ភ្នំពេញ ៖ កាលពីវេលាម៉ោង៥ និង៤០នាទីព្រឹក ថ្ងៃទី២០ ខែមេសា ឆ្នាំ២០១៦ នៅតាមផ្លូវអូដឹមកប់ស្រូវ ជិតវត្តត្រពាំងឈូក ស្ថិតក្នុងភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ក្រុមចោរប្លន់ប្រដាប់អាវុធ១ក្រុមជិះម៉ូតូ៣គ្រឿងមានគ្នា៦នាក់បានដេញតាមកៀរ និង ភ្ជង់ស្ត្រីម្នាក់ប្លន់យកម៉ូតូ១គ្រឿង និងខ្សែ.ក១ខ្សែទៅបាត់ ដោយមិនរំខានសមត្ថកិច្ចមូលដ្ឋានឡើយ ។
ស្ត្រីរងគ្រោះឈ្មោះ ហង្ស ធីតា អាយុ៣៣ឆ្នាំ មុខរបរជាកម្មការិនីរោងចក្រកាត់ដេរ ក្លូប៊ល ដែលមានទីតាំងស្ថិតនៅក្នុងភូមិត្រពាំងទួល សង្កាត់កំបូល និងស្នាក់នៅក្នុងភូមិត្រពាំងធ្នង់ ហៅភូមិព្នៅ សង្កាត់សំរោងក្រោម។ស្រី្តរងគ្រោះ ត្រូវក្រុមចោរ ប្លន់យកម៉ូតូ១គ្រឿង ម៉ាកហុងដា សេ១២៥ ស៊េរីឆ្នាំ២០១៣ ពណ៌ខ្មៅ ពាក់ស្លាកលេខ ភ្នំពេញ 1BR-6568 និងខ្សែកមាស១ខ្សែទម្ងន់៣ជី ។ ចំណែកជនសង្ស័យមានគ្នា៦នាក់ ស្លៀកពាក់ស៊ីវិល ជិះម៉ូតូ៣គ្រឿង ក្នុងនោះមានម៉ូតូធំ១គ្រឿង និងហុងដា ឌ្រីម សេ១២៥ ពីរគ្រឿង ។
ស្រី្តរងគ្រោះបានរៀបរាប់ឲ្យដឹងថា មុនពេលកើតហេតុខាងលើនាងបានជិះម៉ូតូ១គ្រឿងម្នាក់ឯងចេញពី ឆ្ពោះទៅធ្វើការនៅរោងចក្រកាត់ដេរខាងលើ ដូចថ្ងៃធម្មតា ដែលតែងតែជិះម្នាក់ឯងបែបនេះ ។ លុះពេលធ្វើដំណើរទៅដល់ត្រង់ចំណុចកើតហេតុស្រាប់តែមានជនសង្ស័យ១ក្រុមមានគ្នា៦ នាក់ ជិះម៉ូតូ៣គ្រឿងតាមពីក្រោយ ។ ខណៈនោះនាងមិនបានចាប់អារម្មណ៍ថាជនទាំងនោះគឺជាក្រុមចោរប្លន់ឡើយ ដោយនឹកស្មានថា ជាអ្នកដំណើរធម្មតា លុះពេលពួកគេជិះមកដល់ទន្ទឹមនាង ជនទាំងសង្ស័យទាំងនោះបានកៀរឲ្យនាងអែបខាង និងឈប់ រួចជនម្នាក់បានដកកាំភ្លើងខ្លីមិនស្គាល់ម៉ាក ពណ៌ស ១ដើម ភ្ជង់គំរាមបាញ់សម្លាប់។
ស្រ្តីរងគ្រោះបានឲ្យដឹងទៀតថា ពេលនោះនាងភិតភ័យយ៉ាងខ្លាំងបម្រុងរត់គេច តែត្រូវជណកាន់កាំភ្លើងខ្លីនោះស្ទុះទៅ កន្ត្រាក់យកខ្សែ.កមាសពី.ករបស់នាង១ខ្សែទម្ងន់៣ជី និងបង្ខំឲ្យនាងចេញឲ្យឆ្ងាយពីម៉ូតូ រួចពួកគេបានយកម៉ូតូរបស់នាងជិះចេញគេចខ្លួនទៅបាត់ដោយសុវត្ថិភាពដោយគ្មានអ្នកណាជួយឡើយ។
បន្ទាប់ពីកើតហេតុ រូបនាងបានត្រឹមទៅដាក់ពាក្យបណ្តឹងនៅប៉ុស្ត៍នគរបាលរដ្ឋបាលសំរោងក្រោមប៉ុណ្ណោះ ត្រង់ថាសមត្ថកិច្ចស្រាវជ្រាវរកមុខជនសង្ស័យឃើញឬមិនឃើញដូចជាមិនសង្ឃឹមឡើយ ៕
ប្រាថ្នា
