ខេត្ដបាត់ដំបង៖ កាលពីថ្ងៃទី១០ ខែកុម្ភៈកន្លងទៅថ្មីៗនេះកម្លាំងចម្រុះបាន ចុះកាប់ទម្លាយទំនប់ព្រែកបាក់ស្នោ ដែល ឈ្មួញម្នាក់បានទប់បូមយកត្រីនោះ ហើយ បានដោះលែងត្រីដោយជោគជ័យដែល ប្រតិបត្ដិការនេះដឹកនាំដោយលោក អភិបាលរងស្រុកមោងឫស្សីគឹម ស៊ា ។
សកម្មភាពបង្ក្រាបនេះត្រូវបានប្រជាពលរដ្ឋសាទរយ៉ាងខ្លាំង ប៉ុន្ដែតាមប្រភព ពីប្រជានេសាទជាលក្ខណៈគ្រួសារនៅ តំបន់នោះបានបញ្ជាក់ប្រាប់ នៅថ្ងៃទី១២ ខែកុម្ភៈ ឆ្នាំ២០១៦ថា ពួកគាត់នៅតែ ពុំទាន់មានជំនឿមួយរយភាគរយទៅលើការបង្ក្រាបនេះនៅឡើយទេ ។ ដោយ ពួកគាត់ចាត់ទុកសកម្មភាពនេះបានត្រឹមតែឆ្ពិនភ្នែកប្រជាពលរដ្ឋនិងអ្នកសារព័ត៌មានប៉ុណ្ណោះមានន័យថាធ្វើមួយចម្អិន កំពឹស ។
គួររំលឹកថា ចំណុចព្រែកបាក់ស្នោជា តំបន់អភិរក្សដ៏ធំមួយដែលសម្បូរទៅ ដោយមច្ឆជាតិចម្រុះតូចធំ ស្ថិតក្នុងឃុំជ្រៃ ស្រុកមោងឫស្សី ខេត្ដបាត់ដំបង ។ កន្លង មកតំបន់មួយនេះបានរងគ្រោះពីសំណាក់ឈ្មួញម្នាក់ឈ្មោះតែ ប៊ុនយីម បានលើក ជាទំនប់យ៉ាងធំ ដើម្បីបូមយកត្រីជារៀង រាល់ឆ្នាំជាលក្ខណៈឯកជន ព្រមជាមួយ គូកនដែលជាមន្ដ្រីជំនាញដទៃទៀតបានយ៉ាងរលូនអស់ជាច្រើនរដូវមកហើយ ដោយសារតែអធិរាជឈ្មួញឈ្មោះ តែ ប៊ុនយីម នេះចេះចែករំលែកលាភសក្ការៈ ដល់ក្រុមមន្ដ្រីជំនាញ ទើបប្រព្រឹត្ដបាន យូរបែបនេះ ។ ដោយសារមើលឃើញពី បញ្ហានេះប្រជាពលរដ្ឋបានខ្សឹបដាក់ ត្រចៀកអ្នកសារព័ត៌មានទើបមានវិធានការបង្ក្រាបយ៉ាងមានប្រសិទ្ធភាពតែម្ដង ។
ទោះបីជាយ៉ាងនេះក្ដីប្រជាពលរដ្ឋ សំណូមពរបន្ថែមដល់លោកច័ន្ទ សុផល អភិបាលនៃគណៈអភិបាលខេត្ដបាត់ដំបង សូមមេត្ដាយកចិត្ដទុកដាក់បន្ដទៅមុខ ទៀត ។
ឆ្លើយតបទៅនឹងក្ដីកង្វល់របស់ប្រជាពលរដ្ឋនេះលោក គឹម ស៊ា អភិបាលរង ស្រុកមោងឫស្សីធ្លាប់បានអះអាងកាលពីថ្ងៃទី១០ ខែកុម្ភៈថា លោកនឹងមិនឱ្យ ឈ្មួញណាម្នាក់មកប្រព្រឹត្ដជាលើកទី២ នៅតំបន់នោះទៀតទេ ទោះបីអ្នកនោះជា នរណាក៏ដោយព្រោះលោកការពារ សម្បត្ដិរួម ។ ដូច្នេះគ្មាននរណាម្នាក់មក ទប់ឃាំងធ្វើជាលក្ខណៈឯកជនបន្ដជាលើកទីពីរឡើយ ហើយលោកក៏សុំឱ្យប្រជាពល រដ្ឋរាយការណ៍ជាបន្ទាន់អំពីសកម្មភាព បទល្មើសនេះបើសិនជាមានបន្ដ ៕
ដោយ៖ វិបុល
