ភ្នំពេញ៖ សិល្បករជើងចាស់ចំនួន៦រូបដែលខ្លះចាស់ជរាមានជំងឺបាត់បង់សមត្ថភាពសម្តែង ខ្លះមានបញ្ហាប្រឈមនឹងជីវភាពបានទទួលអំណោយពីសប្បុរសជនតាមរយៈកម្មវិធី”ស្ករគ្រាប់សិល្បៈ”ដែលផ្តើមគំនិតដោយលោកអ៊ឹម ជីវ៉ា រួមទាំងសិល្បករមួយចំនួនទៀត។ កម្មវិធិប្រគល់អំណោយនេះត្រូវបានរៀបចំធ្វើឡើងកាលពីល្ងាចថ្ងៃទី១៧ កុម្ភៈនេះ នៅក្នុងបរិវេនកុដិលេខ២៤ វត្តនាគវ័ន្ត សង្កាត់បឹងកក់២ ខណ្ឌទួលគោក រាជធានីភ្នំពេញ ។
សិល្បៈករជើងចាស់ទាំង៦ រូបរួមមាន លោកគ្រូ មាស សារ៉ាន់ តារាចំរៀង, លោកតា ប៉ិ គក់ តារាកំប្លែង, លោកតា គុយ ហ៊ីនអ្នកចំរៀងចាប៉ីដងវែង, តារាសម្តែងជើងចាស់អ្នកស្រី ផល្លារ, អ្នកសម្តែងជើងចាស់អ្នកស្រីឃុន នារីហៅយាយស្វិត និងតារាសម្តែងលោក សារម៉ុត ដែលកំពុងសម្រាកព្យាបាលជំងឺនៅមន្ទីរពេទ្យ។ អំណោយដែលសិល្បករទទួលបានមានដូចជា មីមួយកេស ទឹកក្រូចមួយកេស ថវិកា ២០ ម៉ឺនរៀល រួមសម្ភារៈផ្សេងៗ មួយកញ្ចប់ និងបន្ថែមថវិកា បានមកពី ព្រះគ្រូនីសុវណ្ណមុនីរ៉េត ២០ ម៉ឺនរៀល។ថវិការពីលោក ទុំសារ៉ុត ហៅនាយឃ្លោក និងពីអ្នកស្រីថុង ស៊ីវទៀងអគ្គនាយិការផលិតកម្មចក្រវាឡភាពយន្តមួយចំនួនទៀត។ បន្ថែមលោកនេះសម្រាប់អ្នកស្រីឃុន នារី ហៅយាយស្វិតដែលកំពុងមានជំងឺក្រិនថ្លើមទាចទឹកនោះក៏ទទួលបាននូវថវិការបន្ថែមពីអ្នកស្រីថុង ស៊ីវទៀត និង ព្រះគ្រូនីសុវណ្ណមុនីរ៉េតបន្ថែមផងដែរ។
លោក អ៊ឹម ជីវ៉ា ដែលជាអ្នកផ្តូចផ្តើមរៀបចំកម្មវិធី”ស្គរគ្រាប់សិល្បៈ”នេះបានបញ្ជាក់ថា ទោះជាមានការតិតៀនខ្លះពីបុគ្គលមួយចំនួនទាក់ទងនឹងកម្មវិធីនេះក្តីក៏លោកនៅតែបន្តបញ្ចប់ការផ្តល់ជូនអំណោយសម្រាប់សិល្បករដែលលំបាកៗមួយចំនួដែរ។ លោកបញ្ជាក់ថា ការបង្កើតកម្មវិធីនេះគឺកើតចេញពីទឹកចិត្តអាណិតស្រលាញ់និងអត់ទ្រាំមើលការលំបាករបស់ពួកគាត់មិនបាន។ លោកបញ្ជាក់ថារយៈពេលខ្លីប៉ុណ្ណោះដែលលោកជួបសិល្បករនិងសប្បុរជនមួយចំនួនតូចដើម្បីស្នើឲ្យពួកគាត់ជួយទិញស្ករគ្រាប់ដើម្បីយកថវិកាដែលលក់បានទៅជួយដល់សិល្បករកំពុងជួបបញ្ហាប្រឈមពិសេសទាក់ទងនឹងជីវភាព។ លោកថា ថវិការសរុបនៃការលក់មានចំនួនជាង៤០០ដុល្លារអាមេរិកដែលនឹងប្រគល់ជូនដល់សិល្បករទាំង៦រូបខាងលើ។
ព្រះតេជគុណនី សុវណ្ណមុនីរ៉េត ទីប្រឹក្សាសម្តេចសង្ឃនន្ទ ង៉ែត មានសង្ឃដីការថា ជាញឹកញាប់ព្រះតេជគុណ រួមទាំងសប្បុរសជនមួយចំនួនទៀតពិសេស លោកស្រីឧកញ៉ា សៀង ច័ន្ទហេង អគ្គនាយិការក្រុមហ៊ុនហេងអភិវឌ្ឍន៍បានចូលរួមចែករំលែកផ្តល់ជាអំណោយទាំងសម្ភារៈនិងបច្ច័យមួយចំនួនជូនដល់ជនក្រីក្រខ្វះទីពឹង។ ព្រះតេជគុណមានសង្ឃដីការដែរថា ការចែកទានដល់ញោមប្រុសស្រីដែលជាសិល្បករមានជំងឺងខ្លះជរា ខ្លះមានបញ្ហាខ្វះខាតផ្នែកជីវភាពនេះគឺជាទានដ៏ជ្រះថ្លាកើតចេញពីទឹកចិត្តអាណិតស្រលាញ់ចំពោះសិល្បករដែលធ្លាប់ចំណាយកម្លាំងញើសឈាមជួយបង្កើតការសប្បាយដល់ទស្សនិកជន។
អតីតតារាកំប្លែង លោកទុំ សារ៉ុតហៅនាយឃ្លោក បានបញ្ជាក់ថា ក្រៅពីជួយទិញស្ករគ្រាប់លោកក៏ជួយថវិការមួយចំនួនតូចដល់សិល្បករដែលមានបញ្ហាចំពោះមុខ។លោកបញ្ជាក់ថា នេះគឺជាទឹកចិត្តតិចតួចស្តួចស្តើង ប៉ុន្តែអ្វីទាំងអស់ផុសចេញពីទឹកចិត្តអាណិតស្រលាញ់។ លោកបញ្ជាក់ថា សិល្បករដែលមកទទួលអំណោយនៅពេលនេះពួកគាត់ចាស់ជរាទៅហើយហើយក៏គ្មានក្របខណ្ឌក្នុងការទទួលបា្រក់បៀវត្សរ៍អ្វីដែរសម្រាប់ការចំណាយទ្រទង់ជីវភាព។ លោកបញ្ជាក់ថា ក៏មានសិល្បករមួយចំនួនដែលមានជំងឺប្រចាំកាយហើយនៅតែព្យាយាមខិតខំសម្តែងដើម្បីជីវភាពផងដើម្បីបម្រើការកម្សាន្តការសប្បាយរបស់មហាជន៕ វឌ្ឍនា
