អន្តរជាតិ៖ កាលពីថ្ងៃទី១ ខែតុលា ឆ្នាំ២០២០ ក្រុមមេធាវីសិទ្ធិមនុស្សមួយ បានដាក់ពាក្យបណ្តឹងប្រឆាំងរដ្ឋបាលអាមេរិករបស់ប្រធានាធិបតី ដូណាល់ ត្រាំ ជុំវិញការដាក់ទណ្ឌកម្មសេដ្ឋកិច្ច និងទិដ្ឋាការលើមន្ត្រីនៃតុលាការព្រហ្មទណ្ឌអន្តរជាតិ (ICC) ខណៈដែលពួកគេ អះអាងថាទណ្ឌកម្មខាងលើគឺជាការរំលោភរដ្ឋធម្មនុញ្ញអាមេរិក។
ជាក់ស្តែងស្ថាប័ន Open Society Justice Initiative ដែលជាមជ្ឈមណ្ឌលជំនាញលើបទល្មើសសង្គ្រាម បានដាក់ពាក្យបណ្តឹងទៅតុលាការទីក្រុងញ៉ូវយក ប្រឆាំងលោកប្រធានាធិបតី ដូណាល់ ត្រាំ រដ្ឋមន្ត្រីការបរទេសម៉ៃ ប៉ុមប៉េអូ និងសមាជិក៧រូបផ្សេងទៀតក្នុងរដ្ឋបាលលោកត្រាំ ចំពោះការដាក់ទណ្ឌកម្មលើមន្ត្រី ICC ។
ចំណែកលោក ប៉ុមប៉េអូ កាលពីថ្ងៃទី២ ខែកញ្ញាកន្លងទៅ បានដាក់ទណ្ឌកម្មផ្នែកទិដ្ឋាការលើលោកស្រី Fatou Bensouda អគ្គរដ្ឋអាជ្ញានៃតុលាការព្រហ្មទណ្ឌអន្តរជាតិ និងមន្ត្រីជាន់ខ្ពស់មួយរូបទៀត។ មេធាវីសិទ្ធិមនុស្សខាងលើ អះអាងថា បញ្ជាប្រតិបត្តិរបស់ប្រធានាធិបតី ត្រាំដែលអនុញ្ញាតឲ្យដាក់ទណ្ឌកម្មលើតុលាការ បំពានសិទ្ធិធម្មនុញ្ញ ដែលរួមមានសេរីភាពក្នុងការបញ្ចេញមតិ និងរារាំងដើមបណ្តឹងមិនឲ្យចូលរួមគាំទ្រការងារយុត្តិធម៌អន្តរជាតិ។
មិនមែនលោកស្រី Bensouda ឡើយ ក្នុងខែមិថុនា កន្លងទៅ រដ្ឋបាលរបស់លោក ត្រាំ សម្រេចដាក់ទណ្ឌកម្មសេដ្ឋកិច្ច និងទិដ្ឋាការទៅលើមន្ត្រីតុលាការអន្តរជាតិដែលមានស្នាក់ការនៅទីក្រុងឡាអេ និងបុគ្គលទាំងឡាយណាដែលគាំទ្រកិច្ចការរបស់តុលាការ ដោយ ជាប់ពាក់ព័ន្ធទៅនឹងការស៊ើបអង្កេតបទល្មើសសង្គ្រាមរបស់ទាហានអាមេរិក នៅអាហ្វហ្កានីស្ថានពីឆ្នាំ២០០៣ ដល់២០១៤។ ទណ្ឌកម្មខាងលើរួមមានការបង្កកទ្រព្យសម្បត្តិ ចំពោះបុគ្គលរូបណាដែលស៊ើបអង្កេត ឬកាត់ទោសពលរដ្ឋអាមេរិកដោយគ្មានការយល់ព្រមពីរដ្ឋាភិបាលអាមរិក និងរារាំងមិនឲ្យបុគ្គល និងគ្រួសាររបស់គេចូលទឹកដីអាមេរិក។
នាយកប្រតិបត្តិរបស់ Open Society Justice Initiative លោក Jame Goldston ក៏បានលើកឡើងក្នុងសេចក្ដីប្រកាសកាលពីថ្ងៃទី១ ខែតុលាថ្មីៗនេះ បាននិយាយថា៖ «ដោយចេញបញ្ជាដ៏ធ្ងន់ធ្ងរ និងមិនធ្លាប់មាន រដ្ឋបាលរបស់លោក ត្រាំ កំពុងក្បត់ទៅនឹងការគាំទ្ររបស់អាមេរិកចំពោះយុត្តិធម៌អន្តរជាតិ ដោយមិនខ្វល់ពីសម្ព័ន្ធមិត្ត និងបំពានធម្មនុញ្ញអាមេរិក»។ នេះបើតាមការផ្សាយដោយទីភ្នាក់ព័ត៌មាន Reuters។
បន្ថែមពីនេះលោក Goldston បានបញ្ជាក់ទៀតថា ស្ថាប័នរបស់លោកប្តឹងទៅតុលាការអាមេរិកដើម្បី បញ្ចប់ការវាយប្រហារទៅលើស្ថាប័នយុត្តិធម៌អន្តរជាតិ និងជនរងគ្រោះដែលស្ថាប័ននេះបម្រើការឲ្យ។
គួរបញ្ជាក់ថា តុលាការព្រហ្មទណ្ឌអន្តរជាតិ ប្រតិកម្មថា វិធានការទាំងអស់នោះជាការវាយប្រហារតុលាការ ប្រព័ន្ធយុត្តិធម៌ព្រហ្មទណ្ឌពិភពលោក និងនីតិរដ្ឋជាទូទៅ។ ចំណែកសហភាពអឺរ៉ុប និងក្រុមការពារសិទ្ធិមនុស្ស រិះគន់ និងជំទាស់ទណ្ឌកម្មអាមេរិក ដោយអះអាងថាវាប៉ះពាល់ដល់កិច្ចខំប្រឹងប្រែងក្នុងការទាមទារយុត្តិធម៌ ក្នុងបទល្មើសសង្គ្រាម៕ដោយ៖ស តារា
