ភ្នំពេញ៖ ជនសង្ស័យ២នាក់ ត្រូវប្រជាពលរដ្ននាំគ្នាព្រួតវាយម្នាក់មួយដៃមួយជើង បណ្ដាលឲ្យរងរបួសយ៉ាងដំណំ ហើយក៏ត្រូវនគរបាលមូលដ្ឋានឃាត់ខ្លួនតែម្តង ខណៈដែលជនសង្ស័យទាំង២នាក់នេះ បានធ្វើសកម្មភាពឆក់កាបូបពីស្ត្រីម្នាក់មិនបានសម្រេច ហើយព្យាយាមជិះម៉ូតូរត់គេចខ្លួន បែរជាជួបគ្រោះថ្នាក់ចរាចរផងដែរ ។
ករណីឆក់កាបូបខាងលើនេះ បានកើតឡើងកាលពីវេលាម៉ោង១០និង៣០នាទីព្រឹកថ្ងៃទី២ ៣ ខែមករា ឆ្នាំ២០១៦វេលា នៅចំណុចមុខអនុវិទ្យាល័យទឹកល្អក់ ផ្លូវ២៥៣ សង្កាត់ទឹកល្អក់ទី៣ ខណ្ឌទួលគោក។
ជនសង្ស័យទាំង២នាក់នេះត្រូវបានគេស្គាល់ ទី១ឈ្មោះ យី វាសនា ភេទ ប្រុស អាយុ ២៧ឆ្នាំ មុខរបរមិនពិតប្រាកដ ស្នាក់នៅផ្ទះជួលម្តុំវត្តជម្ពូវន្ត សង្កាត់ចោមចៅ ខណ្ឌពោធិសែនជ័យ។ទី២ឈ្មោះកែវ លីហួរ ភេទ ប្រុស អាយុ ១៨ឆ្នាំ មុខរបរមិនពិតប្រាកដ ស្នាក់នៅលើផ្លូវរថភ្លើង សង្កាត់ស្រះចក ខណ្ឌដូនពេញ។
ចំណែកជនរងគ្រោះត្រូវបានគេស្គាល់ឈ្មោះឃឹម វួចគាង ភេទ ស្រី អាយុ២៤ឆ្នាំ បុគ្គលិក ក្រុមហ៊ុនឯកជន ស្នាក់នៅក្នុងសង្កាត់បឹងកេងកងទី២ខណ្ឌចំការមន ។
វត្ថុតាំងដកហូតពីជនសង្ស័យមានម៉ូតូមួយគ្រឿង ម៉ាក NEC ពណ៌ខ្មៅ ពាក់ស្លាកលេខ ភ្នំពេញ 1CG 4056 ជាម៉ូតូធ្វើសកម្មភាព ។ ចំណែកកាបូបជនរងគ្រោះបានដកហូត ប្រគល់ជូនជនរងគ្រោះវិញ ដោយមិនបានបាត់បង់អ្វីនោះទេ។
តាមប្រភពព័ត៍មានពីនគរបាលព្រហ្មទណ្ឌខណ្ឌទួលគោក បានឲ្យដឹងថា នៅមុនពេលកើតហេតុជនរងគ្រោះបានជិះម៉ូតូ១គ្រឿង តាមបណ្តោយផ្លូវ២៥៣ ក្នុងគោលបំណងត្រឡប់ទៅផ្ទះវិញ លុះមកដល់ចំណុចកើតហេតុស្រាប់តែមានជនល្មើស២នាក់ជិះម៉ូតូ ១គ្រឿងម៉ាក ម៉ាកNEC ពណ៌ខ្មៅ ពាក់ស្លាកលេខ ភ្នំពេញ 1CG 4056 បានជិះមកអែមទន្ទឹម ក្នុងខណៈនោះជនសង្ស័យម្នាក់បានធ្វើសកម្មភាពឆក់កាបូបស្ពាយរបស់ជនរងគ្រោះបានសម្រេច តែនៅពេលជិះម៉ូតូរត់គេចបានបន្តិចទៅដួលម៉ូតូ ស្របពេលជនរងគ្រោះស្រែកចោរៗ ទើបត្រូវប្រជាពលរដ្ឋព្រួតគ្នាវាយគ្នាវាយមួយដៃមួយជើង ហើយប៉ូលីសមកដល់ក៏បានធ្វើការឃាត់ខ្លួនបញ្ជូនមកកាន់អធិការនគរបាលខណ្ឌទួលគោកដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការតាមនីតិវិធី ៕
ដោយ៖ ស ដារ៉ា
