ខេត្ដព្រះសីហនុ៖ រាជរដ្ឋាភិបាល តាមរយៈគណៈកម្មាធិការគ្រប់គ្រង និង អភិវឌ្ឍន៍តំបន់ឆ្នេរកម្ពុជាលោកទេស រដ្ឋមន្ដ្រី អ៊ឹម ឈុនលឹម កាលពីថ្ងៃទី២០ ខែមករា ឆ្នាំ២០១៦ បានជម្រាបជូន អភិបាលនៃគណៈអភិបាលខេត្ដព្រះសីហនុ អំពីការដែលគណៈកម្មាធិការនេះមិន អនុញ្ញាតឱ្យក្រុមហ៊ុន Royal Group., Ltd គ្រប់គ្រងតំបន់ឆ្នេរនោះទេ ។
លិខិតរបស់គណៈកម្មាធិការគ្រប់ គ្រងនិងអភិវឌ្ឍតំបន់ឆ្នេរសមុទ្រកម្ពុជាចុះថ្ងៃទី២០ ខែមករា ឆ្នាំ២០១៦ បាន បញ្ជាទៅអភិបាលខេត្ដព្រះសីហនុឱ្យចុះ ទៅរុះរើសំណង់អនាធិបតេយ្យរបស់ក្រុមហ៊ុន Royal Group., Ltdនៅលើក្បាលដី ៤០ម៉ែត្រជម្រៅ១៥ម៉ែត្រនៅតាម បណ្ដោយឆ្នេរខ្សាច់អូរត្រេះដែលក្រុម ហ៊ុននេះថាសង់ផែបម្រើការអភិវឌ្ឍកោះរ៉ុងកាលពីឆ្នាំ២០១៤ ។
លិខិតដដែលបន្ដថា ទីតាំងដែលក្រុម ហ៊ុន Royal Group., Ltd. កំពុងអភិវឌ្ឍ នោះរាជរដ្ឋាភិបាលមានគោលការណ៍ រៀបចំឆ្នេរអូរត្រេះនោះជាឆ្នេរគំរូសម្រាប់ វិស័យទេសចរណ៍និងបរិស្ថានតំបន់ឆ្នេរ។
អភិបាលក្រុងព្រះសីហនុលោក អ៊ី សុខឡេង បានថ្លែងថា ករណីក្រុមហ៊ុន Royal Group., Ltd. ដែលសាងសង់ សំណង់មិនមានច្បាប់អនុញ្ញាតនេះអាជ្ញាធរខេត្ដបានហៅទៅអប់រំច្រើនលើកមក ហើយប៉ុន្ដែក្រុមហ៊ុននេះនៅតែបន្ដសាងសង់ដដែល ។
លោកអភិបាលក្រុងបន្ដថា ចំពោះ ទោសទណ្ឌថ្នាក់ជាតិជាអ្នកសម្រេចព្រោះលោកគ្មានសិទ្ធិក្នុងការសម្រេចទេ ដោយ ប្រគល់ឱ្យថ្នាក់ដឹកនាំជាអ្នកសម្រេចចុះ។
នគរវត្ដមិនអាចទាក់ទងអភិបាល ខេត្ដព្រះសីហនុដើម្បីសុំការបំភ្លឺបន្ថែម បានទេជុំវិញព័ត៌មាននេះ ប៉ុន្ដែជាគោល ការណ៍របស់រាជរដ្ឋាភិបាលក៏ដូចជាគណៈកម្មាធិការគ្រប់គ្រងនិងអភិវឌ្ឍន៍តំបន់ ឆ្នេរសមុទ្រកម្ពុជានោះគឺមិនអនុញ្ញាតឱ្យ ក្រុមហ៊ុនឯកជនគ្រប់គ្រងតំបន់ឆ្នេរនោះ ឡើយមិនថាតែខេត្ដព្រះសីហនុ, ខេត្ដ កំពត, ខេត្ដកែប ឬខេត្ដកោះកុងនោះទេ។ មិនតែប៉ុណ្ណោះសមុទ្រដែលហ៊ុមព័ទ្ធទុកមិនព្រមធ្វើការអភិវឌ្ឍក៏ត្រូវគណៈកម្មាធិការនេះរឹបអូសយកមកធ្វើជាសម្បត្ដិ រដ្ឋវិញដែរ ។
ប្រជាពលរដ្ឋនៅខេត្ដព្រះសីហនុក៏ ដូចជានៅទូទាំងប្រទេសអបអរសាទរ ចំពោះចំណាត់ការរបស់គណៈកម្មាធិការ គ្រប់គ្រង និងអភិវឌ្ឍន៍តំបន់ឆ្នេរដែល បានបដិសេធសេចក្ដីស្នើរបស់ក្រុមហ៊ុន Royal Group., Ltd មុនគេនោះ ។ គេ រំពឹងថា ឆ្នេរសមុទ្រដែលកំពុងគ្រប់គ្រង ដោយក្រុមហ៊ុនឯកជនផ្សេងទៀតក៏នឹង ត្រូវរដ្ឋគ្រប់គ្រងវិញដែរ ៕
ដោយ៖ ឆ្លាមសមុទ្រ
