អន្តរជាតិ៖ កាលពីថ្ងៃទី២៥ ខែសីហាម្សិលមិញនេះ ស្ត្រីអូស្រ្តាលីម្នាក់ ត្រូវបានអាជ្ញាធរដាក់ទោសឲ្យជាប់គុករហូតដល់៦ខែ ក្រោយបំពានច្បាប់ចត្តាឡីស័ក COVID-19។ ហើយស្ត្រីរូបនេះជាមនុស្សទី៤ហើយ ដែលត្រូវជាប់គុកដោយសារការបំពានច្បាប់នេះ ក្នុងប្រទេសអូស្ត្រាលី ។
សូមជម្រាបថា ស្ត្រីរូបនេះឈ្មោះ Asher Faye Vander Sanden មានអាយុ២៨ឆ្នាំ បានចំណាយពេលមួយខែក្នុងរដ្ឋ Victoria ដែលរងគ្រោះខ្លាំងបំផុតដោយសារជំងឺរាតត្បាតសកល COVID-19 ។ នាងត្រូវបានអនុញ្ញាតឲ្យធ្វើដំណើរតាមយន្តហោះមកកាន់ផ្ទះរបស់នាងវិញ ក្នុងរដ្ឋPerth ភាគខាងលិចនៃប្រទេសអូស្ត្រាលី ហើយត្រូវធ្វើចត្តាឡីស័កក្នុងសណ្ឋាគារ១៤ថ្ងៃ ដោយចាយលុយខ្លួនឯង ។ ក៏ប៉ុន្តែ នាងបែរជាបានធ្វើដំណើរស្ងាត់ៗដោយលាក់ខ្លួនក្នុងរថយន្តធុនធំមួយ ហើយនាងបានទៅស្នាក់នៅផ្ទះរបស់ឪពុកម្ដាយនាង។
ក្រោយមក នាងត្រូវបានប៉ូលីសចាប់ខ្លួននៅក្នុងផ្ទះនេះ នៅរដ្ឋភាគខាងលិចនៃប្រទេសអូស្ត្រាលី មនុស្សដែលត្រូវបានរកឃើញថា បំពានច្បាប់ចត្តាឡីស័ក ប្រឈមជាប់គុករហូតដល់១២ខែ ឬបង់ពិន័យជាលុយរហូតដល់៥ម៉ឺនដុល្លារ។
បើតាមសារព័ត៌មាន BBC បានចេញផ្សាយនៅថ្ងៃទី២៦ ខែសីហានេះ មេធាវីរបស់នាង Vander Sanden លោក John Hammond បានអះអាងថា កូនក្តីលោកបានធ្វើដំណើរទៅកាន់រដ្ឋ Victoria ដើម្បីមើលថែប្អូនស្រីនាងដែលមិនស្រួលខ្លួន តែបានសម្រេចត្រលប់មកវិញព្រោះនាងមិនអាចជួយអ្វីបានច្រើន។ មេធាវីរូបនេះបន្តទៀតថា នាង Sanden បានធ្វើចត្តាឡីស័កខ្លួនឯងក្នុងផ្ទះរបស់ឪពុកម្ដាយនាង ហើយពុំមានប៉ះពាល់ជាមួយនរណាផ្សេងឡើយ។
ជាក់ស្តែងរដ្ឋមួយចំនួនរបស់អូស្ត្រាលី បានអនុវត្តវិធានការរឹតត្បិតតឹងរ៉ឹងលើការឆ្លងព្រំដែនរវាងរដ្ឋនិងរដ្ឋ ក្រោយករណី COVID-19 បានស្ទុះឡើងជាថ្មី។ តែក៏មានករណីលើកលែងដូចករណីនាង Vander Sanden ។ ច្បាប់តឹងរ៉ឹងទាំងនេះ បានបង្ខំឲ្យប្រជាជនអូស្ត្រាលីរាប់ពាន់នាក់ជាប់គាំង ខណៈអ្នកខ្លះមិនអាចសូម្បីតែចូលរួមពិធីបុណ្យសពមនុស្សដែលពួកគេស្រលាញ់។
គួរបញ្ជាក់ថា រហូតមកដល់បច្ចុប្បន្ននេះ យ៉ាងហោចណាស់មនុស្ស៣នាក់ផ្សេងទៀត ត្រូវបានដាក់ទោសឲ្យជាប់គុកសម្រាប់ការល្មើសច្បាប់ចត្តាឡីស័ក។ តួយ៉ាង ក្នុងខែមេសាកន្លងទៅ បុរសអូស្ត្រាលីឈ្មោះ Jonathan David ត្រូវបានដាក់ទោសឲ្យជាប់គុក៦ខែ និង២សប្តាហ៍ក្រោយចាកចេញពីសណ្ឋាគារដែលជាកន្លែងធ្វើចត្តាឡីស័ក ទៅកាន់ផ្ទះមិត្តស្រីខ្លួន៕ ដោយ៖ស តារា
