រដ្ឋាភិបាលម៉ិចស៊ីកូ(Mexico) កាលពីថ្ងៃទី២៩ ខែកុម្ភៈ ឆ្នាំ២០១៦បានបញ្ជាក់ថា ស្ត្រីមានគភ៌១១នាក់មានផ្ទុក វីរុស្សហ្សីកា ។ វីរុសហ្សីកាបានឆ្លងរាលដាលពលរដ្ឋម៉ិចស៊ីកូរហូតមកដល់ពេលនេះមាន១២១ករណីហើយ ។
ក្រសួងសុខាភិបាលបានចេញផ្សាយរបាយការណ៍ថា វីរុសហ្ស៊ីកាឆ្លងរាលដាលភាគច្រើនជាងគេគឺនៅរដ្ឋ Chiapas និង Oaxaca ភាគខាងត្បូងរបស់ម៉ិចស៊ីកូ ។ របាយការណ៍ដដែលបន្តថា ស្ត្រីមានគភ៌ ហើយមានផ្ទុកវីរុស្សហ្ស៊ីកានោះ មាន៨នាក់ មកពីរដ្ឋ Chiapas, ៣នាក់មកពីរដ្ឋ Oaxaca និងម្នាក់ទៀតមកពីឈូងសមុទ្រ Guft រដ្ឋ Veracruz ។
ការឆ្លងរាលដាលវីរុសហ្ស៊ីកាបានកើនឡើងជាបន្តបន្ទាប់ចាប់តាំងពីពាក់កណ្តាលខែកុម្ភៈ ឆ្នាំ២០១៦រៀងរហូតមក ដែលកាលណោះមានការឆ្លងរាលដាលវីរុសហ្សីកាតែ៨០ករណី ក្នុងនោះឆ្លងទៅលើស្ត្រីមានផ្ទៃពោះតែចំនួន៦ករណីប៉ុណ្ណោះ ។
ឧបសគ្គចំពោះវីរុសហ្ស៊ីកានេះនៅមានច្រើនទៀតដែលគេមិនទាន់អាចដឹងបាន ។ គេមិនដឹងថា តើវីរុសហ្សីកានេះពិតជាបានធ្វើឲ្យទារកក្នុងផៃ្ទមានបញ្ហាខាងខួរក្បាល គឺក្បាលទារកខុសទ្រង់ទ្រាយដើម មានលក្ខណៈតូចខុសធម្មតា នៅពេលដែលប្រសូត្រមកនោះ ។
រដ្ឋាភិបាលប្រេស៊ីលបានអះអាងកាលពីពេលថ្មីៗកន្លងទៅនេះថា ប្រេស៊ីលមាន៥៨០ករណីស្តីអំពីទារកកើតមកហើយមានលក្ខណៈទ្រង់ទ្រាយខុសប្លែកពីធម្មតានៅត្រង់ក្បាល គឺក្បាលទារកតូច ហើយដែលករណីនេះ ត្រូវគេសង្ស័យថា អាចបណ្តាលមកពីវីរុស្សហ្សីកានេះហើយដែលមានផ្ទុកនៅក្នុងខ្លួនរបស់ម្តាយនៃទារុកនោះ ។ ការស៊ើបអង្កេតរបស់រដ្ឋាភិបាលប្រេស៊ីលបានរកឃើញថា រហូតមកដល់ពេលនេះ ប្រេស៊ីលមានករណីឆ្លងវីរុស្សហ្ស៊ីកាប្រមាណ៤១០០ករណី ៕
ប្រែសម្រួល៖ ថាច់ យ៉ាត
