អន្តរជាតិ៖ ភោជនីយដ្ឋាន២កន្លែងនៅប្រទេសសិង្ហបុរី បន្ទាប់ពីល្មើសក្នុងការគោរពតាមវិធានការទប់ស្កាត់ការរាលដាលជំងឺកូវីដ-១៩របស់រដ្ឋាភិបាល ក៏ត្រូវអាជ្ញាធរសិង្ហបុរីបញ្ជាឲ្យបិទទ្វារបណ្ដោះអាសន្ន ។ ក្រោយចុះបិទទីតាំងខាងលើនេះ រដ្ឋាភិបាលសិង្ហបុរី បន្តអំពាវនាវឲ្យពលរដ្ឋខ្លួនគោរពគម្លាតសុវត្ថិភាព និងពាក់ម៉ាសគ្រប់ពេលវេលា។
បើតាមការចុះផ្សាយរបស់ទូរទស្សន៍សិង្ហបុរី Channel NewsAsia ករណីនេះ កើតឡើងកាលពីវេលាម៉ោង៩យប់នៅថ្ងៃទី៣ ខែតុលាកន្លងទៅ ដោយភោជនីយដ្ឋានដែលល្មើសវិធានការសុខាភិបាលទីមួយ គឺជាហាងលក់ស៊ុបមួយកន្លែង ដែលបណ្ដោយឲ្យអតិថិជនអង្គុយជាប់គ្នារដឹក។ ហើយអាជ្ញាធរបានដាក់ចេញបញ្ជាឲ្យម្ចាស់ហាងនេះ បិទអាជីវកម្មខ្លួនរយៈពេល១០ថ្ងៃពេញ រាប់ចាប់ពីថ្ងៃទី ៦ ដល់ថ្ងៃទី ១៥ ខែតុលា។
ជាក់ស្តែងនៅថ្ងៃជាមួយគ្នានោះ ករណីល្មើសវិធានការសុខាភិបាលមួយទៀត បានកើតឡើងក្នុងហាងលក់ផឹកស៊ីមួយកន្លែងទៀត ដែលអតិថិជននាំគ្នាផឹកស្រារហូតដល់ថ្ងៃម៉ោង១១ និង៤០នាទីយប់ដដែរ ដោយគ្មានគោរពគម្លាតសុវត្ថិភាព។ ខណៈអាជ្ញាធរសិង្ហបុរី ក៏បានបញ្ជាឲ្យបិទទ្វារហាងនេះ១០ថ្ងៃផងដែរ។
សូមជម្រាបថា ក្រៅពីភោជីយដ្ឋានទាំង២កន្លែងខាងលើ ហាងលក់ចំណីអាហារនិងភេសជ្ជតូចៗប្រមាណ១៣កន្លែងផ្សេងទៀត ក៏ត្រូវរងពិន័យដោយសារល្មើសវិធានការសុខាភិបាលទប់ស្កាត់ការរាលដាលជំងឺកូវីដ-១៩ផងដែរ។ បន្ទាប់ពីហាងទាំងនេះ រងពិន័យជាលុយរហូតចាប់ពីថ្ងៃ៧៣៥ដុល្លារដល់ ១៤៧០ដុល្លារ។
គួរបញ្ជាក់ថា ទាក់ទិននឹងបញ្ហានេះរដ្ឋាភិបាលសិង្ហបុរី បន្តអំពាវនាវឲ្យពលរដ្ឋខ្លួនគោរពគម្លាតសុវត្ថិភាព និងពាក់ម៉ាសគ្រប់ពេលវេលាជាពិសេសនៅកន្លែងមានមនុស្សច្រើន។ ព្រោះបច្ចុប្បន្ន សិង្ហបុរីមានករណីឆ្លងកូវីដ-១៩សរុប ៥៧៨១៩ ករណី ក្នុងនោះ ៥៧៥៩៧នាក់ជាសះស្បើយ ខណៈ២៧នាក់ស្លាប់៕ដោយ៖ស តារា
