មន្ត្រីសន្តិសុខបានអះអាងថា ជនរងគ្រោះបាត់បង់ជីវិតក្នុងហេតុការណ៍បំផ្ទុះគ្រាប់បែកកាលពីថ្ងៃទី២៩ ខែកុម្ភៈ ឆ្នាំ២០១៦ស្ថិតនៅក្នុងពិធីបុណ្យសពមួយភាគខាងកើតអ៊ីរ៉ាក់ ខេត្ត Diyala នោះបានកើនដល់៣៤នាក់ហើយ ។ ក្នុងចំណោមអ្នកបាត់បង់ជីវិត មានរួមបញ្ចូលមេដឹកនាំក្រុមនិកាយស៊ីអ៊ីដ៧នាក់ផងដែរ ។
ថ្លែងប្រាប់ប្រភពស៊ីនហួ ប្រភពសុំមិនបញ្ចេញឈ្មោះបានបញ្ជាក់ថា របាយការណ៍ថ្មីចុងក្រោយទាក់ទងជនរងគ្រោះបាត់បង់ជីវិត ក្នុងហេតុការណ៍វាយប្រហារបំផ្ទុះគ្រាប់បែកនៅជិតតំបន់ Maqdadiyah នោះបានកើនឡើង៣៤នាក់ និងរងរបួស៤៣នាក់ ។
ប្រភពបានបញ្ជាក់ថា ជនវាយប្រហារគ្រាប់បែកបានលួចដាក់ជាតិផ្ទុះនៅក្នុងអាវដាក់នៅលើតង់ នៃពិធីបុណ្យសពមួយស្ថិតនៅក្នុងភូមិ Brishtah របស់ក្រុមស៊ីអ៊ីដ ស្ថិតនៅចម្ងាយ១០០គីឡូម៉ែត្រ ភាគឦសានទីក្រុងប៉ាដាដ ។ គោលដៅវាយប្រហារនេះគឺលោក Hashd Shaabi ដែលជាមេដឹកនាំក្រុមស៊ីអ៊ីដដែលល្បីល្បាញ ហើយបានចូលរួមក្នុងពិធីបុណ្យសពនោះ ។ ជាមួយគ្នានេះដែរ មានមេដឹកនាំជាន់ខ្ពស់របស់ក្រុមស៊ីអ៊ីដ៧នាក់ផ្សេងទៀត ។
កម្លាំងសន្តិសុខបានប្រកាសដាក់បម្រាមគោចរណ៍នៅទីតាំងខាងលើ និងនៅទីប្រជុំជនផងដែរ ដើម្បីការពារខ្លាចមានការវាយប្រហារសាជាថ្មី ។ អាជ្ញាធរក្នុងតំបន់បានប្រកាសកាន់ទុក្ខ៣ថ្ងៃចំពោះហេតុការណ៍វាយប្រហារខាងលើនេះ ។
នៅក្នុងប្រទេសអ៊ីរ៉ាក់ មួយរយៈចុងក្រោយត្រូវគេកត់សម្គាល់ឃើញថា ក្រុមរដ្ឋអិស្លាម IS តែងតែធ្វើសកម្មភាពវាយប្រហារសំដៅទៅទីតាំងដែលមនុស្សកកកុញ នៅទីផ្សារ ហាងលក់ទំនិញ និងព្រះវិហារជាដើម ។
ចាប់តាំងពីខែមិថុនា ឆ្នាំ២០១៤ ក្រុមរដ្ឋអិស្លាម IS បានគ្រប់គ្រងតំបន់ជាច្រើនរបស់អ៊ីរ៉ាក់ស្ថិតនៅភាគខាងលិច បង្កឲ្យមានអំពើហិង្សាផ្ទុះឡើងជាញឹកញាប់ ។
អង្គការសហប្រជាជាតិបានចេញរបាយការណ៍ស្តីពីអំពើហិង្សានៅក្នុងប្រទេសអ៊ីរ៉ាក់សម្រាប់ឆ្នាំ២០១៥ បានសម្លាប់មនុស្សមិនតិច២២.៣០០នាក់ ។ អង្គការសហប្រជាជាតិបានថ្កោលទោសចំពោះអំពើហិង្សាវាយប្រហារគ្រាប់បែកនៅក្នុងពិធីបុណ្យសពនៅអ៊ីរ៉ាក់ខាងលើនេះ ។
លោកបាន គីមូន អគ្គលេខាធិការអង្គការសហប្រជាជាតិកាលពីថ្ងៃទី២៩ ខែកុម្ភៈ បានថ្កោលទោសសកម្មភាពវាយប្រហារភេរវកម្មនៅក្នុងពិធីបុណ្យសពស្ថិតនៅក្នុងទីប្រជុំជន Muqdadiya ភាគឦសានទីក្រុងបាដាដ ហើយដែលក្រុមរដ្ឋអិស្លាម IS បានប្រកាសទទួលស្គាល់ថា ជាទង្វើរបស់ក្រុមខ្លួននោះ ។
ក្នុងសេចក្តីថ្លែងការណ៍ លោកបាន គូមូនបានថ្លែងថា ការវាយប្រហារភេរវកម្មរបស់ក្រុមរដ្ឋអិស្លាមនៅតាមទីផ្សារ ព្រះវិហារ ហាងលក់ទំនិញ និងពិធីបុណ្យសពទាំងអស់នោះជាវិធីកំសាក និងក្នុងគោលដៅបំបែកបំបាក់សាមគ្គីភាពរបស់ពលរដ្ឋអ៊ីរ៉ាក់ ។
សេចក្តីថ្លែងការណ៍បន្តថា រដ្ឋាភិបាលអ៊ីរ៉ាក់ត្រូវតែប្រាកដថា នឹងនាំខ្លួនជនវាយប្រហារ ប្រព្រឹត្តបទឧក្រិដ្ឋទាំងនេះមកផ្តន្ទាទោសតាមច្បាប់ ៕
ប្រែសម្រួល៖ ថាច់ យ៉ាត
