ភ្នំពេញ៖ យុវជនម្នាក់បានរងរបួសបែកក្បាល និងរបួសជាច្រើនកន្លែងផ្សេងទៀត ដោយសារតែត្រូវជនសង្ស័យមួយក្រុមបានប្រើបំពង់ទីបដែកវាយក្បាល ប្លន់យកម៉ូតូស្តុបពី ពណ៍ស ពាក់ស្លាកលេខ ភ្នំពេញ 2FK-6027 បានសម្រេច ហើយគេចខ្លួនបាត់ស្រមោល ដោយមិនរំខានដល់សមត្ថកិច្ចមូលដ្ឋានណាម្នាក់នោះទេ ។
ហេតុការណ៍នេះបានកើតឡើងកាលពីវេលាម៉ោង១១នឹង៤០នាទីយប់ថ្ងៃទី១៦ ខែមីនា ឆ្នាំ២០១៦ នៅចំណុចមុខទីស្តីការគណៈរដ្ឋមន្រ្តី ផ្លូវចូលក្នុងប្លុក បឹងកក់ ស្ថិតក្នុងសង្កាត់ស្រះចក ខណ្ឌដូនពេញ ។
ជនរងគ្រោះមានឈ្មោះ មែន សហ្វីរីន អាយុ២១ឆ្នាំ ជាជនជាតិអ៊ីស្លាម បច្ចុប្បន្នស្នាក់នៅសង្កាត់ទួលសង្កែ ខណ្ឌឬស្សី។ បើតាមសម្តីរៀបរាប់ពីជនរងគ្រោះបានឱ្យដឹងថា នៅមុនពេលកើតហេតុរូបគេ និងពូ បានជិះម៉ូតូម្នាក់១គ្រឿងចេញទៅដើរលេង ហើយនៅវេលាម៉ោងកើតហេតុបំណងត្រឡប់ទៅផ្ទះវិញ ពេលមកដល់កន្លែងកើតហេតុដែលជាកន្លែងស្ងាត់ និងងងឹតផងនោះ ក៏ស្រាប់តែមានជនសង្ស័យមួយក្រុមមានគ្នា៤នាក់ ជិះម៉ូតូ២គ្រឿង បានធ្វើសកម្មភាពវាយមកលើក្បាល និងខ្នង ដោយប្រើបំពង់ទីបដែកជាច្រើន ។ ពេលនោះគេក៏បានបន្ថែមល្បឿន ហើយត្រូវបានជនសង្ស័យដេញតាមពីក្រោយវាយជាច្រើនទីបទៀត បណ្តាលឱ្យបែកក្បាល និងដួលម៉ូតូ ហើយរូបគេក៏រត់ចោលម៉ូតូយកតែរួចខ្លួន ទើបក្រុមជនសង្ស័យលើក ម៉ូតូយកទៅតែម្តង ។
បន្ទាប់ពីកើតហេតុរយះពេល២ម៉ោងមិនមានសមត្ថកិច្ចមូលដ្ឋានណាម្នាក់ មកអន្តរាគមន៍ ឬធ្វើការសួរនាំនោះទេ ទើបគេសម្រេចចិត្តហៅមិត្តភក្រ្ត រួចដឹកទៅដាក់ពាក្យបណ្តឹងនៅប៉ុស្តិ៍ស្រះចកដោយខ្លួនឯង ។
សូមបញ្ជាក់ថា កន្លែងកើតហេតុខាងលើតែងតែកើតមាននូវករណីវាយ និងភ្ជង់ប្លន់ជាញឹកញាប់ ប៉ុន្តែសមត្ថកិច្ចទាំងមូលដ្ឋាន និងខណ្ឌ ហាក់ដូចជាមិនអើពើនោះទេ មិនតែប៉ុណ្ណោះ បានព្យាយាមលាក់បាំងអ្នកសារពត៌មាន ថាមិនមែនជាករណីប្លន់នោះទេ ជាករណីផ្សេងទៅវិញ ដោយបានបណ្តែតបណ្តោយឱ្យកើតមាននូវករណីប្លន់កើនឡើងគួរឱ្យកត់សម្គាល់ និងហាក់ដូចជាមិនខ្វល់ថាភូមិសង្កាត់មានសុវត្ថិភាព និងសុខទុក្ខប្រជាពលរដ្ឋឡើយ ៕
ដោយ៖ ព្រែកជ័យ
