អន្តរជាតិ៖ បើយោងតាមការចុះផ្សាយនៅក្នុងសារព័ត៌មាន Thairath របស់ប្រទេសថៃ បាននិយាយថា ចោរប្លន់មានចិត្តក្លាហានម្នាក់ ហ៊ានដេីរចូលទៅប្លន់យកប្រាក់អស់ជាង ២ម៉ឺនដុល្លារ (៦សែនបាត) ពីធនាគារមួយកន្លែងនៅក្នុងប្រទេសថៃ ហើយបានដើរចេញពីធនាគារដោយសុវត្ថិភាព។ ប៉ុន្តែអ្វីដែលគួរឱ្យអស់សំណើរបំផុតនោះគឺថា ក្រោយពេលប៉ូលីសធ្វើការស៊ើបអង្កេត និងរឹបអូសបានវត្ថុតាងរបស់ចោរនោះ ទើបដឹងថា ចោរនោះមានសំណាងត្រូវឆ្នោតទឹកប្រាក់រង្វាន់ ១សែនបាត ដែលបានប្រកាសលទ្ធផលឆ្នោតនៅថ្ងៃទី០១ ខែកុម្ភៈឆ្នាំ២០២១។
សារព័ត៍មាន Thairath បន្តថា ករណីចោរប្លន់ខាងលេីនេះ បានកើតឡើងនៅម៉ោង ១០ និង៣០នាទីព្រឹក កាលពីថ្ងៃទី២៥ ខែមករា ឆ្នាំ២០២១ ហើយចំពោះទីតាំងកើតហេតុវិញ គឺនៅធនាគារ Krung Thai Bank ដែលមានសាខានៅក្នុងផ្សារទំនើប Bang Kapi ក្នុងទីក្រុងបាងកកប្រទេសថៃ។
បន្ទាប់ពីកេីតហេតុ កម្លាំងប៉ូលីសបានចុះទៅដល់កន្លែងកេីតហេតុ ក៏បានបេីកមេរ៉ាសុវត្ថិភាព បានបង្ហាញថា លោកចោររូបនោះគឺជាបុរសដែលមានអាយុប្រហែលជា ២៧–២៨ឆ្នាំ ស្លៀកពាក់ខោអាវពណ៌ខ្មៅ និងប្រើកាំភ្លើងខ្លីមួយដើម ដោយបានធ្វើសកម្មភាពតែម្នាក់ឯង ហើយមិនបានប្រើប្រាស់យានជំនិះផ្ទាល់ខ្លួនអ្វីមួយ សម្រាប់ធ្វើជាមធ្យោបាយពេលមកធ្វើសកម្មភាពប្លន់នោះទេ។
គួរបញ្ជាក់ថា ក្រោយធ្វេីការស៊ើអង្កេតរួច មន្ត្រីប៉ូលីស ក៏បានស្រាវជ្រាវចាប់ខ្លួនចោរវ័យក្មេងខាងលេីនេះ ដែលជាចោរមានសំណាងម្នាក់ត្រូវឆ្នោត និងរឹបអូសវត្ថុតាងជាច្រើន ហើយតាមរយៈវត្ថុតាងទាំងនោះគេឃើញថា ចោរនោះក៏បានលេងឆ្នោតផ្សងសំណាងផងដែរ។
ដោយឡែកបើតាមការចុះផ្សាយរបស់ Thai TV Social បានបញ្ជាក់ថា ចោរនោះគឺជាអ្នកមានសំណាងត្រូវលេខឆ្នោត ២ ខ្ទង់ចុងក្រោយដែលត្រូវបានគេប្រកាសលទ្ធផលនៅថ្ងៃទី១ ខែកុម្ភៈម្សិលមិញនេះ ប៉ុន្តែគួរឱ្យសោកស្ដាយ ដែលលោកចោរមិនទាន់បានស្ដាប់លទ្ធផលឆ្នោតផង ក៏ត្រូវបានប៉ូលីសចាប់ខ្លួនបានមុន។ ចំណែកមហាជនឯណ្ណោះវិញ បាននិយាយបែបលេងសើចថា «លើកក្រោយស្ដាប់លទ្ធផលឆ្នោតសិន រួចចាំចេញប្លន់»៕ដោយ៖សហការី
