ភ្នំពេញ៖ មានហេតុការណ៍ភ្ញាក់ផ្អើលនឹកស្មានមិនដល់មួយដែលបានកើតឡើង បណ្តាលអោយបុរស២ក្រុម ឈានដល់ការផ្ទុះអាវុធដាក់គ្នា រហូតដល់មានអ្នក រងរបួសទាំងសងខាង ដោយសារតែ ភាគីម្ខាងបានទៅនិយាយលេបខាយដាក់ស្រីស្នេហ៍របស់ភាគីម្ខាងទៀត បង្កអោយមានការភ្ញាក់ផ្អើល។
ហេតុការណ៍បង្កការភ្ញាក់ផ្អើលនេះ បានកើតមានឡើងកាលពីវេលាម៉ោង ១១យប់ ថ្ងៃទី ២៣ ខែមករា ឆ្នាំ២០១៦ ត្រង់ចំណុចផ្លូវ ១៥៤កែងផ្លូវ ៤៩ ស្ថិតក្នុងសង្កាត់ផ្សារថ្មីទី៣ ខណ្ឌដូនពេញ រាជធានីភ្នំពេញ ។
បើតាមសាក្សីដែលបានឃើញហេតុការណ៍បានអោយដឹងថា មុនពេលកើតហេតុគេបានឃើញ បុរសមួយក្រុមជិះរថយន្តមួយគ្រឿងម៉ាក TOYOTA TUNTRA ពណ៍ស្ករ ពាក់ស្លាកលេខ ខេមរភូមិន្ទ 02 2-9993 មកផឹកស៊ីនៅហាងចិញ្ចើមថ្នល់ ត្រង់ចំណុចផ្លូវ១៥៤ កែង៤៩ ពេលដែលកំពុកតែផឹកស៊ីនោះ ស្រាប់តែមានស្ត្រីម្នាក់ដើរចូលមកនិយាយលេងជាមួយអ្នកលក់ ឃើញដូច្នេះបុរសម្នាក់ក្នុងចំណោមបក្ខពួក៣នាក់បាននិយាយផ្តោះផ្តងលេងជាមួយស្ត្រីនោះ គាប់ជួនសង្សារស្ត្រីរូបនោះក៏នៅក្បែរនោះដែរ មានការអាក់អន់ចិត្ត ក៏ហៅស្ត្រីនោះអោយទៅផ្ទះវិញ ហើយបុរសជាសង្សារនោះ ក៏ដើរទៅមុន ស្រាប់តែភាគី ដែលនិយាយញ៉ែសង្សារគេនោះបានដើរតម្រង់ទៅរថយន្ត របស់ខ្លួន និងបានដកកាំភ្លើងខ្លីហើយដើរតាម ពីក្រោយ ពេលដើរទៅដល់កាំជណ្តើរឡើងផ្ទះក៏ អាម៉េកាំភ្លើងបំរុងបាញ់ ស្រាប់តែបុរសដែលជាសង្សារ ស្ត្រីរូបនោះដឹងខ្លួនមុន ក៏បាញ់សំដៅភាគីដែលញ៉ែរសង្សារគេនោះបានមុន បណ្តាលអោយរងរបួសដៃ ខាងឆ្វេង បន្ទាប់មកបុរសដែលញ៉ែរសង្សារគេនោះក៏បានបាញ់មួយគ្រាប់វិញដែរ ត្រូវចំជើងរងរបួសផងដែរ ។
សាក្សីក៏ បានបន្ថែមទៀតថា បន្ទាប់ពីបាញ់ម្នាក់មួយគ្រាប់រងរបួសទាំងសងខាងរួចមក ភាគីទាំងពីរក៏បានរត់គេច ដោយ ភាគីដែលញ៉ែរសង្សារគេបានឡើងរថយន្តទៅព្យាបាលនៅមន្ទីរពេទ្យ 179 ចំណែកឯភាគីម្ខាង ទៀតបានរត់ឡើងលើផ្ទះបាត់ស្រមោលទាំងរបួសជើង ។
ក្រោយពេលកើតហេតុ ខាងកំលាំងមានសម្ថកិច្ច រួមមានអាវុធហត្ថ និងប៉ូលីស ក៏បានទៅដល់ភ្លា មៗដែរ និងបានរកឃើញសំបកគ្រាប់ចំនួន២ យកមករក្សាទុកនៅប៉ុស្តិ៍ផ្សារថ្មីទី៣ ។ ចំណែកខាងអាវុធហត្ថបាននាំកំលាំងជាច្រើនដើម្បីស្វែងរងខាងភាគីម្ខាងទៀតដែលត្រូវរបួសជើង តែតាមរកមិនឃើញទេ ដោយសារតែបុរសរូបនោះបានគេចខ្លួនបាត់ទៅហើយ ។
គួរបញ្ជាក់ផងដែរថា បន្ទាប់ពីក្រុមអ្នកសារពត៌ មានទៅដល់ប៉ុស្តិ៍ផ្សារថ្មី៣ ហើយសុំថតផ្តិតយករូបសំបកគ្រាប់ដែលរើសបាននោះ បែរជាខាងប៉ូលីស មិនព្រមសហការជាមួយ ហាក់ដូចជាមានការបិទបាំងរឿងអ្វីមួយអញ្ចឹង ៕
ដោយ៖ ព្រែកជ័យ
