ប៉ូលិសម៉ាឡេស៊ីបានអះអាងថា សាកសព៥នាក់បន្ថែមទៀត ទើបតែប្រទះឃើញអណ្តែតមកទើរនៅច្រាំងសមុទ្រកាលពីថ្ងៃទី២៧ ខែមករា ឆ្នាំ២០១៦ ។ សាកសពទាំងនេះត្រូវគេជឿជាក់ថា ជាសាកសពរបស់ក្រុមជនភៀសខ្លួដែលធ្វើដំណើរតាមទូរនៅក្នុងប្រទេសម៉ាឡេស៊ី ហើយបានជួបគ្រោះថ្នាក់ក្រឡាប់លិចរួចមកនោះ។
សាកសព១៣នាក់ត្រូវបានប្រទះឃើញកាលពីថ្ងៃទី២៦ ខែមករា បន្ទាប់ពីទូកធ្វើដំណើររបស់ពួកគេបានលិចនៅដែនសមុទ្រភាគខាងត្បូង ស្ថិតនៅក្នុងរដ្ឋ Johor ប្រទេសម៉ាឡេស៊ី ។ ការរកឃើញសាកសព៥នាក់បន្ថែមទៀតនេះ ធ្វើឲ្យសាកសពកើនឡើងដល់១៨នាក់ ដោយសារតែហេតុការណ៍លិចទូកដឹកក្រុមជនភៀសខ្លួន ។
លោក Rahmat Othman អធិការប៉ូលិសបានបញ្ជាក់ថា សាកសព៥នាក់បន្ថែមទៀត ទើបត្រូវបានរកឃើញទើរនៅលើច្រាំងសមុទ្រ ។ ប្រភពបន្តថា ជនរងគ្រោះទាំងនេះបានចូលមកប្រទេសម៉ាឡេស៊ីដោយខុសច្បាប់ ។ នៅពេលនេះ កម្លាំងជួយសង្គ្រោះបាននិងកំពុងធ្វើប្រតិបត្តិការស្វែងរកអ្នកដែលនៅបាត់ខ្លួនបន្ថែមទៀត បន្ទាប់ពីការស៊ើបអង្កេតមួយបានលើកឡើងថា ជនរងគ្រោះដែលធ្វើដំណើរតាមទូកម៉ាស៊ីន២ ហើយជួបគ្រោះថ្នាក់នោះមានគ្នាប្រមាណពី៣០នាក់ដល់៣៥នាក់ ។
លោក Rahmat Othman បានអះអាងថា មានសេចក្តីរាយការណ៍ក្នុងចំណោមជនរងគ្រោះលិចទូកទាំងនោះ មានអ្នកខ្លះនៅរស់រានមានជីវិត ។ លោកបន្តថា អ្នកដែលនៅបាត់ខ្លួនទាំងនោះទំនងជាមិនមែនលិចចុះក្រោមទឹកនោះឡើយ ប៉ុន្តែពួកគេបាននិងកំពុងលាក់ខ្លួននៅក្នុងព្រៃក្បែរៗតំបន់ខាងលើ រង់ចាំក្រុមអ្នករត់ពន្ធមកនាំពួកគេទៅកាន់ទីតាំងមានសុវត្ថិភាពតែប៉ុណ្ណោះ ។
លោក Rahmat Othman អះអាងថា ជនភៀសខ្លួនខុសច្បាប់ទាំងនោះអាចធ្វើដំណើរមកពីប្រទេសជិតខាង គឺមកពីដែនកោះ Batam ប្រទេសឥណ្ឌូនេស៊ីនោះតែម្តង ។
ភាគខាងត្បូងរដ្ឋ Johor ជាតំបន់ឈូងសមុទ្រដែលមានរយៈចម្ងាយឆ្ងាយ និងជាព្រំដែនសមុទ្ររបស់ម៉ាឡេស៊ីជាប់ជាមួយប្រទេសឥណ្ឌូនេស៊ី ។ វាជាច្រកផ្លូវសមុទ្រសំខាន់ទី៣ផងដែរសម្រាប់ការចរាចរសេដ្ឋកិច្ចប្រទេសតំបន់អាស៊ីភាគអាគ្នេយ៍នោះ ។ ក្រុមអ្នករត់ពន្ធជនភៀសខ្លួនខុសច្បាប់តែងតែធ្វើសកម្មភាពដឹកជញ្ជូនជនភៀសខ្លួនចូលទៅក្នុងទឹកដីម៉ាឡេស៊ីតាមរយៈច្រកសមុទ្រនេះ ។
ពលរដ្ឋឥណ្ឌូនេស៊ីប្រមាណជិត២លាននាក់ ភាគច្រើនជាជនអន្តោប្រវេសន៍ខុសច្បាប់ នៅពេលបច្ចុប្បន្ននេះបាននិងកំពុងមានវត្តមាននៅលើទឹកដីម៉ាឡេស៊ី ។ ពលករទាំងនោះភាគច្រើនត្រូវបង្ខិតបង្ខំឲ្យធ្វើពលកម្មខុសច្បាប់ ។
ហេតុការណ៍គ្រោះថ្នាក់ដល់អាយុជីវិតបានកើតឡើងជាញឹកញាប់ ស្ទើរក្លាយទៅជារឿងធម្មតាទៅហើយ ។ ជនភៀសខ្លួនទាំងនោះបានព្យាយាមធ្វើដំណើរតាមទូក ជាពិសេសនៅវេលាយប់ដើម្បីគេចពីការបង្ក្រាមរបស់អាជ្ញាធរ លួចឆ្លងដែនមកទឹកដីម៉ាឡេស៊ី ៕
ប្រែសម្រួល៖ ថាច់ យ៉ាត
