កាលពីថ្ងៃទី១០ខែមីនា តុលាការរដ្ឋសាវប៉ូឡូ របស់ប្រេស៊ីុលបានចេញសេចក្តីសម្រេច ឃុំខ្លួនជាបណ្តោះអាសន្ន អតីតប្រធានាធិបតីប្រេស៊ីុល លោកLuiz Inacio Lula Da Silva ដោយលោករងការចោទប្រកាន់ពាក់ព័ន្ធនិងការលាងលុយខ្មៅ លាក់បាំងទ្រព្យសម្បត្តិរបស់ខ្លួន និងធ្វើលិខិតស្នាមក្លែងក្លាយ។ ការសម្រេចខាងលើរបស់តុលាការធ្វើឡើងតាមសំណើររបស់ក្រុមមេធាវីទីក្រុងស៊ាវប៉ូឡូ។
តុលាការប្រេស៊ីុលបញ្ជាក់ថា ការឃុំខ្លួនលោក Lula Da Silva គឺជាការចាំបាច់ ដោយសារតែអតីតប្រធានាធិបតីរូបនេះអាចឃោសនាក្រុមអ្នកគាំទ្រ រារាំងសកម្មភាពស្រាវជ្រាវ។
តុលាការក៏បានចោទប្រកាន់លោក ស៊ីុលវ៉ា ដោយសារតែលោកបានបំពានច្បាប់សណ្តាប់ធ្នាប់សាធារណៈ អំពាវនាវដល់ប្រជាពលរដ្ឋ គាំទ្រខ្លួនធ្វើមហាបាតុកម្ម កាលពីថ្ងៃទី៤ខែមីនា កន្លងមក ក្រោយពេលប៉ូលិសបញ្ចូនរូបលោកទៅកាន់ទីស្នាក់ការដើម្បីសួរចម្លើយពាក់ព័ន្ធនិងអំពើពុករលួយ នៅក្នុងក្រុមហ៊ុនប្រេងជាតិ Pertobras ។
នៅមុននេះមួយថ្ងៃ ព្រះរាជអាជ្ញាបានផ្ញើលិខិត ស្នើរទៅកាន់តុលាការរដ្ឋសាវប៉ូឡូ ឲ្យបើកការស្រាវជ្រាវពាក់ព័ន្ធនិងអំពើពុករលួយ នៅក្នុងក្រុមហ៊ុនប្រេងរបស់រដ្ឋ។ ក្រៅពីនេះនៅមានសកម្មភាពលាងលុយខ្មៅ បិទបាំងទ្រព្យសម្បត្តិ មិនប្រកាសឲ្យដឹងជាសាធារណ ទៅតាមច្បាប់។
កាលពីថ្ងៃទី៤ខែមីនា ប៉ូលិសបានស្រាវជ្រាវឆែកឆេរផ្ទះរបស់អតីតប្រធានាធិបតី ហើយបញ្ចូនរូបលោកទៅកាន់ស្នងការប៉ូលិសសួរចម្លើយ។ លោកឡូឡា ដាស៊ីលវ៉ា រងការចោទប្រកាន់ថាលោកបានទទួលបានសំណូករាប់លានដុល្លារពីកិច្ចព្រមព្រៀងរបស់ក្រុមហ៊ុនPetrobras ។ ប៉ុន្តែលោកបានច្រានចោលការចោទប្រកាន់ទាំងនោះ ដោយចាត់ទុកថា ជាការប៉ុនប៉ងបំផ្លាញកេរ្ត៍ឈ្មោះរបស់លោក ។
ក្នុងពេលជាមួយគ្នានេះគណបក្សពលករប្រេស៊ីុលកាន់អំណាចបានចោទប្រកាន់ការឆែកឆេរផ្ទះអតីតប្រធានាធិបតីគឺជាការប៉ុនប៉ងធ្វើឲ្យមានអសន្តិសុខនៅក្នុងសង្គម ហើយអំពាវនាវដល់ពលរដ្ឋ ការពារលិទ្ធិប្រជាធិបតេយ្យនៅក្នុងប្រទេសនេះក៏ដូចជាការពារអតីតប្រធានាធិបតី៕
