លោក ជុំ សំនិត ប្រធានសាខាពន្ធដារខេត្តឧត្តរមានជ័យ ដែលកាន់តំណែងនេះអស់រយៈជិត២០ឆ្នាំមកនោះ មានរឿងរ៉ាវពុករលួយដោយស្ងៀមស្ងាត់ជាច្រើន ។ ករណីថ្មីៗនេះ បានកើតឡើងចំពោះការបង់ប្រាក់ដើម្បីបិទក្រុមហ៊ុន ប៉ុន្តែបែរជាលោកប្រធានស៊ីដាច់ទៅវិញ ។ ជំនាន់មុនមានរឿងរ៉ាវស្នេហា ជំពាក់វាក់វិនទៀតផង ។
ប្រភពរាយការណ៍ថា ក្រុមហ៊ុនឯកជនមួយបានក្ស័យធន តាំងពីឆ្នាំ២០១០ ហើយតំណាងក្រុមហ៊ុនក៏មិនបានបង់ពន្ធជូនរដ្ឋអស់រយៈពេល៥ឆ្នាំហើយដែរ ។ ស្រាប់តែថ្ងៃទី១៥ ខែកក្កដា ឆ្នាំ២០១៥ លោក ជុំ សំនិត បានកោះហៅតំណាងក្រុមហ៊ុនទៅផាកពិន័យជាប្រាក់ជាង១២លានរៀល និងបង្ខំឲ្យបង់ប្រាក់ជាង១លានរៀលទៀតជាថ្នូរនឹងការរត់ឯកសារ បិទក្រុមហ៊ុនឲ្យបានឆាប់ ងាយនឹងចាកផុតពីការផាកពិន័យ ។ លោកប្រធានប្រាប់តំណាងក្រុមហ៊ុនថា រយៈពេល២សប្តាហ៍ ឯកសារបិទក្រុមហ៊ុននឹងចូលជាធរមាន ។ ប៉ុន្តែតាំងពីចុងខែកក្កដា ឆ្នាំ២០១៥មកដល់ពេលនេះ គេមិនឃើញមានឯកសារអ្វីស្តីពីការបិទក្រុមហ៊ុននោះឡើយ ។
មន្ត្រីសាលាខេត្តឧត្តរមានជ័យបាននិយាយថា ទង្វើរបស់លោក ជុំ សំនិត ជារឿងខុសច្បាប់ ។ សាខាពន្ធដារ គឺគ្មានសិទ្ធិពិន័យក្រុមហ៊ុនជាដាច់ខាត គឺគ្រាន់តែចេញសេចក្តីជូនដំណឹង៣ដង និងចេញលិខិតក្រើនរំលឹកឲ្យម្ចាស់ក្រុមហ៊ុនបានដឹងតែប៉ុណ្ណោះ ។ គេនិយាយថា លោក ជុំ សំនិត មានរឿងច្រើនណាស់ តាំងពីមកកាន់កន្លែងនេះ ៕
