កម្លាំងទាហានអាមេរិកបានបើកយុទ្ធនាការវាយឆ្មក់ពីលើដែនអាកាសកាលពីថ្ងៃទី១៩ ខែកុម្ភៈ ឆ្នាំ២០១៦ ទៅលើគោលដៅសង្ស័យជាជំរុំលាក់ខ្លួនរបស់ក្រុមរដ្ឋអិស្លាម IS ស្ថិតនៅក្នុងទឹកដីភាគខាងលិចរបស់ប្រទេសលីប៊ីបណ្តាលឲ្យស្លាប់មនុស្សជាង៤០នាក់ ។ គេបានដាក់ការសង្ស័យថា ជនដែលត្រូវសម្លាប់ក្នុងការវាយឆ្មក់នេះ មានក្រុមខ្មាន់កាំភ្លើងដែលបានធ្វើសកម្មភាពវាយប្រហារសម្លាប់រង្គាលកាលពីឆ្នាំមុននៅប្រទេសជិតខាងទុយណេស៊ីនោះផងដែរ។
នេះជាការវាយប្រហារតាមដែនអាកាសលើកទី២របស់អាមេរិកនៅក្នុងខែកុម្ភៈ ឆ្នាំ២០១៦នេះ ប្រឆាំងទៅលើក្រុមរដ្ឋអិស្លាម IS ដែលបាននិងកំពុងហ៊ឺកហាក់យ៉ាងខ្លាំងក្នុងការបង្កអំពើហិង្សានៅក្នុងរយៈកាលប៉ុន្មានឆ្នាំចុងក្រោយនេះ បន្ទាប់ពីការផ្តួលរំលំរបបលោក Muammar Gaddafi កាលឆ្នាំ២០១១ ហើយបានពង្រឹងវត្តមានក្រុមខ្លួនពង្រីកការគ្រប់គ្រងដែនដីយ៉ាងរឹងមាំនៅភាគខាងត្បូងនៃសមុទ្រមេឌីទែរ៉ាណេនោះ ។
មន្ទីរបង់តាហ្គូនបានប្រកាសថា ខ្លួនបានបើកការវាយប្រហារតាមដែនអាកាសដោយគោលដៅទៅលើជំរំហ្វឹកហាត់របស់ក្រុមរដ្ឋអិស្លាមមួយកន្លែង ។ ជំរំហ្វឹកហាត់កងកម្លាំងរបស់ក្រុមរដ្ឋអិស្លាមដែលស្ថិតនៅទីក្រុង Sabratha នោះ គឺមានទំនាក់ទំនងដោយផ្ទាល់ជាមួយមេខ្លោងភេរវករ Noureddine Chouchane ជាពលរដ្ឋទុយណេស៊ីមួយរូបដែលបានវាយប្រហារភេរវកម្មកាលពីឆ្នាំមុននៅសារមន្ទីរTunis និងវាយប្រហារតំបន់រមណីយដ្ឋានមាត់សមុទ្រស្លាប់អ្នកទេសចរណ៍ជាច្រើននាក់ ។
មន្ទីរបង់តាហ្គូនបានបញ្ជាក់ថា បានបំផ្លាញជំរំ និងបំបាត់ក្រុម Chouchane ។ ប្រតិបត្តិការនេះបានធ្វើឲ្យទន់ខ្សោយ ភ្លាមៗផងដែរដល់សកម្មភាពរបស់ក្រុមរដ្ឋអិស្លាមនៅក្នុងការប្រមូលកម្លាំង និងពង្រឹងឥទ្ធិពលរបស់ពួកគេនៅក្នុងទឹកដីលីប៊ី ក្នុងនោះមានការជ្រើសរើសកម្លាំងថ្មី និងការបង្កើតជំរំនានានៅលើទឹកដីលីប៊ី ក្នុងគោលដៅបង្កើនផែនការ វាយប្រហារមកលើទីតាំងរបស់អាមេរិកប្រចាំនៅក្នុងតំបន់ ។
មន្ត្រីអាមេរិកបានអះអាងថា មេខ្លោង Noureddine Chouchane ទំនងត្រូវបានសម្លាប់រួចហើយនៅក្នុងការវាយប្រហារនេះ ។ ប៉ុន្តែទោះបីយ៉ាងណា អ្នកនាំពាក្យសេតវិមាន លោក Josh Earnest បានថ្លែងថា លោកមិនទាន់ហ៊ានប្រាកដនៅឡើយដោយសារតែមិនទាន់មានលទ្ធផលបញ្ជាក់អំពីការវាយប្រហារតាមដែនអាកាសនេះ ។ លោកបន្តថា ការវាយឆ្មក់នេះបង្ហាញឲ្យឃើញពីឆន្ទៈរបស់អាមេរិកនៅក្នុងសកម្មភាពប្រយុទ្ធប្រឆាំងជាមួយក្រុមរដ្ឋអិស្លាម IS ។
នៅក្នុងប្រទេសលីប៊ីបណ្តាញព័ត៌មានក្នុងតំបន់បានផ្សព្វផ្សាយរូបភាពដីគ្រហូងដោយសារតែគាំមីស៊ីលបាញ់ចំ ។ អ្នករងរបួសដេកដួលរណូករណែល ហើយសាកសពត្រូវរុំបញ្ជូនទៅកាន់មន្ទីរពេទ្យ ។
អភិបាលក្រុង Sabratha លោក Hussein al-Thwadi បានប្រាប់ប្រភពរ៉យទ័រថា យន្តហោះចម្បាំងបានបាញ់មីស៊ីលធ្លាក់ទៅលើអគារមួយកន្លែងនៅក្នុងសង្កាត់ Qasr Talil ដែលជាភូមិឋានសម្បូរដោយជនបរទេសរស់នៅះ។
មន្ត្រីនៅក្នុងតំបន់បានបញ្ជាក់ថា មនុស្ស៤៣នាក់បានបាត់បង់ជីវិត ក្នុងហេតុការណ៍វាយប្រហារខាងលើនេះ ។ សេចក្តីថ្លែងការណ៍របស់មន្ត្រីបានបញ្ជាក់ថា លំនៅឋានដែលរងការវាយប្រហារបានជួលទៅឲ្យជនបរទេសស្នាក់នៅ ហើយដែលគេសង្ស័យថា ជាបណ្តាញរបស់ក្រុមរដ្ឋអិស្លាម IS ។ ក្រោយការវាយប្រហារគបានរកឃើញអាវុធជាច្រើន មានដូចជាកាំភ្លើងយន្ត គ្រាប់រ៉ុក្កែត និងគ្រាប់បែកដៃនៅក្រោមគំនរអគារបាក់បែក ។
ការវាយប្រហារនេះបានកើតឡើងមួយថ្ងៃ បន្ទាប់ពីការព្រមានរបស់ប្រធានាធិបតីបារ៉ាក់ អូបម៉ា ថា ទីក្រុងវ៉ាស៊ីន នៅវាយប្រហារប្រឆាំងទៅលើក្រុមរដ្ឋអិស្លាម IS នៅពេលណាទទួលបានព័ត៌មានច្បាប់លាស់ និងគោលដៅពិតប្រាកដ ។
ជាមួយគ្នានេះដែរ ចក្រភពអង់គ្លេសបានបញ្ជាក់ផងដែរថា អង់គ្លេសមានយុត្តាធិការនៅក្នុងយុទ្ធនាការវាយប្រហារតាមដែនអាកាសប្រឆាំងទៅលើក្រុមរដ្ឋអិស្លាមផងដែរ ។ រដ្ឋអិស្លាម IS បានគ្រប់គ្រងនិងអនុវត្តច្បាប់កាលីផេត របស់ខ្លួនយ៉ាងតឹងរ៉ឹងនៅលើទឹកដីស៊ីរី និងអ៊ីរ៉ាក់ ទីដែលពួកគេបានដណ្តើមកាន់កាប់ពីរដ្ឋាភិបាល ។ ប៉ុន្តែទោះបីយ៉ាងណា ក្រុមនេះទទួលរងការវាយប្រហារជាបន្តបន្ទាប់ពីលើដែនអាកាសរបស់កងកម្លាំងសម្ពន្ធមិត្តដឹកនាំដោយអាមេរិកចាប់តាំងពីឆ្នាំ២០១៤រៀងរហូតមកទល់ពេលបច្ចុប្បន្ន ៕
ប្រែសម្រួល៖ ថាច់ យ៉ាត
