ខេត្តព្រៃវែង៖ យ៉ាងហោចណាស់មានប្រជាពលរដ្ឋក្រីក្រចំនួន១១គ្រួសារ ទទួលបានអំណោយសប្បុរសធម៌ ជាគ្រឿងឧបភោគបរិភោគពីសំណាក់តារាចម្រៀងប្រចាំផលិតកម្ម អឹម(M)លោក សនវិជ្ជបុត្រ ។ កម្មវិធីសប្បុរសធម៌នេះត្រូវបានធ្វើដំណាលគ្នានឹងការរៀបចំពិធីបង្សុកូលឧទ្ទិសកុសលផលបុណ្យដល់កុមារាឯល ដាំដែលបានធ្វើអត្ថឃាតដោយចងកសម្លាប់ខ្លួនក្រោយពីម្តាយប្រឲ្យទៅសុំអាហារតាមរោងការកាលពីចុងឆ្នាំ២០១៥ ។
កម្មវិធីនេះត្រូវបានប្រារព្វធ្វើឡើងកាលពីព្រឹកថ្ងៃទី២៤ ខែមករា ឆ្នាំ២០១៦ នៅក្នុងបរិវេណវត្តធម្មសំមិត្តារាម ស្ថិតនៅភូមិព្រៃផ្ចិត ឃុំធាយ ស្រុកបាភ្នំខេត្តព្រៃវែង ។
តារាចម្រៀង សន វិជ្ជបុត្របានបញ្ជាក់ថា លោកបានសម្រេចចិត្តរៀបចំពិធីចែកអំណោយជាគ្រឿង ឧភោគបរិភោគដល់ក្រុមគ្រួសារក្រីក្រទាំង១១គ្រួសាររួមទាំងរៀបចំពិធីបង្សុកូលនេះគឺក្រោយពីលោកបានទទួលព័ត៌មានជុំវិញការស្លាប់ដោយការធ្វើអត្តឃាតចងកសម្លាប់ខ្លួនរបស់កុមារា ឯល ដាំ ព្រោះតែម្តាយបង្ខំឲ្យសុំបាយគេនៅតាមរោងការកាលពីថ្ងៃទី២៣ខែធ្នូឆ្នាំ២០១៤ ដែលស្ថិតនៅភូម ប្រជាធម្មលិតសង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ។ លោក បញ្ជាក់ថាលោកពិតជាក្តុកក្តួលចំពោះដំណឹងដ៏សោកសង្រេង និងពិតជាអាណិតដល់កុមារា ឯល ដាំ ដែលគ្រានៅរស់ទទួលរងនៅការវាយដំ រហូតរងសម្ពាធផ្លូវចិត្តដាច់ចិត្តចងកធ្វើអត្តឃាត។តារាចម្រៀងរូបនេះបន្តថាជាការសោកស្តាយដែលកុមារារូបនេះបានបាត់បង់អាយុជីវិត ហើយលោកក៏ដូចជាសប្បុរសជនមិនអាចជួយអ្វីដល់កុមាររូបនេះបានក្រៅតែពីការធ្វើបុណ្យឧទ្ទិសកុសល្យតាមផ្លូវធម៌ និង ការផ្តល់អំណោយសប្បុរសដល់ក្រុមគ្រួសារក្រីក្រមួយចំនួននៅស្រុកកំណើតលោកផ្ទាល់តែម្តង។ លោកបន្តថាអំណោយដែលលោកផ្តល់ជូននៅពេលនេះគឺជាទឹកចិត្តនិងថវិការបស់លោកផ្ទាល់រួមជាមួយ និងសប្បុរសជននៅសហរដ្ឋអាមេរិកគឺលោកឡេង ផល្លា អ្នកស្រីទេពអប្សរ និងសប្បុរសជនក្នុងប្រទេសមានអ្នកស្រីសេង គឹមឌួង និងស្វាមី។
លោកបន្តថា ក្រុមគ្រួសារក្រីក្រទាំងអស់ទទួលបានអង្ករ៥០គីឡូក្រាម ត្រីខដប់កំប៉ុង មីមួយកេស ទឹកត្រីទឹកនិងស៊ីអ៊ីវ។ ក្រៅពីនេះលោកក៏បានចូលរួមជាបច្ច័យកសាង និងទេយទានបង្សុកូលឧទ្ទិសកុសល្យផលបុណ្យទាំងអស់ដល់កុមារាឯល ដាំឲ្យធ្វើដំណើរទៅកាន់សុគតិភព។
ព្រះចៅអធិការវត្តធម្មសំមិត្តារាម បានមានសង្ឃដីការថា ការធ្វើជាទេយទាន និងបង្សុកូល ជូនដល់កុមារាឯល ដាំ ដែលភ្លាំងភ្លាត់សតិដោយការធ្វើអត្តឃាតនេះគឺជាសទ្ធាជ្រះថ្លារបស់សប្បុរសជន ទាំងក្នុងនិងក្រៅប្រទេសដែលសកម្មភាពសប្បុរសធម៌នេះគឺជាសកម្មភាពជាគំរូល្អមួយ ពិសេសគឺវប្បធម៌នៃការចែករំលែកគ្នារស់។ ព្រះតេជគុណមានសង្ឃដីការបន្តថា ក្នុងព្រះពុទ្ធសាសនាគឺហៅថា សង្ឃទានសង្គ្រោះអ្នកដែលទន់ទាបបំផុតដែលជាទានដ៏ប្រពៃ។ ព្រះអង្គមានសង្ឃដីការអំពាវនាវឲ្យបណ្តាសប្បុរសជនទាំងអស់ដែលមានសទ្ធាជ្រះថ្លាបែបនេះបន្តរួបរួមសាមគ្គីគ្នាផ្តល់ការចែករំលែកធនធានដែលមានទៅដល់ជនក្រីក្រ។ ដោយមានគម្រោងបង្កើតឲ្យមានជាមជ្ឈមណ្ឌលកុមារកំព្រារក្នុងបរិវេនវត្តខាងលើនេះដែរព្រះតេជគុណក៏អំពាវនាវដល់សប្បុរសជនបន្តជួយកសាងសមិទ្ធផលវត្តក៏ដូជាចែករំលែក និងគាំទ្រដល់គម្រោងខាងលើដើម្បីផ្តល់ឱកាសឲ្យក្មេងៗកំព្រាឪពុកម្តាយទទួលបានការអប់រំនិងទទួលបានការទំនុកបម្រុងទាំងស្មារតី និងសម្ភារៈផងដែរ ៕
ដោយ៖ វឌ្ឍនា
