្រៃទឹកដីយើងកុំឱ្យវាទៅរស់នៅព្រៃប្រទេសឡាវព្រោះខ្លាចត្រូវគេសម្លាប់វា។
លោកបន្ថែមថា៖បច្ចុប្បន្ននៅពេលយើងដាក់ចំណីឱ្យម្តងៗសង្កេតឃើញមានសត្វត្មាតនិងសត្វស្លាបផ្សេងៗទៀតមកស៊ីចន្លោះចាប់ពី៩០ក្បាលទៅ១២០ក្បាលតែប៉ុណ្ណោះក្នុងនោះមាន៖ សត្វត្មាតត្នោត-ត្មាតផេះ-ត្មាតភ្លើង-ត្រយ៉ងយក្ស-ត្រយ៉ងចង្កំក៍ស-ត្រយ៉ងអង្កត់ខ្មៅ-ត្រដក់តូច-ត្រដក់ធំ-ត្រដក់ត្រីប្រផេះ-ឥន្ទ្រីខ្មៅ-និងសត្វក្អែកព្រៃ ដែលមានរស់នៅតំបន់ព្រៃអភិរក្សនេះ។
លោកផាន់យុទ្ធ អភិបាលស្រុកសៀមប៉ាងខេត្តស្ទឹងត្រែងបានបញ្ជាក់ថា៖ការអភិរក្ស
សត្វស្លាបនេះបងប្អូនប្រជាពលរដ្ឋយើងបានភ្ញាក់រលឹកចូលរួមច្រើនព្រោះ ពួកគាត់បានចាត់ទុកថាពពួកសត្វទាំងនេះវាអាចបំរើឱ្យវិស័យទេសចរណ៍ដោយសារភ្ញៀវទេសចរមកលេងចង់មើលសត្វត្មាតទាំងនេះ។
លោកបន្តថា៖ប្រជាពលរដ្ឋនៅឃុំព្រែកមាស និងឃុំថ្មកែវ ជិតតំបន់អភិរក្ស បានងាកមកធ្វើស្រូវត្រយ៉ងយក្សគ្រប់ៗគ្នាព្រោះនៅពេលបានផលក្រុមអភិរក្សសត្វត្មាតធ្វើការប្រមូលទិញក្នុងតំលៃខ្ពស់ដែលជាយន្តការមួយជំរុញឱ្យប្រជាពលរដ្ឋយើងបញ្ឈប់ការចូលព្រៃបរបាញ់សត្វ នឹងពឹងផ្អែកលើផលអនុផលព្រៃឈើ។
សូមរំលឹកថា៖នៅថ្ងៃទី១៩និងទី២០ ឧសភា នេះក្រុមអភិរក្សសត្វស្លាបនិងធ្វើបរិមាណចំនួនសត្វដែលរស់នៅតាមរយៈការផ្តល់អាហារក្នុងទូទាំងប្រទេសកម្ពុជា ជាពិសេសនៅតាមខេត្តដែលមានសត្វត្មាតរស់នៅដូចជាខេត្តក្រចេះ -មណ្ឌលគីរី -រតនគីរី-ព្រះវិហារ និងខេត្តស្ទឹងត្រែងដែលមានសត្វត្មាតរស់នៅច្រើនជាងគេ។

សូមបញ្ជាក់ថា៖ ការផ្តល់ចំណីក្នុងមួយខែ៣ដងជាប្រចាំនេះគឺអង្គការជីវិតសត្វស្លាបអន្តរជាតិបាន ទិញគោឬក្របីដែលត្រូវចំណាយថវិកាជាង១០០០ដុល្លារជារៀងរាល់ខែដើម្បីបង្គ្រប់បន្ថែមទៅលើអាហារព្រៃ ព្រោះនៅរដូវនេះជារដូវវាបន្តពូជនិងពងកូន៕

ប្រភព៖ រដ្ឋមន្ត្រីក្រសួងព័ត៌មាន