អន្តរជាតិ៖ យោងតាមរបាយការណ៍របស់ អង្គការសហប្រជាជាតិ (UN) ចេញរួមគ្នារបស់អង្គការ UNICEF, អង្គការសុខភាពពិភពលោក(WHO) និងធនាគារពិភពលោក បាននិយាយថា៖ ទារកជិត២លាននាក់ បានស្លាប់ក្នុងផ្ទៃម្តាយជារៀងរាល់ឆ្នាំដែលស្មើនឹងមួយករណីក្នុងរយៈពេល១៦វិនាទី។ ជាក់ស្តែងក្នុងរបាយការណ៍នៅថ្ងៃទី៨ ខែតុលា UN ក៏បានព្រមានថា ការរាលដាលជំងឺ COVID-19 អាចបន្ថែមការស្លាប់ចំនួន២០ម៉ឺននាក់ផ្សេងទៀត ដែលធ្វើឲ្យទារកស្លាប់ក្នុងផ្ទៃកើនដល់២លាននាក់។
របាយការណ៍ដដែល បន្តថា ភាគច្រើននៃការស្លាប់របស់ទារកក្នុងផ្ទៃម្តាយមានចំនួន៨៤ភាគរយ កើតឡើងនៅក្នុងប្រទេសដែលមានប្រាក់ចំណូលទាប និងមធ្យម។ ក្នុងប្រទេសទាំងនេះ បើតាមរបាយការណ៍ដដែល ការថែរក្សាសុខភាពទារកទើបនឹងកើត អាចជួយសង្គ្រោះជីវិតរាប់រយរាប់ពាន់នាក់ក្នុងមួយឆ្នាំៗ។
បើតាមការផ្សាយរបស់ទីភ្នាក់ងារព័ត៌មាន AFP ដកស្រង់តាមរបាយការណ៍បីស្ថាប័ន ដោយអះអាងថា ការស្លាប់ភាគច្រើនកើតឡើងដោយសារសេវាកម្មសុខាភិបាលទន់ខ្សោយ ខ្វះជំនាញ ព្រមទាំងខ្វះការវិនិយោគលើឧបករណ៍និងការបណ្តុះបណ្តាលឆ្មប។ លើសពីនេះទៅទៀត ខណៈអត្រាសាកលនៃការស្លាប់របស់មាតា និងទារកថយចុះ អត្រាទារកដែលស្លាប់ក្នុងផ្ទៃម្តាយនៅតែបន្តពិបាកក្នុងការកាត់បន្ថយជាពិសេសនៅទូទាំងអនុតំបន់សាហារ៉ាអាហ្វ្រិក និងអាស៊ីអាគ្នេយ៍។
ទាក់ទិននឹងបញ្ហានេះអ្នកស្រី Henrietta Fore នាយកប្រតិបត្តិនៃអង្គការ UNICEF ក៏បាននិយាយដែរថា ការបាត់បង់កូននៅពេលកើតឬអំឡុងពេលមានផ្ទៃពោះ ជាសោកនាដកម្មដ៏ធ្ងន់ធ្ងរមួយសម្រាប់គ្រួសារមួយ។ អ្នកស្រីបន្តថា ជារឿយៗរឿងបែបនេះ ត្រូវបានស៊ូទ្រាំដោយស្ងាត់ស្ងៀម ហើយវាកើតឡើងជាញឹកញាប់នៅជុំវិញពិភពលោក។
លើសពីនេះអ្នកស្រី Henrietta Fore បានសង្កត់ធ្ងន់ថា៖ «លើសពីការបាត់បង់ជីវិត ការចំណាយខាងផ្លូវចិត្តនិងហិរញ្ញវត្ថុសម្រាប់ស្ត្រី ក្រុមគ្រួសារ និងសង្គមធ្ងន់ធ្ងរ និងយូរអង្វែង។ សម្រាប់ម្តាយជាច្រើន រឿងនេះ មិនគួរកើតឡើយ។»
ជាមួយគ្នានោះ របាយការណ៍ខាងលើ ក៏បានព្រមានថា ជំងឺរាតត្បាត COVID-19 អាចបណ្តាលឱ្យមានចំនួនទារកស្លាប់ក្នុងផ្ទៃកើនឡើងជិត២០ ម៉ឺននាក់បន្ថែម ក្នុងករណីគេសន្មតថា៥០ភាគរយនៃសេវាសុខាភិបាលក្នុងប្រទេសមានប្រាក់ចំណូលទាប និងមធ្យម រងផលប៉ះពាល់ដោយសារការឆ្លើយតបទៅនឹង COVID-19 នោះ។
គួរបញ្ជាក់ថា នៅទូទាំងពិភពលោកជាង ៤0ភាគរយនៃការស្លាប់របស់ទារកក្នុងផ្ទៃនៅតែកើតមានអំឡុងពេលសម្រាល។ បញ្ហាទាំងនេះ ក៏អាចបញ្ចៀសបានតាមរយៈការទទួលបានឆ្មបដែលបានបណ្តុះបណ្តាល និងការថែទាំសម្ភពបន្ទាន់៕ដោយ៖ស តារា
