ភ្នំពេញ៖បន្ទាប់ពីទទួលបានការយល់ព្រមផ្តល់ជូនដីឡូតិ៍ទំហំ៤ម៉ែត្រគុណនឹង១៥ម៉ែត្រ ក្នុងមួយខ្នងផ្ទះ ពីសម្តេចតេជោ ហ៊ុន សែន នាយករដ្ឋមន្ត្រី តាមរយៈសំណើបស់បងប្អូនប្រជាពលរដ្ឋសហគមន៍បន្ទាយស្លឹកចំនួន ៨៧ខ្នងផ្ទះ រស់នៅលើផ្លូវសាធារណៈលេខ៤៣៤ ភូមិ៤ សង្កាត់ទំនប់ទឹក ខណ្ឌបឹងកេងកងរួចមក , ប្រជាពលរដ្ឋល្អនិងជាគំរូ បានស្ម័គ្រចិត្តចូលរួមរុះរើសំណង់មិនរៀបរយលើផ្លូវសាធារណៈ និង ទៅទទួលយកដីកម្មសិទ្ធិស្របច្បាប់សម្រាប់សាងសង់លំនៅដ្ឋាននៅតំបន់អភិវឌ្ឍន៍ថ្មី ។
នៅព្រឹកថ្ងៃទី១១ ខែកក្កដា ឆ្នាំ២០២០ នេះ រដ្ឋបាលរាជធានីភ្នំពេញ បញ្ជាក់ថា បងប្អូនម្ចាស់ផ្ទះទាំងអស់បានស្ម័គ្រចិត្តចូលរួមរុះរើសំណង់របស់ខ្លួនជាមួយអាជ្ញាធរដោយស្មារតីសហការ និងសប្បាយរីករាយ ដើម្បីរៀបចំសម្ភារនិងដឹកជញ្ជូនទៅទីតាំងដីឡូតិ៍ថ្មីដែលអាជ្ញាធររាជធានីភ្នំពេញបានរៀបចំផ្តល់ជូន ស្ថិតនៅឃុំវិហារសួគ៌ ស្រុកខ្សាច់កណ្តាល ខេត្តកណ្តាល ដោយស្នាក់នៅបណ្តោះអាសន្នមួយរយៈក្នុងផ្ទះដែលបានរៀបចំទុកជូន។
ក្រោមនយោបាយឈ្នះឈ្នះរបស់សម្តេចតេជោ និងអនុវត្តតាមអនុសាសន៍ដ៏ខ្ពង់ខ្ពស់របស់សម្តេចក្នុងការផ្តល់កម្មសិទ្ធិជូនប្រជាពលរដ្ឋក្រីក្រពិតប្រាកដ , លោក ឃួង ស្រេងអភិបាលរាជធានីភ្នំពេញ បានដឹកនាំ រៀបចំ ចាត់ចែងការអនុវត្តប្រកបដោយប្រសិទ្ធភាពខ្ពស់តាំងពីដំណាក់កាលចាប់ផ្តើម រៀបចំនីតិវិធី រហូតឈានដល់ការរុះរើដោយស្ម័គ្រចិត្តដែលបងប្អូនប្រជាពលរដ្ឋពេញចិត្តទទួលយក ។
ជាមួយគ្នានេះ លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ ថ្លែងថា ថ្ងៃនេះ ជាថ្ងៃសប្បាយចិត្តជាងគេតាំងពីបានចូលរួមជីវភាពជាមន្ត្រីរាជការ។ មិនមែនសប្បាយដោយការបំពាក់គ្រឿងឥស្សរិយយស មិនមែនសប្បាយចិត្តដោយទទួលបានការតំឡើងបុណ្យស័ក្ដិតួនាទី ប៉ុន្តែដោយការបានជួយសម្របសម្រួលដោះស្រាយការផ្លាស់ប្តូរជីវិតរស់នៅថ្មី ជីវភាពប្រចាំថ្ងៃថ្មី និងក្តីសង្ឃឹមថ្មីជូនបងប្អូនប្រជាពលរដ្ឋកំពុងរស់នៅលើផ្លូវសាធារណៈជាង ២០ឆ្នាំមកហើយ។
លោក បន្តថា លទ្ធផលបែបនេះ ពិតជាកើតឡើងក្រោមការដឹកនាំដ៏ប៉ិនប្រសព្វ និងម៉ឺងម៉ាត់របស់លោក ឃួង ស្រេង អភិបាលរាជធានីភ្នំពេញ ការសហការដោយភាពទទួលខុសត្រូវរបស់មន្ត្រីក្រោមឱវាទគ្រប់គ្នា និងគ្រប់លំដាប់ថ្នាក់ ពិសេសស្មារតីភ្ញាក់រលឹក ទទួលស្គាល់ ទទួលយក និងសហការរបស់បងប្អូនប្រជាពលរដ្ឋយើង។
សង្ឃឹមថា វប្បធម៌បែបនេះនឹងស្ថិតនៅជាប់គ្រប់ក្រអៅបេះដូងរបស់ភាគីពាក់ព័ន្ធគ្រប់គ្នា ៕
ដោយ៖ចេស្តា
