អន្តរជាតិ៖ បន្ទាប់ពីរដ្ឋអាជ្ញាអ៉ីរ៉ង់ បានចោទប្រកាន់ និងចេញដីការចាប់ខ្លួន លោកដូណាល់ ត្រាំ ប្រធានាធិបតីអាមេរិក និងមន្ត្រីជាន់ខ្ពស់អាមេរិក៣៥នាក់ផ្សេងទៀត ចំពោះអំពើឃាតកម្មលើឧត្តមសេនីយ៍ Qassem Soleimaniនោះ ។ ស្ថាប័នប៉ូលីសអន្តរជាតិ (Interpol) បានបដិសេធសំណើរបស់អ៉ីរ៉ង់ ដែលសុំកិច្ចសហការក្នុងការជួយចាប់ខ្លួនលោក ដូណាល់ ត្រាំ ប្រធានាធិបតីអាមេរិក។
តាមរយៈសេចក្តីថ្លែងការរបស់ប៉ូលីសInterpol ដែលមានទីស្នាក់ការនៅទីក្រុងលីយ៉ុង ប្រទេសបារាំង បានបដិសេធថា នឹងមិនពិចារណាសំណើររបស់អ៉ីរ៉ង់ឡើយ។ ដោយលើកអំណះអំណាងថា ធម្មនុញ្ញរបស់ខ្លួនហាមឃាត់ អង្គភាពមួយនេះមិនឲ្យចេញអន្តរាគមន៍ ឬសកម្មភាពណាដែលមានលក្ខណៈនយោបាយ យោធា សាសនា ឫពូជសាសន៍។
បើតាមការផ្សាយរបស់សារព័ត៌មាន Al Jazeera បាននិយាយថា មែនទែនទៅ សេចក្តីស្នើរបស់អ៉ីរ៉ង់ទៅ Interpol មិនមែនជាការទាមទារឲ្យអង្គភាពចេញបញ្ជាទៅកាន់រដ្ឋសមាជិកឯទៀតនេះទៅចាប់លោក ត្រាំ ឡើយ។ ប៉ុន្តែវាជាសំណើសុំឲ្យដាក់ឈ្មោះបុគ្គលទាំងនោះក្នុងសេចក្តីប្រកាសក្រហម (Red notice) ដែលជាកម្រិតប្រកាសខ្ពស់បំផុត។ នៅពេល ប៉ូលីសអន្តរជាតិ ចេញសេចក្តីប្រកាសក្រហម វាអនុញ្ញាតឲ្យអាជ្ញាធរប៉ូលីសនៃប្រទេសផ្សេង ចាប់ខ្លួនបុគ្គលទាំងនោះក្រោមឈ្មោះប្រទេសដែលស្នើសុំ។ ប៉ុន្តែសេចក្តីប្រកាសក្រហមនេះ មិនអនុញ្ញាតឲ្យមានការចាប់ខ្លួនដោយបង្ខំ ឬធ្វើបត្យាប័ន ថ្នាក់ដឹកនាំប្រទេសណាមួយឡើយ។ គេអាចត្រឹមដាក់កំហឹតលើការធ្វើដំណើរតែប៉ុណ្ណោះ។
ក្រោយទទួលបានសំណើរសុំឲ្យចេញសេចក្តីប្រកាសក្រហម ទៅលើបុគ្គលណាម្នាក់ ប៉ូលីសអន្តរជាតិ នឹងធ្វើការជួបប្រជុំពិភាក្សាក្នុងគណៈកម្មការរបស់ខ្លួន ថាតើគួរចែកចាយព័ត៌មានទាំងនោះជាមួយរដ្ឋសមាជិកដែរឫទេ។ បន្ថែមពីនេះ ប៉ូលីសInterpol ក៏មិនតម្រូវឲ្យចេញសេចក្តីប្រកាសជាសាធារណៈដែរ ប៉ុន្តែក្នុងករណីមួយចំនួន បុគ្គលដែលត្រូវបានប្រកាសក្នុងសេចក្តីជូនដំណឹងក្រហម ត្រូវលេចមុខក្នុងវេបសាយរបស់ Interpol។
សូមជម្រាបថា នៅថ្ងៃទី ២៩ ខែមិថុនា លោក Ali Qasi Mehr រដ្ឋអាជ្ញាអ៉ីរ៉ង់ បានបញ្ជាក់ឲ្យដឹងថា មនុស្សចំនួន៣៦ រូបក្នុងនោះមានលោកត្រាំ មន្ត្រីនយោបាយ និងយោធា ដែលពាក់ព័ន្ធទៅនឹងអំពើឃាតកម្មលើឧត្តមសេនីយ៍ Qassem Soleimani កាលពីខែមករា ត្រូវបានស៊ើបអង្កេត និងចេញដីការឲ្យចាប់ខ្លួនតាមរយៈ Interpol ។ចំពោះលោក ត្រាំ វិញ អ៉ីរ៉ង់ នឹងបន្តតាមចាប់ខ្លួនដើម្បីកាត់ទោសបើទោះបីជាលោកចប់អាណត្តិក៏ដោយ។
ដោយឡែកចំពោះការស្នើសុំរបស់អ៉ីរ៉ង់ទៅ ប៉ូលីសInterpol នេះ លោក Brian Hook បេសកជនអាមេរិកទទួលបន្ទុកកិច្ចការអ៊ីរ៉ង់ នៅថ្ងៃទី២៩ មិថុនា បាននិយាយថា សំណើនេះមានលក្ខណៈនយោបាយ ហើយពុំមានទាក់ទងអ្វីទៅនឹងសន្តិសុខជាតិ សន្តិភាពអន្តរជាតិ និងការលើកកម្ពស់ស្ថិរភាពឡើយ។ ពីទីក្រុងរីយ៉ាដ ប្រទេសអារ៉ាប៊ីសាអូឌីត លោក Hook បន្ថែមថាវា គ្រាន់តែជាការឃោសនានយោបាយប៉ុណ្ណោះដែលគ្មានអ្នកណាខ្វល់ខ្វាយឡើយ៕ដោយ៖ស តារា
