ខេត្តសៀមរាប៖ សមត្ថកិច្ចនគរបាល ព្រហ្មទណ្ឌកម្រិតស្រាល នៃស្នងការដ្ឋានខេត្ត សហការជាមួយអធិការនគរបាលក្រុងដឹកនាំដោយលោក ភឹង ចិន្តារ៉េត នាយនគរបាលកម្រិត និងសម្របសម្រួលដោយលោក កើត វណ្ណារ៉េត ព្រះរាជអាជ្ញា បានចាប់ឃាត់ខ្លួនមេល្បែងស៊ីសង (អាប៉ោង) ប្រុស ស្រី ចំនួន២នាក់ព្រមទាំងដកហូតវត្ថុតាងបញ្ជូនទៅតុលាការ ដើម្បីមានវិធានការតាមច្បាប់ នៅថ្ងៃទី១៧ខែកុម្ភៈនេះ។
ហេតុការណ៍ចុះបង្ក្រាបបទល្មើសល្បែងស៊ីសងខុសច្បាប់(អាប៉ោង)ធ្វើឡើង កាលពីថ្ងៃទី១៦ខែកុម្ភៈឆ្នាំ២០១៦ ស្ថិតនៅភូមិបន្ទាយស្រី ឃុំខ្នារសណ្តាយ ស្រុកបន្ទាយស្រី ខេត្តសៀមរាប។
លោកវរសេនីយ៍ឯក ភឹង ចិន្តារ៉េត នាយការិយាល័យនគរបាលព្រហ្មទណ្ឌកម្រិតស្រាល បានប្រាប់ ឱ្យដឹងថា ដោយយោងតាមបទបញ្ជាពីលោកឧត្តមសេនីយទោ សត ណាឌី ស្នងការខេត្តសៀមរាប បានបញ្ជាឱ្យកម្លាំងក្រោមឱវាទចុះបង្ក្រាបទីតាំងល្បែងអាប៉ោងដែលបើកលេងដោយខុសច្បាប់ នៅក្នុងស្រុកបន្ទាយស្រី ខេត្តសៀមរាបឱ្យអស់ ដើម្បីឱ្យស្របតាមគោលនយោបាយភូមិឃុំមានសុវត្ថិភាព ។ លោកបានបន្តទៀតថា មេអាប៉ោងប្រុសស្រីទាំង២នាក់ដែលត្រូវកម្លាំងជំនាញធ្វើការឃាត់ខ្លួននោះមានទី១/ឈ្មោះ ព្រូ ហ៊ីង ភេទស្រីអាយុ៥៥ឆ្នាំមានទីលំនៅភូមិបន្ទាយស្រី ឃុំខ្នារសណ្តាយ ស្រុកបន្ទាយស្រី ខេត្តសៀមរាប ទី២/ឈ្មោះ ទូច ឈាន ភេទប្រុស អាយុ៥៤ឆ្នាំរស់នៅភូមិត្បែង ឃុំត្បែង ស្រុកបន្ទាយស្រី ខេត្តសៀមរាប ។
លោកបានបញ្ជាក់ថា ក្រោយពីកម្លាំងជំនាញបានធ្វើការឃាត់ខ្លួននិងនាំយកមកសួរ ព្រមទាំងដកហូតបានវត្ថុតាងរួមមានៈ មេអាប៉ោងចំនួន៣ ចានអាប៉ោងចំនួន១ គម្របអាប៉ោង១ ក្រដាសគូរលេខ១ដល់លេខ៦ សម្រាប់ឱ្យគេចាក់អាប៉ោង ១សន្លឹក តុ១ ម៉ូតូម៉ាកវ៉េវ ពណ៌ក្រហមរបស់មេអាប៉ោងចំនួន១គ្រឿង។ បច្ចុប្បន្ន មេអាប៉ោង ប្រុស ស្រី ចំនួន២នាក់ត្រូវបានកម្លាំងជំនាញរៀបចំសំណុំរឿងបញ្ជូនទៅតុលាការ នៅរសៀលថ្ងៃទី១៧ ខែកុម្ភៈ ឆ្នាំ២០១៥ ដើម្បីចាត់ការតាមច្បាប់។
គួររំលឹកផងដែរថា បនល្បែងស៊ីសង នៅតំបន់ទេសចរណ៍ កើតមានគួរឲ្យព្រួយបារម្ភកើតមានចោរកម្ម ដែលល្បែងទាំងនោះជ្រកក្រោមស្លាក ឆ្នោតជាតិ ។ បនល្បែងទាំងនោះ ភាគច្រើនជារបស់ សមត្ថកិច្ច និងកាងដោយមន្ដ្រីសមត្ថកិច្ច។ ជាក់ស្ដែងនៅខាងក្រោយផ្សារលើធំថ្មីផ្សារត្រី និងនៅផ្សារដើមក្រឡាញ់ គឺមានមេឆ្នោតឈ្មោះ បារាំង និងនៅផ្សារក្រោមផងដែរ៕
ដោយ៖ ជានិរន្ដរ៍
