ខេត្តកណ្ដាល៖ ជនសង្ស័យ៣នាក់ ក្នុងចំណោមបក្ខពួក៤នាក់ដែលសុទ្ធសឹងជាបុគ្គលិកក្រុមហ៊ុនស៊ីភី ត្រូវបានសមត្ថកិច្ចនគរបាលស្រុកអង្គស្នួលឃាត់ខ្លួនកាលពីព្រឹកថ្ងៃទី២៥ ខែមករា ឆ្នាំ២០១៦ ពីបទលួច ដើម្បីកសាងសំណុំរឿងចាត់ការតាមនីតិវិធីច្បាប់ ។ បន្ទាប់ពីជនសង្ស័យ៣នាក់ខាងលើនេះបានរួមគំនិតគ្នាធ្វើសកម្មភាពលួចចំណីសត្វចេញពីទីតាំងរោងចក្រដឹកតាមរថយន្ដរបស់ក្រុមហ៊ុនយកទៅអោយបក្ខពួកម្នាក់ទៀត ។
ករណីលួចចំណីសត្វចេញពីក្រុមហ៊ុនស៊ីភី ដែលមានទីតាំងនៅភូមិចក ឃុំបែកចាន ស្រុកអង្គស្នួល បានកើតឡើងជាបន្ដបន្ទាប់ចំនួន២លើករួចមកហើយ ចុងក្រោយនៅថ្ងៃទី២៤ ខែមករា ឆ្នាំ២០១៦ វេលាម៉ោង០៩និង៣០ព្រឹក ។ ចំណីសត្វដែលត្រូវបានជនសង្ស័យលួចដឹកចេញពីក្រុមហ៊ុនចំនួន៣លើកមកនេះបាត់បង់អស់១០តោន បើគិតជាទឹកប្រាក់ប្រមាណជាង១ម៉ឺនដុល្លារសហរដ្ឋអារិក នេះបើតាមការអះអាងរបស់ឈ្មោះ សំ សៅឌី ភេទប្រុស អាយុ៣២ឆ្នាំ ជនជាតិខ្មែរ ជាប្រធានក្រុមហ៊ុនស៊ីភី មានទីលំនៅភូមិរការធំ សង្កាត់រការធំ ក្រុងច្បាមន ខេត្ដកំពង់ស្ពឺ ។
មន្ដ្រីនគរបាលស្រុកអង្គស្នួលបានឲ្យដឹងថា ជនសង្ស័យ៣នាក់ដែលត្រូវបានឃាត់ខ្លួននោះ ទី១-ឈ្មោះ ហង់ សុភារ៉ា ភេទប្រុស អាយុ៣៤ឆ្នាំ ជនជាតិខ្មែរ មុខរបរជាបុគ្គលិកផ្នែកគ្រប់គ្រងនៅក្នុងរោងចក្រខាងលើនេះ បច្ចុប្បន្នស្នាក់នៅភូមិអង្គសំណាង ឃុំពើក ស្រុកអង្គស្នួល ទី២-ឈ្មោះ ទឹម ដែន ភេទប្រុស អាយុ២៨ឆ្នាំ ជនជាតិខ្មែរ មុខរបរជាអ្នកបើកបររថយន្ដដឹកចំណីសត្វអោយក្រុមហ៊ុនខាងលើនេះ មានទីលំនៅភូមិស្លែង ឃុំត្រពាំងវែង ស្រុកកណ្ដាលស្ទឹង ខេត្ដកណ្ដាល ទី៣-ឈ្មោះ ខុន សុខន ភេទប្រុស អាយុ៣៤ឆ្នាំ ជនជាតិខ្មែរ មុខរបរជាបុគ្គលិកផ្នែកត្រួតពិនិត្យការដឹកជញ្ជូនចេញ-ចូលនៅក្នុងរោងចក្រ មានទីលំនៅភូមិព្រៃផ្ចឹកទី១ ឃុំសំរោងលើ ស្រុកអង្គស្នួល ។ ដោយឡែកជនសង្ស័យកំពង់រត់គេចខ្លួននោះមានឈ្មោះ ម៉ក់ វុទ្ធី ភេទប្រុស អាយុ៣៥ឆ្នាំ មានទីលំនៅភូមិបុរីកម្មករ ឃុំបែកចាន ស្រុកអង្គស្នួល ជាអ្នកទទួលផលចោរកម្ម ហើយក៏ជាអតីតបុគ្គលិកក្រុមហ៊ុនស៊ីភីផងដែរ ។
ប្រភពដដែលបន្ដថា នៅមុនពេលឃាត់ខ្លួនជនសង្ស័យ៣នាក់ខាងលើនេះ នៅក្នុងរោងចក្រផលិតចំណីសត្វក្រុមហ៊ុនស៊ីភីកើតមានករណីបាត់ចំណីសត្វពីក្នុងរោងចក្រ ។ ជាហេតុធ្វើអោយប្រធានក្រុមហ៊ុនមានការងឿងឆ្ងល់ក៏បើកវីដេអូឃ្លីបរបស់កាមេរាសុវត្ថិភាពនៅក្នុងរោងចក្រមើល ខណៈក៏បានឃើញជនសង្ស័យ៣នាក់ខាងលើនេះនាំគ្នាលើកចំណីសត្វជញ្ជូនដាក់នៅលើរថយន្ដ ដោយមិនមានបទបញ្ជា ។
ក្រោយមកប្រធានក្រុមហ៊ុនស៊ីភីបានដាក់ពាក្យបណ្ដឹងនៅអធិការដ្ឋាននគរបាលស្រុកអង្គស្នួល ហើយសមត្ថកិច្ចក៏បានបើកការស៊ើបអង្កេតរហូតឈានដល់ឃាត់ខ្លួនជនសង្ស័យ៣នាក់ខាងលើនេះ ខណៈដែលបក្ខពួកម្នាក់ទៀតដែលជាអ្នកទទួលផលចោរកម្មបានរត់គេចខ្លួនបាត់ចេញពីមូលដ្ឋានស្រុកអង្គស្នួល ។
ជនសង្ស័យទាំង៣នាក់បានសារភាពថាការពីអំឡុងខែ១២ ឆ្នាំ២០១៥ ពួកគេបានធ្វើសកម្មភាពយករថយន្ដរបស់ក្រុមហ៊ុនដឹកចំណីសត្វជាច្រើនបាវ ចេញពីក្នុងរោងចក្រយកទៅអោយឈ្មោះ ម៉ក់ វុទ្ធី ចំនួន២លើករួចមកហើយ ។ លុះមកដល់ថ្ងៃទី២៤ ខែមករា ឆ្នាំ២០១៦ ពួកគេទាំង៣នាក់បានរួមគំនិតគ្នាធ្វើសកម្មភាពលួចចំណីសត្វចេញពីក្នុងរោងចក្រជាលើកទី៣យកទៅអោយឈ្មោះ ម៉ក់ វុទ្ធី ជាថ្មីម្ដងទៀតដែលមានចំនួនសរុបប្រមាណ១០តោន ។ ក្រោយពីធ្វើសកម្មភាពរួចពួកគេទាំង៣នាក់បានបន្ដធ្វើការនៅក្នុងរោងចក្រដដែល ខណៈប្រធានក្រុមហ៊ុនឆែកកាមេរ៉ាសុវត្ថិភាពឃើញក៏ប្ដឹងទៅសមត្ថកិច្ចឲ្យជួយអន្ដរាគមន៏ឃាត់ខ្លួនតែម្ដង ៕
ដោយ៖ ស្អាងជ័យ
