នៅពេលនេះកម្លាំងទាហានប្រទេសឥណ្ឌូនេស៊ីកំពុងរងចាំ ការអនុញ្ញាតិពីប្រទេសហ្វីលីពីននៅក្នុងការវាយប្រហាររំដោះ ចំណាប់ខ្មាំងឥណ្ឌូនេស៊ី១០នាក់ ត្រូវបានខ្មាន់កាំភ្លើងក្រុមឧទ្ទាម អាប៊ូសាយ័ហ្វ ចាប់ខ្លួនទារប្រាក់លោះ។
មន្ត្រីប៉ូលិស ឥណ្ឌូនេស៊ីលោក Badrondin Haiti បានបញ្ជាក់ថា យើងកំពុងរងចាំការសម្របសម្រួល រវាងរដ្ឋាភិបាលនិងក្រុម ឧទ្ទាម ហើយបើការសម្របសម្រួលនោះគ្មានប្រសិទ្ធិភាព នឹងមានសកម្មភាពរំដោះចំណាប់ខ្មាំង។
សូមបញ្ជាក់ផងដែរថា ក្រសួងការបរទេសឥណ្ឌូនេស៊ីបានប្រកាសកាលពីថ្ងៃទី២៩ខែមីនាថា ពលរដ្ឋឥណ្ឌូនេស៊ីត្រូវបានចាប់ខ្លួនធ្វើជាចំណាប់ខ្មាំងក្រោយពេលនាវាដឹកធ្យូងត្រូវបានក្រុមAbu Sayyaf ចាប់ខ្លួនស្ថិតនៅតំបន់សមុទ្រ ហ្វីលីពីន។
នាវាសណ្តោង Brahma 12 និងសាឡាង Anand 12 ធ្វើដំណើរពីតំបន់Sungai Putting នៅKalimantan កោះBorneo ប្រទេសឥណ្ឌូនេស៊ី ឆ្ពោះទៅកាន់Bantangas ភាគខាងត្បូងប្រទេសហ្វីលីពីន។
សារព័ត៌មានAP បានដកស្រង់ការប្រកាសរបស់ក្រសួងការបរទេសឥណ្ឌូនេស៊ីបានប្រកាសថា នាវាសណ្តោងនិងសាឡាង ត្រូវប្លន់ ទទួលបានការហៅទូរស័ទ្ទទាមទារប្រាក់លោះពីក្រុមឧទ្ទាមអាប៊ូសេយយ៉ាហ្វ។
គេមិនដឹងពិតប្រាកដពីពេលវេលាដែលត្រូវចោរប្លន់នោះឡើយ ប៉ុន្តែអ្នកដែលចាប់ជំរិតបានទំនាក់ទំនងជាមួយម្ចាសនាវាលើកទីមួយនៅថ្ងៃទី២៦ខែមីនា។ ក្រសួងការបរទេសឥណ្ឌូនេស៊ីបានប្រកាសថា អាទិភាពជាដំបូងនោះគឺសុវត្ថិភាពនាវឹកទាំង១០នាក់ ហើយពេលនេះក្រុមហ៊ុនគ្រប់គ្រងនាវាបានប្រកាសប្រាប់គ្រួសារនាវឹកដែលបានចាប់ខ្លួននោះ។
ប៉ូលិសហ្វីលីពីនបានឲ្យដឹងថា នាវាសណ្តោង Brahma 12 ត្រូវបានគេប្រទះឃើញនៅស្រុកLanguyan ខេត្តTawi ភាគខាងត្បូងហ្វីលីពីន។ ក្រសួងការបរទេសឥណ្ឌូនេស៊ីបានប្រកាសថា សាឡាងដឹកអ្នកធ្យូងប្រមាណ៧០០០តោនស្ថិតនៅក្នុងដៃក្រុមចាប់ជំរិតដដែល។
ក្រុមអាប៊ូសេយ៉ាហ្វ ត្រូវបានអាមេរិកនិងហ្វីលីពីនដាក់បញ្ចូលក្នុងក្រុមភេរវកម្ម ដោយសារតែក្រុមនេះ បានវាយប្រហារ ចាប់ជំរិតទាមទារប្រាក់លោះនៅតំបន់ភាគខាងត្បូងហ្វីលីពីន។ ប៉ុន្តែប៉ុន្មានឆ្នាំចុងក្រោយនេះក្រុម ខ្មាន់កាំភ្លើងខាងលើបានចុះខ្សោយដោយសារតែរងការវាយប្រហារពីទាហានហ្វីលីពីនក្រោមការគាំទ្រពីអាមេរិក។
ហេតុការចាប់ខ្លួនខាងលើ គឺជាសកម្មភាពចាប់ជំរិតធំបំផុតចាប់តាំងពីឆ្នាំ២០០១។ កន្លងមក ក្រុមសន្តិសុខហ្វីលីពីនក៏បានប្រកាសថា ក្រុមអាប៊ូសេយ៉ាហ្វក៏បានចាប់ជំរិតជនជាតិកាណាដា ២នាក់និងជនជាតិន័រវេម្នាក់ ស្ត្រីជនជាតិហ្វីលីពីនម្នាក់នៅលើកោះ សាម៉ាលភាគខាងត្បូងហ្វីលីពីនកាលពីចុងខែកញ្ញាឆ្នាំ២០១៥ ហើយបញ្ចូនទៅឃុំខ្លួននៅកណ្តាលព្រឺលើកោះជូឡូ ជាទីតាំគ្រប់គ្រងរបស់ក្រុមអាប៊ូសេយ៉ាហ្វ៕
ប្រែសម្រួល៖ ម៉ែវ សាធី
