បណ្តាញទូរទស្សន៍គ្រប់គ្រងដោយរដ្ឋចិនបានផ្សព្វផ្សាយថា អង្គភាពរបស់កងកម្លាំងយោធាប្រទេសចិនដែលឈរជើងនៅទល់មុខដែនកោះតៃវ៉ាន់នោះបានធ្វើសមយុទ្ធបាញ់គ្រាប់ពិត និងការវាយប្រយុទ្ធឡើងដែនគោក ។ ការធ្វើសមយុទ្ធរបស់កងកម្លាំងយោធាចិននៅពេលនេះ បានកើតឡើងក្រោយប៉ុន្មានថ្ងៃប៉ុណ្ណោះដែលគណបក្សប្រឆាំងតៃវ៉ាន់ ទទួលបានសម្លេងគាំទ្រយ៉ាងលើសលុបពីសំណាក់ប្រជាពលរដ្ឋនៅក្នុងការបោះឆ្នោតនោះ ។
នៅអំឡុងឆ្នាំ១៩៤៩ បន្ទាប់ពីសង្គ្រាមស៊ីវិលនៅប្រទេសចិន កងទ័ពរបស់ប្រទេសនេះបានចូលទៅកាន់ដែនកោះតៃវ៉ាន់ ។ ប្រទេសចិនបានចាត់ទុកថា ទឹកដីតៃវ៉ាន់ជាខេត្តមួយរបស់ខ្លួន ហើយថា នឹងប្រើប្រាស់កងកម្លាំងដើម្បីកាន់កាប់ដែនដីនេះ ប្រសិនបើមានករណីចាំបាច់ ។
កាលពីព្រលប់ថ្ងៃទី២០ ខែមករា ឆ្នាំ២០១៦ កន្លងមកនេះ បណ្តាញទូរទស្សន៍ប៉ុស្តិ៍យោធា គ្រប់គ្រងដោយរដ្ឋចិនបានផ្សព្វផ្សាយថា កម្លាំងទាហានកងពលលេខ៣១ ដែលមានមូលដ្ឋាននៅភាគអាគ្នេយ៍ទីក្រុង Xiamen នោះបានធ្វើសមយុទ្ធកាលពីប៉ុន្មានថ្ងៃកន្លងទៅថ្មីៗនេះ ។ ទោះបីយ៉ាងណា ប្រភពនេះមិនបានលាតត្រដាងពិតប្រាកដអំពីទីតាំងដែលធ្វើសមយុទ្ធនោះឡើយ ។
ការធ្វើសមយុទ្ធនេះមានការចូលរួមពីរថក្រោះបើកក្នុងទឹក និងវាយឡើងគោក ការបាញ់មីស៊ីលចេញពីឧទ្ធម្ភាគចក្រ ដោយគោលដៅនៅលើច្រាំងសមុទ្រ និងទាហានលោតឆត្រយោងពីឧទ្ធម្ភាគចក្រផងដែរ ។ ពុំមានការធ្វើអត្ថាធិប្បាយតាមកញ្ចក់ទូរទស្សន៍ពាក់ព័ន្ធការបោះឆ្នោតនៅតវ៉ាន់នោះឡើយ ។
ក្រសួងការពារជាតតៃវ៉ាន់បានបញ្ជាក់ថា ខ្លួនបានដឹងអំពីព័ត៌មានស្តីអំពីកងម្លាំងយោធាចិនធ្វើសមយុទ្ធនេះផងដែរ ។ ប៉ុន្តែប្រភពបានស្នើសុំមិនធ្វើអត្ថាធិប្បាយ ។
ទីក្រុង Siamen មានទីតាំងស្ថិតនៅទល់មុខគ្នាជាមួយកោះតៃវ៉ាន់ និងនៅភាគខាងស្តាំនៃឈូងសមុទ្រ Xiamen នោះជាដែនកោះ Kimnen ។ ដែនកោះនេះហើយដែលតៃវ៉ាន់បានចូលកាន់កាប់ចាប់តាំងពីឆ្នាំ១៩៤៩ ហើយរហូតមកដល់ចុងទសវត្សរ៍១៩៧០ ដែនកោះនេះ តែងទទួលរងការបាញ់ប្រហារជានិច្ចពីសំណាក់ប្រទេសចិន ។
ចាប់តាំងពីលោកស្រី Tsai Ing-wen មេដឹកនាំគណបក្សជឿនលឿនប្រជាធិបតេយ្យតៃវ៉ាន់បានទទួលជ័យជម្នះភ្លូកទឹកភ្លូកនៅក្នុងការបោះឆ្នោតសភា និងប្រធានាធិបតីនោះ ប្រទេសចិនបានព្រមានថា នឹងប្រឆាំងតបតរាល់សកម្មភាពណាមួយដែលប៉ុនប៉ងឆ្ពោះទៅរកការប្រកាសឯករាជ្យរបស់តៃវ៉ាន់នោះ ។
លោកស្រី Tsai Ing-wen បានថ្លែងថា នឹងបន្តរក្សាសន្តិភាពជាមួយប្រទេសចិន ហើយជាមួយគ្នានេះដែរប្រព័ន្ធផ្សព្វផ្សាយចិនក៏បានលើកឡើងអំពីការចង់បន្តទំនាក់ទំនងដូចសព្វថ្ងៃរបស់តៃវ៉ាន់ជាមួយចិន ដោយមិនមានការប្រែប្រួលនោះផងដែរ ។
កម្លាំងយោធាចិន ដែលជាមានចំនួនច្រើនជាងគេបំផុតនៅក្នុងពិភពលោកនោះ កាលពីខែកញ្ញា ឆ្នាំ២០១៥ បានធ្វើសមយុទ្ធដោយបាញ់គ្រាប់ពិតស្ថិតនៅច្រកសមុទ្ររបស់ប្រទេសតៃវ៉ាន់ ។ ទោះបីយ៉ាងណា ករណីនេះ ក្រសួងការពារជាតិជាតិតៃវ៉ាន់បានលើកឡើងថា សកម្មភាពរបស់ចិនទាំងនោះបានកើតឡើងស្ទើរក្លាយជាទម្លាប់ទៅហើយ ។
តៃវ៉ាន់ធ្លាប់បានព្រមានថា ប្រទេសចិនបាននិងកំពុងផលិតនាវាផ្ទុកយន្តហោះ២គ្រឿង ដើម្បីគោលដៅនៅក្នុងការធ្វើសឹកសង្គ្រាម ។ កាលពីពិធីឆ្លងឆ្នាំសាកលថ្មីៗនេះ ចិនបានទទួលស្គាល់ថា ខ្លួនពិតជាបាននិងកំពុងស្ថាបនានាវាផ្ទុកយន្តហោះមួយគ្រឿងបន្ថែមពីលើនាវាផ្ទុកយន្តហោះមួយគ្រឿងដែលមានស្រាប់ ៕
ប្រែសម្រួល៖ ថាច់ យ៉ាត
