អន្តរជាតិ៖ លោក Tedros Adhanom Ghebreyesus អគ្គនាយកអង្គការសុខភាពពិភពលោក WHO បានបញ្ជាក់ថា បន្ទាប់ពីលោក បានប៉ះពាល់អ្នកផ្ទុកជំងឺ COVID-19 ពេលនេះកំពុងដាក់ខ្លួនឯងនៅដោយឡែក។ ប៉ុន្តែលោកប្រមុខ WHOរូបនេះ អះអាងថា លោកមិនមានរោគសញ្ញាអ្វីនោះទេ។
លោក Tedros Adhanom Ghebreyesus សរសេរបញ្ជាក់នៅលើបណ្ដាញសង្គម Twitter នៅយប់ថ្ងៃទី១ ខែវិច្ឆិកាម្សិលមិញនេះថា៖«ខ្ញុំត្រូវបានកំណត់ថា ជាអ្នកប៉ះពាល់បុគ្គលម្នាក់ដែលត្រូវបានធ្វើតេស្តចេញលទ្ធផលវិជ្ជមានជំងឺ COVID-19។»។ លោកបន្តថា លោកមានសុខភាពល្អធម្មតា គ្មានរោគសញ្ញា ហើយត្រូវធ្វើចត្តាឡីស័កតាមការណែនាំរបស់ WHO និងបន្តបំពេញការងារពីផ្ទះ។
អគ្គនាយក WHO បានសង្កត់ធ្ងន់នៅលើ Twitter ដដែលពីសារសំខាន់នៃការអនុវត្តតាមវិធានសុខាភិបាល។ លោកពន្យល់ថា ការធ្វើបែបនេះជាការបំបែកច្រវាក់ចម្លង COVID-19 និងទប់ស្កាត់វីរុស និងការពារប្រព័ន្ធសុខាភិបាលផង។
សូមជម្រាបថា លោកប្រមុខ WHO ដែលជាមន្ត្រីជួរមុខក្នុងការទប់ទល់ជំងឺរាតត្បាសាកលCOVID-19 ដែលបានឆ្លងលើមនុស្សច្រើនជាង៤៦លាននាក់ ដោយក្នុងនោះជិត១លាន២សែននាក់ បានបាត់បង់ជីវិត។
គួរបញ្ជាក់ថា បច្ចុប្បន្នសហរដ្ឋអាមេរិក នៅតែឈរលេខរៀងទីមួយតារាងប្រទេសមានករណីឆ្លងច្រើនជាងគេ ដោយមានអ្នកឆ្លងសរុបជាង៩លាន៤សែននាក់ និងស្លាប់ជាង២៣ម៉ឺននាក់។ ករណីឆ្លងនៅអឺរ៉ុប ក៏កាន់តែធ្ងន់ធ្ងរ ដោយប្រទេសជាច្រើនចាប់ផ្ដើមបិទប្រទេសឡើងវិញមានអង់គ្លេស និងបារាំងជាដើម៕ដោយ៖ស តារា
