សកម្មភាពរបស់កូរ៉េខាងជើង នាពេលកន្លងមកបង្ហាញឲ្យឃើញថា ទីក្រុងព្យុងយ៉ាង កំពុងតែធ្វើឲ្យខ្លួនកាន់តែវេទនា នៅពេលដែលប្រទេសជិតខាង ដូចជាកូរ៉េខាងត្បូង និងចិនឈប់ផ្តល់ជំនួយស្បៀងអាហារដល់ពលរដ្ឋក្រីក្រក្នុងប្រទេសនេះ ។
នៅពេលនេះ ចិនកំពុងតែរងសម្ពាធយ៉ាងខ្លាំងពីសហគមន៍អន្តរជាតិឲ្យចូលរួមដាក់ទណ្ឌកម្មទៅលើកូរ៉េខាងជើង ក្រោយពេលដែលប្រទេសនេះ បានសាកល្បងគ្រាប់បែកបរមាណូ និងកាំជ្រួចមីស៊ីល បំពានទៅលើទណ្ឌកម្មរបស់សហគមន៍អន្តរជាតិ ។
នៅថ្ងៃទី១៣ ខែកុម្ភៈ ឆ្នាំ២០១៦សភាអាមេរិកបានអនុម័តច្បាប់ដាក់ទណ្ឌកម្មបន្ថែមលើកូរ៉េខាងជើង ។នៅក្នុងការបោះឆ្នោតអនុម័តច្បាប់សភាអាមេរិកមានសំឡេងគាំទ្រការដាក់ទណ្ឌកម្មបន្ថែមរហូតដល់ទៅ408-2 សំឡេង។ នៅពេលនេះច្បាប់បានបញ្ជូនទៅកាន់លោកប្រធានាធិបតីបារ៉ាក់ អូបាម៉ាហើយដើម្បីចុះហត្ថលេខាចូលជាធរមាន។
បណ្តាតំណាងរាស្ត្រអាមេរិកបានបង្ហាញការគាំទ្រទៅលើរដ្ឋាភិបាលទីក្រុងវ៉ាស៊ីនតោន ក្នុងការបង្កើនការដាក់ទណ្ឌកម្មទៅលើកូរ៉េខាងជើងបន្ថែម។ អង្គការសហប្រជាជាតិក៏បានបង្ខំឲ្យរដ្ឋាភិបាលប្រទេសជាច្រើនទៀតក្នុងនោះមានចិនជាដើមដែលជាសម្ពន្ធមិត្តដ៏ជិតស្និទ្ធនឹងកូរ៉េខាងជើង ចូលរួមការដាក់ទណ្ឌកម្មសេដ្ឋកិច្ចទៅលើប្រទេសនេះ ដើម្បីឲ្យទីក្រុងព្យុងយ៉ាងបោះបង់កម្មវិធីបរមាណូនិងកាំជ្រួចមីស៊ីល ជាការគំរាមកំហែងដល់សន្តិសុខក្នុងតំបន់ទាំងមូល។
ការដាក់ទណ្ឌកម្មបន្ថែមនោះរួមមានដៃគូរកស៊ីជាមួយកូរ៉េខាងជើង ទាំងឯកជននិងរដ្ឋ។ កាលពីថ្ងៃទី១០ ខែកុម្ភៈកន្លងទៅ ព្រឹទ្ធសភាអាមេរិកក៏បានអនុម័តច្បាប់ដាក់ទណ្ឌកម្មលើកូរ៉េខាងជើងដោយមានសំឡេងគាំទ្ររហូតដល់ទៅ១០០ភាគរយ។
គោលដៅនៃការដាក់ទណ្ឌកម្មនោះគឺដើម្បីរារាំងរដ្ឋាភិបាលទីក្រុងព្យុងយ៉ាងរកបានប្រាក់ចំណូលច្រើនក្នុងការបង្កើនផលិតគ្រាប់បែកបរមាណូនិងកាំជ្រូចមីស៊ីរយៈចម្ងាយឆ្ងាយអាចបំពាក់ក្បាលគ្រាប់បរមាណូ ។
តាមច្បាប់ដាក់ទណ្ឌកម្មបន្ថែមរបស់អាមេរិក សម្តៅទៅលើបុគ្គលឬក្រុមហ៊ុនឯកជនដែលមានទំនាក់ទំនងពាណិជ្ជកម្មជាមួយកូរ៉េខាងជើង ។ ការដាក់ទណ្ឌកម្មបន្ថែមរបស់អមេរិកក្រោយពេលដែលកូរ៉េខាងជើងបានកាត់ផ្តាច់ទាំងស្រុងនូវទំនាក់ទំនងជាមួយកូរ៉េខាងត្បូងនិងបិទក្រុមហ៊ុនទាំងឡាយនៅតំបន់ឧស្សាហកម្មរួមកេស៊ុង។
ការដាក់ទណ្ឌកម្មនោះក្រោយពេលដែលទីក្រុងព្យុងយ៉ាងឲ្យពលរដ្ឋកូរ៉េខាងត្បូងចាកចេញពីតំបន់ឧស្សាហកម្មកេស៊ុងពេលនេះបានធ្វើឡើងនៅក្នុងសេចក្តីប្រកាសរបស់គណៈកម្មាធិការដើម្បីបង្រួបបង្រួមកូរ៉េដោយសន្តិវិធីរបស់កូរ៉េខាងជើង។ នៅក្នុងសេចក្តីប្រកាសនោះកូរ៉េខាងជើងបានតម្រូវឲ្យពលរដ្ឋកូរ៉េខាងត្បូងគ្រប់រូបវេចបង្វេចចេញពីតំបន់កែស៊ុងឲ្យបានមុនម៉ោង៥ល្ងាច ម៉ោងនៅក្នុងប្រទេសកូរ៉េខាងត្បូងនិងអនុញ្ញាតឲ្យយកតែរបស់របរផ្ទាល់ខ្លួនទៅជាមួយ។ ទន្ទឹមគ្នានោះកូរ៉េខាងជើងក៏បានប្រាប់ឲ្យដឹងពីការរឹបអូសប្រមូលយកទ្រព្យសម្បត្តិទាំងអស់ រួមទាំងគ្រឿងម៉ាស៊ីននិងសម្ភារផ្សេងៗរបស់ពលរដ្ឋកូរ៉េខាងត្បូងដែលមាននៅក្នុងតំបន់កេស៊ុងនោះ។
សេចក្តីប្រកាសបានបន្ថែមថាចាប់ពីថ្ងៃនេះតទៅតំបន់ឧស្សាហកម្មកេស៊ុងនឹងក្លាយជាតំបន់យោធាព្រមទាំងប្រកាសព្យួរចោលរាល់បណ្តាញទូរគមនាគមន៍យោធារវាងបងប្អូនគូសត្រូវទាំង២ដោយគ្មានកំណត់រយៈពេល ។ ការប្រើធម៌ក្តៅរបស់កូរ៉េខាងជើងពេលនេះគឺដើម្បីឆ្លើយតបនឹងចំណាត់ការរបស់កូរ៉េខាងត្បូងដែលបានសម្រេចចិត្តបិទទ្វារតំបន់កេស៊ុងតែម្នាក់ឯង។ ទីក្រុងសេអ៊ូលបានលើកយកហេតុផលថាទង្វើរបស់ខ្លួនមានគោលដៅដាក់ទណ្ឌកម្មលើក្រុងព្យុងយ៉ាងដែលបានធ្វើការបាញ់សាកល្បងនុយក្លេអ៊ែរនិងមីស៊ីលអន្តរទ្វីបនាពេលកន្លងទៅ។
សូមជម្រាបជូនថា តំបន់ឧស្សាហកម្មកេស៊ុង (Kaesong Industrial Complex) ដែលស្ថិតក្នុងទឹកដីកូរ៉េខាងជើងត្រូវបានសាងសង់ឡើងដោយកូរ៉េខាងត្បូងកាលពីឆ្នាំ២០០២ដើម្បីធ្វើជាស្ពានចម្លងរវាងបងប្អូនបង្កើតគូសត្រូវទាំងពីរ។តំបន់ឧស្សាហកម្មមួយនេះ មានសុទ្ធតែក្រុមហ៊ុន និងរោងចក្រសហគ្រាសរបស់កូរ៉េខាងត្បូងសរុប១២៤ ក្រុមហ៊ុន និងបានផ្តល់ការងារឲ្យពលរដ្ឋកូរ៉េខាងជើងប្រមាណជា៥៤.០០០នាក់។ក្នុងមួយឆ្នាំៗរបបកុម្មុយនីស្តក្រុងព្យុងយ៉ាងទទួលបានប្រាក់ចំណូលពីតំបន់កេស៊ុងជាច្រើនលានដុល្លា៕
ប្រែសម្រួល៖ ម៉ែវ សាធី
