ភ្នំពេញ៖ បច្ចុប្បន្នការចុះផ្សាយ របស់សារព័ត៌មាននិង ហ្វេសប៊ុកនៅតែបន្តចុះផ្សាយដដែល ពាក់ព័ន្ធនឹងការ ប្រមូលផ្តុំកីឡាករកីឡាការិនី ជម្រើសជាតិ ដូច្នេះឆ្នាំនេះ គ្រូបង្វឹកទាំងអស់គ្នាត្រូវពិនិត្យឲ្យ បានល្អិតល្អន់មុនបញ្ជូនសិស្សរបស់ខ្លួនឲ្យមកស្នាក់នៅក្នុងជំរំ ហ្វឹកហាត់ប្រមូលផ្តុំ ។ បើគណៈកម្មការវាយតម្លៃរបស់យើងរកឃើញថា សហព័ន្ធកីឡាជាតិមួយណាដាក់អត្តពលិកមិនប្រក្រតីយើងនឹងបញ្ជូនទៅសហព័ន្ធនោះវិញ នេះបើតាមការលើកឡើងរបស់លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានអប់រំកាយនិងកីឡា នាព្រឹកថ្ងៃទី១៩ខែកុម្ភៈឆ្នាំ២០១៦នៅមជ្ឈមណ្ឌលជាតិហ្វឹកហ្វឺនកីឡា។
លោកអគ្គនាយកមានប្រសាសន៍ថា ខ្ញុំនិយាយឲ្យហើយនិងផ្តាំផ្ញើលោក អ្នកគ្រូទាំង២៦សហព័ន្ធកីឡាជាតិដែលមានវត្តមាននៅទីនេះ ឆ្នាំនេះធ្វើយ៉ាងណាការជ្រើសរើសកីឡាករ កីឡាការិនីបញ្ជូនមកជំរំប្រមូលផ្តុំត្រូវរើស កីឡាករកីឡាការិនីល្អៗមានន័យថា អត្តពលិកដែលមានគុណភាព ទេពកោសល្យ និងដាច់ខាតត្រូវតែជាកីឡាករកីឡាការិនីជម្រើសជាតិដែលធ្លាប់ប្រមូលផ្តុំកន្លងទៅ។
លោកបានបន្តទៀតថា ខ្ញុំសូមផ្តាំបងប្អូនទាំងអស់គ្នាម្តងហើយម្តងទៀតធ្វើយ៉ាងណាកុំរើសតែកីឡាករ ដែលជាកូនចៅខ្លួនឯងដើម្បីដាក់ឲ្យមកហ្វឹកហាត់ដើម្បីយកតែលុយរដ្ឋចាយ ខ្ញុំនៅតែរក្សាការបង្កើត គណៈកម្មការវាយតម្លៃគុណភាពកីឡាករកីឡាការិនីដដែល បើយើងរកឃើញថា មានភាពមិនប្រក្រតីទេនោះយើងនឹងបញ្ជូនកីឡាករឬ កីឡាការិនីនោះឲ្យត្រឡប់ទៅសហព័ន្ធរបស់ខ្លួនវិញ ។នៅពេលនោះមនុស្សដែលថោកគឺប្រធានសហព័ន្ធរបស់បងប្អូនទាំងអស់គ្នា ដែលស៊ីញ៉េដាក់កីឡាករ កីឡាការិនីមិនបានពិនិត្យឲ្យល្អិតល្អន់ ទើបមជ្ឈមណ្ឌលគេវេរជូនគាត់វិញ។
អគ្គនាយកកីឡារូបនេះបញ្ជាក់ថា ឥឡូវលុយយើងមានហើយគឺច្រើនជាងមុន៣ដង កន្លងទៅពួកយើងគ្រប់គ្នានិយាយថា ឲ្យតែមានលុយចង់ធ្វើអ្វីក៏បានដែរ ប៉ុន្តេបើការប្រមូលផ្តុំរើសមិនបានកីឡាករកីឡាការិនីល្អទេ យើងដាក់ទុនវិនិយោគទៅ ដូចទម្លាក់ម្ជុលក្នុងបាតសមុទ្រដែរ ដូច្នេះពួកយើងត្រូវអនុវត្តតាមប្រ សាសន៍លើកឡើងរបស់លោកថោង ខុន រដ្ឋមន្ត្រីក្រសួងទេសចរណ៍ ដែលលោកបានលើឡើងនៅក្នុងមហាសន្និបាតNOCC កាលពីថ្ងៃទី១៨ខែកុម្ភៈកន្លងទៅ គឺ រួមគ្នាគិត រួមគ្នាធ្វើ និងរួមគ្នាទទួលខុសត្រូវ ដើម្បីឲ្យកីឡាជាតិរីកចម្រើនឡើងថែមមួយកម្រិតទៀត។
នៅក្នុងកិច្ចប្រជុំពិភាក្សាខាងលើនេះដែរ លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡា បានឲ្យដឹងថា ឆ្នាំនេះមជ្ឈមណ្ឌលសម្រេចយកសហព័ន្ធកីឡាជាតិចំនួន២៦ប្រភេទកីឡា ដើម្បីប្រមូលផ្តុំហ្វឹកហាត់ត្រៀមចេញទៅប្រកួតកីឡាអន្តរជាតិនានាក្នុងឆ្នាំ២០១៦នេះ ក្នុងនោះចំណោមសហព័ន្ធកីឡាជាតិទាំង២៦ មានកីឡាករ២៤៤នាក់កីឡាការិនី ៧៨នាក់ គ្រូបង្ហាត់គ្រូជំនួយ៦៧នាក់និងអនុរក្ស២៨នាក់ ៕
ដោយ៖ សារីម
