ភ្នំពេញ៖ អាជ្ញាធររាជធានីភ្នំពេញបាន ប្រកាសប្ដេជ្ញារៀបចំសណ្ដាប់ធ្នាប់ខ្សែ ភ្លើង ខ្សែកាបដែលកំពុងរាយប៉ាយលើ អាកាសនៅលើដងផ្លូវសំខាន់ៗចំនួន៥ឱ្យទម្លាក់ចុះដោយដាក់បង្កប់មកក្នុងដីវិញឱ្យបាននៅក្នុងឆ្នាំ២០១៦ដើម្បីធានាបានសោភណភាពនិងសណ្ដាប់ធ្នាប់សាធារណៈ។
លោក ឃួង ស្រេង អភិបាលរងរាជ ធានីភ្នំពេញមានប្រសាសន៍កាលពីព្រឹក ថ្ងៃទី២២ ខែមករា ឆ្នាំ២០១៦ថា អាជ្ញា ធរកំពុងសម្រិតសម្រាំងជ្រើសរើសយក ក្រុមហ៊ុនចំនួនមួយដើម្បីភ្ជាប់កិច្ចសហការជាមួយគ្នាក្នុងការប្រមូលយកខ្សែភ្លើង និងខ្សែកាបអុបទិកផ្សេងៗជាច្រើនឱ្យ ទម្លាក់ចុះមកក្នុងដីវិញ។
លោកបន្ដថា ការជ្រើសរើសយក ក្រុមហ៊ុនធ្វើជាដៃគូតែមួយនេះដើម្បីឱ្យមានការទទួលខុសត្រូវនិងគ្រប់គ្រងលើបណ្ដាក្រុមហ៊ុនដែលធ្វើអាជីវកម្មដទៃ ទៀតឱ្យប្រើប្រាស់បំពង់បណ្ដាញតែមួយ ចៀសវាងការទម្លាក់កប់ផ្សេងៗគ្នាដែលនាំឱ្យមានភាពស្មុគស្មាញតទៅមុខទៀត។
ការប្រកាសគម្រោងរៀបចំបណ្ដាញ ខ្សែភ្លើងនិងខ្សែកាបអុបទិកជាលើកដំបូង ក្នុងរាជធានីភ្នំពេញនេះនឹងត្រូវផ្ដើម ចេញពីមហាវិថីចំនួន៥ក្នុងនោះរួមមានមហាវិថីព្រះនរោត្ដម មហាវិថីសហព័ន្ធ រុស្ស៊ី មហាវិថីម៉ៅសេទុង មហាវិថីកម្ពុជា ក្រោម និងមហាវិថីព្រះមុនីវង្សបន្ទាប់ ពីទទួលបានស.ជ.ណពីទីស្ដីការគណៈរដ្ឋមន្ដ្រី ហើយបណ្ដាញខ្សែទាំងអស់នោះ បាននិងកំពុងបង្កភាពស្មុគស្មាញជាច្រើនដូចជាធ្លាក់រាយប៉ាយនៅលើផ្លូវងាយ បង្កឱ្យមានគ្រោះថ្នាក់កើតឡើងនិងគ្រោះអគ្គិភ័យជាដើម។
លោក ឃួង ស្រេង បានបញ្ជាក់ថា ដើម្បីឱ្យដំណើរការនេះអាចសម្រេចទៅបានអាជ្ញាធរបានដាក់កិច្ចសន្យាឱ្យក្រុមហ៊ុនដែលមានសិទ្ធិរៀបចំតបណ្ដាញថ្មី នៅក្រោមដីនេះត្រូវដាក់តម្លៃសេវាឱ្យ បានសមរម្យដែលអាចទទួលយកបានពីបណ្ដាក្រុមហ៊ុនដទៃទៀត ដើម្បីឱ្យពួកគេ បានចូលរួមក្នុងគម្រោងនេះបានកាន់តែឆាប់។
លោកបានព្រមានថា ចាប់ពីពេលនេះ ទៅម្ចាស់អាជីវកម្មដែលមានខ្សែភ្លើង ខ្សែកាបនៅលើមហាវិថីទាំង៥នោះត្រូវចូលខ្លួនមកសហការជាមួយសាលារាជធានីភ្នំពេញដើម្បីបង្ហាញពីបណ្ដាញខ្សែ ភ្លើងរត់រៀងៗខ្លួនបើពុំដូច្នោះទេអាជ្ញាធរនឹងកាត់ផ្ដាច់ទាំងអស់ដោយពុំមានការ ទទួលខុសត្រូវឡើយ។
ជាមួយគ្នានេះមន្ដ្រីសាលារាជធានី ភ្នំពេញបានអះអាងថាប្រសិនបើការអនុវត្ដការរៀបចំសណ្ដាប់ធ្នាប់នៅមហាវិថីទាំង៥នេះទទួលបានជោគជ័យជាជំហានបន្ទាប់អាជ្ញាធរនឹងឈានទៅរៀបចំនៅ ដងផ្លូវនានាបន្ដទៀតដើម្បីឱ្យរាជធានី ភ្នំពេញកាន់តែមានសណ្ដាប់ធ្នាប់ល្អ ៕
ដោយ៖ សហការី
