ខេត្តព្រះសីហនុ៖ នៅថ្ងៃទី០៨ ខែកញ្ញា ឆ្នាំ២០២០នេះ រដ្ឋបាលខេត្តព្រះសីហនុ បានចេញសេចក្ដីជូនដំណឹង ស្ដីពីការសាងសង់បណ្ដាញលូរណប ទឹកកខ្វក់ និងលូទឹកភ្លៀង នៅតាមបណ្ដោយផ្លូវទាំង៣៤ខ្សែ ក្នុងខេត្តព្រះសីហនុ។
បើតាមការបញ្ជាក់នៅក្នុងសេចក្ដីជូនដំណឹងរបស់រដ្ឋបាលខេត្តព្រះសីហនុ ថា៖ ប្រជាពលរដ្ឋ និងអាជីវករទាំងអស់ដែលកំពុងរស់នៅ និងធ្វើអាជីវកម្មនៅតាមបណ្ដោយផ្លូវទាំង៣៤ខ្សែ សូមអញ្ជើញមកដាក់ពាក្យស្នើសុំសាងសង់ បណ្ដាញលូរណប ទឹកកខ្វក់ និងលូទឹកភ្លៀង នៅមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តព្រះសីហនុ រៀងរាល់ម៉ោងធ្វើការចាប់ពីថ្ងៃជូនដំណឹង នេះតទៅ។
សូមជម្រាបថា ចំពោះការសាងសង់បណ្ដាញលូ ប្រជាពលរដ្ឋ និងអាជីវករទាំងអស់ ត្រូវចូលរួបបង់វិភាគ ទានជាថវិកាទៅតាមទំហំក្បាលដីមានដូចជា៖ ទី១៖ លំនៅឋានប្រជាពលរដ្ឋត្រូវបង់វិភាគទានជាថវិកា ទៅតាមទំហំក្បាលដីក្នុង ១ម៉ែត្រ តម្លៃ៥៨ដុល្លារ ។ និងទី២៖ ទីតាំងអាជីវកម្មសណ្ឋាគារ ផ្ទះសំណាក់ ធនាគារ ផ្សារទំនើប ភោជនីយដ្ឋាន អាហារដ្ឋាន កន្លែងលាង រថយន្ត និងអាជីវកម្មនានា ត្រូវបង់វិភាគទានជាថវិកា ទៅតាមទំហំក្បាលដី ក្នុង១ម៉ែត្រ តម្លៃ៨០ដុល្លារ។
គួរបញ្ជាក់ដែរថា ប្រជាពលរដ្ឋ និងម្ចាស់អាជីវកម្ម នៅតាមបណ្ដោយផ្លូវទាំង៣៤ខ្សែ ក្នុងខេត្តព្រះសីហនុ មានចម្ងល់ក្នុងការតបណ្ដាញលូសូមទំនាក់ទំនងមកលោក ហង្ស ភិរក្ស ដែលមានលេខទូរស័ព្ទ ០១២ ៥០៥ ១៦៨ ឬមកទំនាក់ទំនងផ្ទាល់ជាមួយមន្ត្រីជំនាញ នៅមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ព្រះសីហនុ៕ដោយ៖ស តារា
