ភ្នំពេញ៖ មន្ត្រីនគរបាលខណ្ឌសែនសុខប្រាប់ឲ្យដឹងថា នាព្រឹកថ្ងៃទី២៨ ខែមករា ឆ្នាំ២០១៦ នគរបាលនៃអធិការដ្ឋាននគរបាលខណ្ឌសែនសុខ កសាងសំណុំរឿងបញ្ចូនជនសង្ស័យម្នាក់ទៅកាន់សាលាដំបូងរាជធានីភ្នំពេញ ដើម្បីផ្តន្ទាទោសតាមច្បាប់ករណីជួញដូរ និងកាន់កាប់អាវុធខុសច្បាប់។

សមត្ថកិច្ចប្រាប់ថា ជនសង្ស័យឈ្មោះ​ ខឹម ចាន់រិទ្ធ ភេទប្រុស អាយុ៣៩ឆ្នាំ មុខរបរលក់និងកាត់សំលៀកបំពាក់យោធា នៅក្នុងផ្សារទឹកថ្លា ស្នាក់នៅភូមិ ផ្សារទឹកថ្លា សង្កាត់ទឹកថ្លា ខណ្ឌសែនសុខ ត្រូវបានឃាត់ខ្លួន កាលពីវេលាម៉ោង២៣យប់ថ្ងៃទី២៥ ខែមករា ឆ្នាំ២០១៦ នៅចំណុចភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានីភ្នំពេញ។

សមត្ថកិច្ចប្រាប់បន្តអោយដឹងថា មុនពេលឃាត់ខ្លួនគឺជនសង្ស័យបានធ្វើដំណើរចេញពីផ្ទះនៅផ្សារទឹកថ្លា ឆ្ពោះទៅភូមិត្រពាំងឈូក សង្កាត់ទឹកថ្លា ដោយមានកាំភ្លើងខ្លី ១ដើម នៅជាប់និងខ្លួន ខណៈនោះត្រូវបានប្រជាពលរដ្ឋប្រទះឃើញសភាពការណ៍មិនល្អ ក៏រាយការណ៍ប្រាប់នគរបាលប៉ុស្តិ៍រដ្ឋបាលទឹកថ្លា ចុះអន្តរាគមន៍ភ្លាមៗ ដល់កន្លែងកើតហេតុ ឃាត់ខ្លួនជនសង្ស័យ រួមទាំងវត្ថុតាងកាំភ្លើងខ្លី ១ដើមផងដែរ នាំទៅកាន់ប៉ុស្តិ៍ធ្វើការសាកសួរ។

ដោយឡែកលោកអនុសេនីយ៍ឯក សុខ សុផល នាយប៉ុស្តិ៍នគរបាលរដ្ឋបាលទឹកថ្លាប្រាប់អោយដឹងថា បន្ទាប់ពីទទួលបានសេចក្តីរាយការណ៍ពីប្រជាពលរដ្ឋភ្លាមនោះលោកបានសុំបញ្ជាពីលោកវរសេនីយ៍ឯក ម៉ក់ ហុង អធិការខណ្ឌសែនសុខដឹកនាំកម្លាំងចុះដល់កន្លែង កើតហេតុ ឃាត់ខ្លួនជនសង្ស័យភ្លាមៗ ដកហូតអាវុធខ្លី ១ដើម ម៉ាកK59 មានបង់១ និងគ្រាប់១គ្រាប់ ទូរស័ព្ទដៃ២គ្រឿង ហើយបន្ទាប់ពីសួរនាំរហូតដល់ព្រឹកថ្ងៃទី២៦ ខែ មករា ឆ្នាំ២០១៦ លោកក៏បានបន្តនីតិវិធីនាំជនសង្ស័យទៅឆែកឆេលំនៅដ្ឋានបន្ថែមទៀត ប៉ុន្តែជាលទ្ធិផលនៃឆែកឆេរគឺរកមិនឃើញមានអ្វីដែលគួរឲ្យសង្ស័យនោះទេ។

លោកអនុសេនីយ៍ឯក សុខ សុផល ប្រាប់បន្តថា ក្រោយពីធ្វើការសាកសួរជនសង្ស័យឆ្លើយសារភាពថា កាំភ្លើងខ្លី ម៉ាក K59 ចំនួន ១ដើម នេះ មិនមែនជារបស់រូបគេនោះទេ គឺរូបគេទទួលបានពីបុរសម្នាក់ផ្សេងទៀត ដើម្បីយកទៅលក់បន្ត ប៉ុន្តែមិនទាន់ទាំងបានលក់ផង ក៏ត្រូវសមត្ថកិច្ចត្រួតពិនិត្យឆែកឃើញកាំភ្លើងឃាត់ខ្លួនរូបគេតែម្តង៕

ដោយ៖ តុង សីហា