ភ្នំពេញៈ ក្រសួងវប្បធម៌និងវិចិត្រសិល្បៈ សហការណ៍ជាមួយអគ្គនាយកដ្ឋានទូរទស្សន៍បាយ័ន បានបើកកម្មវិធី ( មរតកវប្បធម៌ខ្មែរ ) ប្រឡងកំណាព្យ ចម្រៀងប្រពៃណី និងចម្រៀងមហោរី ពានរង្វាន់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជំនាន់ទី៨ កាលពីរសៀលថ្ងៃទី១៥ ខែមីនា ឆ្នាំ២០១៦ ។
សូមជម្រាបថា កាលពីថ្ងៃទី១២ ខែមករា ឆ្នាំ២០១៦កន្លងទៅនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត បានអញ្ជើញជាអធិបតីភាព ក្នុងពិធីប្រគល់ពានរង្វាន់ ( មរតកវប្បធម៌ខ្មែរ ) ជាពានរង្វាន់ សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ជំនាន់ទី៧ ឆ្នាំ២០១៦ នៅសាលមហោស្រពកោះពេជ្រ ។
វប្បធម៌គឺជាដួងព្រលឹងនៃជាតិខ្មែរ ដែលបន្សល់ទុកដោយមហាបុព្វបុរសខ្មែរជំនាន់មុន សម្រាប់ឱ្យមនុស្សជំនាន់ក្រោយបន្តថែរក្សា ។
នាំគ្នាថែរក្សា ការពារ សិល្ប: វប្បធម៌ប្រពៃណីជាតិ គឺជាការរួមចំណែកកសាងសង្គមជាតិ និងរក្សានូវអត្តសញ្ញាណជាតិ ឱ្យបានគង់វង្សយូរអង្វែង ៕ សុខ ខេមរា
