ភ្នំពេញ៖ យុវជនម្នាក់ធ្វើសកម្មភាពចាប់ក្មេងស្រីអាយុ៧ឆ្នាំម្នាក់ រំលោភរហូតបានសម្រេច ខណៈនាងដើរទៅបត់ជើងនៅខាងក្រោយផ្ទះ ក្រោយធ្វើសកម្មភាពរួចជនសង្ស័យដើរមកដេកនៅក្រោមផ្ទះ ហើយត្រូវក្មេងរងគ្រោះដើរមកប្រាប់បងប្អូន ហើយរាយការណ៍ទៅសមត្ថកិច្ចចុះមកឃាត់ខ្លួនតែម្តង។
ហេតុការណ៍នេះបានកើតឡើងកាលពីម៉ោង៧យប់ថ្ងៃទី២៧ ខែមករា ឆ្នាំ២០១៦ ស្ថិតនៅចំណុចភូមិព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វា។
សមត្ថកិច្ចនគរបាលមូលដ្ឋានបានឲ្យដឹងថា ជនសង្ស័យដែលចាប់ក្មេងរំលោភខាងលើមានឈ្មោះស សម្បត្តិ អាយុ១៧ឆ្នាំ ជាកម្មករសំណង់ រីឯក្មេងស្រីរងគ្រោះមានអាយុ៧ឆ្នាំ ។
ប្រភពពីសមត្ថកិច្ចបានឲ្យដឹងទៀតថា មុនពេលកើតហេតុ ជនសង្ស័យបានផឹកស្រាស្រវឹង រួចដើរទៅដេកនៅក្រោមផ្ទះរបស់ក្មេងស្រីរងគ្រោះ ដល់ពេលកើតហេតុ ក្មេងស្រីរងគ្រោះបានចុះពីលើផ្ទះ ដើរទៅខាងក្រោយផ្ទះដើម្បីបត់ជើង ហើយក៏ត្រូវជនសង្ស័យដើរតាមពីក្រោយទៅចាប់នាងរំលោភតែម្តង ។
ក្រោយពីធ្វើសកម្មភាពរួច ជនសង្ស័យបានដើរមកដេកក្រោមផ្ទះវិញ ភ្លាមនោះក្មេងស្រីរងគ្រោះបានរត់មកផ្ទះវិញ រៀបរាប់ប្រាប់ឪពុកម្តាយ ក៏ភ្ញាក់ផ្អើលប្តឹងសមត្ថកិច្ចឱ្យចាប់ខ្លួនតែម្តង។
បើតាមសម្តីជនសង្ស័យបាននិយាយថា មកពីខ្លួនស្រវឹងទើបធ្វើបែបនេះ ។
បច្ចុប្បន្នជនសង្ស័យកំពុងឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌជ្រោយចង្វា ដើម្បីកសាងសំណុំរឿងបញ្ចូនទៅសាលាដំបូងរាជធានីភ្នំពេញចាត់ការបន្តតាមនីតិវិធី៕
...
ដោយ៖ ជ្រោយពេជ្រ
