ភ្នំពេញ៖ វាជារឿងដែលគួរឲ្យឆ្ងល់ មហាសែនឆ្ងល់ ដែលសមត្ថកិច្ចក្រសួងសាធារណការ បានដាក់ជញ្ជីងថ្លឹងរថយន្តនៅក្បាលស្ពានអ្នកលឿងត្រើយខាងកើត ប្រយោជន៍ដើម្បីតាមចាប់រថយន្តដឹកលើសទម្ងន់ ។ ប៉ុន្តែកាលពីថ្ងៃទី២ ខែមីនា រថយន្តដឹកទំនិញ២គ្រឿង ដែលមួយគ្រឿងៗមានទម្ងន់ច្រើនជាង៦០តោនបានឆ្លងស្ពានអ្នកលឿង ឬត្សឹបាសា បានដោយសុវត្ថិភាព ធ្វើដំណើររហូតដល់មូលដ្ឋានខណ្ឌច្បារអំពៅ ទើបសមត្ថកិច្ចចាប់បាន ។ ប្រជាពលរដ្ឋដែលមានការចេះដឹងតិចតួចលើកជាចម្ងល់ថា តើរថយន្តធំប៉ុនមេឃទាំងនោះបើកឆ្លងកាត់កន្លែងថ្លឹងរថយន្តនៅក្បាលស្ពានអ្នកលឿងខាងកើតបានយ៉ាងដូចម្តេចទៅ? ។
លោក រស់ សុភក្ត្រ អភិបាលរងខណ្ឌច្បារអំពៅដែលដឹកនាំកម្លាំងបង្ក្រាបរថយន្តដឹកទំនិញលើសទម្ងន់ ព្រោះតែបើកបរខុសផ្លូវនោះបានដកស្រង់សម្តីអ្នកបើកបររថយន្តលើសទម្ងន់ទាំង២នាក់នោះថា ពួកគេបានដឹកទំនិញចេញពីខេត្តស្វាយរៀងឆ្លងកាត់ស្ពានត្សឹបាសា ក្នុងទិសដៅទៅភាគពាយព្យនៃប្រទេស ។ លោកអភិបាលរងបានបន្តថា អាជ្ញាធរខណ្ឌច្បារអំពៅឃើញរថយន្តដឹកទំនិញនោះឆ្លងកាត់ផ្លូវជាតិលេខ១ ទីដែលកំពុងបើកការដ្ឋាន ដែលមិនអនុញ្ញាតឲ្យមានរថយន្តឆ្លងកាត់ ។ ទីបំផុតទើបដឹងថា រថយន្តនោះផ្ទុកទំនិញច្រើនជាង៦០តោន ។ លោកអភិបាលរងក៏ឆ្ងល់ដែរថា តើរថយន្តដឹកទំនិញទាំងនេះ បើកបរតាមផ្លូវជាតិលេខ១ដែលមានកន្លែងថ្លឹងរថយន្តជាច្រើននោះ ឆ្លងកាត់ដោយវិធីណា?
គេមិនដឹងថា តើរថយន្តលើសទម្ងន់ទាំងពីរគ្រឿងបានឆ្លងប៉ុស្តិ៍ជញ្ជីងត្រួតពិនិត្យនៅក្បាលស្ពានអ្នកលឿងត្រើយខាងកើតដែរឬយ៉ាងណានោះទេ? ប៉ុន្តែដូចជាគ្មានផ្លូវវាងនោះទេ ។ ដូច្នេះ ប្រហែលជារថយន្តទាំងពីរគ្រឿងនេះ អាចចេះបំបាំងកាយធ្វើឲ្យកូនចៅលោករដ្ឋមន្ត្រីត្រាំ អ៊ីវតឹក មើលមិនឃើញ ។
រឿងរ៉ាវដដែលនេះ គឺករណីម្ចាស់រថយន្តដឹកអង្ករ៧០តោនឆ្លងកាត់ស្ពានត្សឹបាសា មិនទាន់ត្រូវបានសមត្ថកិច្ចចាប់ខ្លួនបាននៅឡើយ បើទោះបីជាបានស្គាល់អត្តសញ្ញាណទាំងប្តី ទាំងប្រពន្ធក៏ដោយ ។ ករណីមួយនេះ មិនមែនមានប្រតិកម្មតែពីសម្តេចនាយករដ្ឋមន្ត្រីប៉ុណ្ណោះទេ ប៉ុន្តែសម្តេចក្រឡាហោមស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏ជំរុញឲ្យសមត្ថកិច្ចចាប់ខ្លួនម្ចាស់រថយន្តដឹកអង្ករនោះដែរ ។ ប៉ុន្តែរហូតមកដល់ពេលនេះ ករណីម្ចាស់រថយន្តដឹកអង្ករ៧០តោនឆ្លងកាត់ស្ពានត្សឹបាសា ទំនងជាត្រូវខ័ណ្ឌចប់ ។
នរណាក៏ដឹងដែរថា អ្នកស្រី ម៉ែន ចាន់បុប្ផា ជាម្ចាស់រថយន្តដឹកអង្ករទម្ងន់ជាង៧០តោននោះ ។ អ្នកស្រីអាចរត់គេចមួយរយៈទៅលាក់ខ្លួននៅបរទេស ដែលសមត្ថកិច្ចពិតជាគ្មានលទ្ធភាពទៅតាមចាប់យកមកឲ្យប្រឈមនឹងច្បាប់ស្រុកទេសពិតមែន ។ ប៉ុន្តែស្វាមីអ្នកស្រី គឺលោក ឃឹម រមនី អតីតមន្ត្រីនៅកំពង់ចម្លងអ្នកលឿង បានរត់ការឡើងធ្វើជាអនុប្រធាន មន្ទីរសាធារណការខេត្តរតនគិរី ទទួលបន្ទុកខាងជញ្ជីង អាចជាអ្នកទទួលខុសត្រូវបន្ទាប់ពីភរិយារបស់គាត់រត់គេចបាត់។
ប៉ុន្តែអ្វីៗពាក់ព័ន្ធនឹងករណីរថយន្តដឹកអង្ករទម្ងន់ជាង៧០តោនឆ្លងកាត់ស្ពានត្សឹបាសានោះ គ្រប់ស្ថាប័នហាក់ដូចជាចង់បញ្ចប់រឿងនេះដោយស្ងាត់ស្ងៀម បើទោះបីជាប្រមុខរដ្ឋាភិបាល និងសម្តេចឧបនាយករដ្ឋមន្ត្រីប្រតិកម្មក៏ដោយ ។ បើសម្តេចនាយករដ្ឋមន្ត្រី និងសម្តេចឧបនាយករដ្ឋមន្ត្រីប្រតិកម្មហើយ នៅតែមិនអាចធ្វើបានចំពោះករណីជនបំពានច្បាប់ម្នាក់នេះ ដូច្នេះវាគួរតែ ខ័ណ្ឌចប់ មែន ៕
ដោយ៖ ហេង សូរិយា
