ខេត្តសៀមរាប៖ សម្តេចតេជោ ហ៊ុន សែន បានមានប្រសាសន៍លើហ្វេសប៊ុកសម្តេចថាៈ នៅល្ងាចថ្ងៃទី១៤ ខែមេសា នេះ ខ្ញុំនិងភរិយាពិតជាសប្បាយរីករាយខ្លាំងណាស់ដែលបានមកចូលរួមក្នុងកម្មវិធីល្បែងប្រជាប្រិយទាញព្រ័ត និងរាំលេងកំសាន្តជាមួយប្រជាពលរដ្ឋ និងក្មួយៗយុវជន យុវនារី នៅមុខប្រាសាទអង្គរវត្តដ៏ល្បីល្បាញរបស់កម្ពុជាយើង។ ដោយសម្តេចថ្លែងបញ្ជាក់បន្តថាៈ ខ្ញុំសូមអរគុណបងប្អូនដែលបានមកចូលរួមអង្គរសង្រ្កាន្តនៅក្រុងសៀមរាប។
ហើយនៅរាត្រីយប់នេះ ខ្ញុំនិងភរិយាក៏បានអុជធូបទៀនបួងសួងទេវតាឆ្នាំថ្មីព្រះនាង មណ្ឌាទេវី សុំសេចក្តីសុខ និងបានបណ្តែតកន្ទោង (គោមទឹក) ដើម្បីជម្រុះនូវឧបទ្រុពចង្រៃទាំងឡាយចោល និងនាំមកនូវសេចក្តីសុខព្រមទាំងលាភសំណាងដល់ជនរួមជាតិទូទាំងប្រទេសនៅក្នុងឱកាសបុណ្យចូលឆ្នាំថ្មីប្រពៃណីជាតិយើង។
សម្តេចបានផ្តាំផ្ញើនាឱកាសនោះថាៈ សូមបងប្អូនជនរួមជាតិទូទាំងប្រទេសបានសប្បាយរីករាយទាំងអស់គ្នា នៅក្នុងថ្ងៃចូលឆ្នាំថ្មីចាប់ពីថ្ងៃទី ១៣-១៦ មេសា ២០១៦ នេះ។ សូមកងកម្លាំងសមត្ថកិច្ចគ្រប់ជាន់ថ្នាក់ពង្រឹងសុវត្ថិភាព និងសណ្តាប់ធ្នាប់សាធារណៈជូនប្រជាពលរដ្ឋ និងភ្ញៀវទេសចរណ៍អោយបានសប្បាយរីករាយនៅក្នុងឱកាសបុណ្យចូលឆ្នាំថ្មីនេះទាំងអ់សគ្នា៕
ដោយ៖ សុខ ខេមរា
