ខេត្តកណ្ដាល៖ ជនសង្ស័យជាកម្មករសំណង់ម្នាក់ ពេលឃើញក្មេងស្រីស្នាក់នៅបន្ទប់ជាប់គ្នាមើលទៅដូចជាទំនង ក៏និយាយលែបខាយពាក្យសម្ដី លុះក្រោយមកទៀតឆ្លៀតពេលម្ដាយក្មេងស្រីរងគ្រោះមិននៅ ជននេះក៏ចូលទៅចាប់រំលោភបានសម្រេច ប៉ុន្តែស្អែកឡើងត្រូវបងស្រីជនរងគ្រោះប្តឹងសមត្ថកិច្ចឲ្យឃាត់ខ្លួន។ ករណីនេះបានកើតឡើងកាលពីថ្ងៃទី៣០ ខែកក្កដាឆ្នាំ២០២០វេលាម៉ោង៧និង០០នាទីនៅចំណុចភូមិស្វាយជ្រំ ឃុំស្វាយជ្រំ ស្រុកខ្សាច់កណ្តាល ខេត្តកណ្ដាល។
មន្ត្រីនគរបាលស្រុកខ្សាច់កណ្ដាលបានឲ្យដឹងថា ជនសង្ស័យឈ្មោះ យ៉ាន់ ចាន់ហួន ហៅ ក្លូ ភេទប្រុស អាយុ២៥ឆ្នាំ ជនជាតិខ្មែរ មុខរបរកម្មករសំណង មានទីលំនៅភូមិក្រសាំង ឃុំត្រពាំងឫស្សី ស្រុកកំពង់ស្វាយ ខេត្តកំពង់ធំ។ ចំណែកក្មេងស្រីរងគ្រោះមានអាយុ១៧ឆ្នាំ ជនជាតិខ្មែរ មានទីលំនៅភូមិត្រពាំងធំ ឃុំ ស្រឡប់ ស្រុកត្បូងឃ្មុំ ខេត្តត្បូងឃ្មុំ ។
ប្រភពដដែលបន្តថា ជនរងគ្រោះនិងម្ដាយរួមទាំងបងស្រីបានចាកចេញពីស្រុកកំណើតនៅខេត្តត្បូងឃ្មុំ មកស្នាក់នៅផ្ទះជួលក្នុងភូមិស្វាយជ្រំ ឃុំ ស្វាយជ្រំ ដើម្បីធ្វើសំណង់ក្នុងបុរីចតុមុខ ឯជនសង្ស័យក៏មកស្នាក់នៅផ្ទះជួលដើម្បីធ្វើសំណង់ក្នុងបុរីចតុមុខនោះដែរ ដោយមានបន្ទប់ស្នាក់នៅក្បែរគ្នា។នៅក្នុងអំឡុងខែមិថុនា ឆ្នាំ២០២០វេលាម៉ោង១០និង០០នាទី ជនសង្ស័យបានចូលទៅក្នុងបន្ទប់ជួលជនរងគ្រោះ ពេលនោះ ជនសង្ស័យបាននិយាយលែបខាយពាក្យសម្តីថា «អញសុំបឺតមាត់និងឱបមួយ» តែជនរងគ្រោះមិនឆ្លើយតបទេ រួចរត់ចេញពីបន្ទប់មកក្រៅ ។ ក្រោយមកប្រាប់ម្តាយដែរ តែម្តាយមិនប្តឹងសមត្ថកិច្ចទេព្រោះគិតថាមិនបានប៉ះពាល់ផង។លុះមកដល់ថ្ងៃទី៣០ ខែកក្កដាឆ្នាំ២០២០ វេលាម៉ោង៦និង៣០នាទី
ខណៈបងស្រីបង្កើតជនរងគ្រោះចេញទៅធ្វើការ ទុកជនរងគ្រោះឲ្យដេកនៅជាមួយក្មួយដោយបិទទ្វារបន្ទប់តែមិនបានដាក់គន្លឹះទ្វារទេ។លុះមកដល់ម៉ោង៧និង០០នាទីជនសង្ស័យបានរុញទ្វារបន្ទប់ចូលក្នុងបន្ទប់ជនរងគ្រោះរួចស្ទុះទៅចាប់រំលោភជនរងគ្រោះ ហើយជនរងគ្រោះខំស្រែកឱ្យគេជួយដែរតែស្រែកមិនរួចឡើយព្រោះជនសង្ស័យបាន យកដៃទៅខ្ទប់មាត់រួចធ្វើសកម្មភាពរំលោភរហូតបានសម្រេច។ ពេលរំលោភរួច ជនសង្ស័យបានដើរចេញទៅបន្ទប់របស់ខ្លួន។ បន្ទាប់មកជនរងគ្រោះបានទូរស័ព្ទប្រាប់បងស្រីរបស់ខ្លួន ហើយបងស្រី,ម្តាយ និងបងថ្លៃប្រុសបានជិះម៉ូតូមកកន្លែងកើតធ្វើការឃាត់ជនសង្ស័យនិងរាយការណ៍ជូននគរបាលប៉ុស្តិ៍ស្វាយជ្រំដើម្បីចាត់ការតាមច្បាប់។
ភ្លាមនោះ កម្លាំងប៉ុស្តិ៍ស្វាយជ្រំបានឃាត់ខ្លួនជនសង្ស័យបញ្ជូនទៅអធិការដ្ឋាននគរបាលស្រុក ដើម្បីចាត់ការបន្តតាមនីតិវិធី៕
ដោយ៖ ស្អាងជ័យ
