សារព័ត៌មាន New York Times បានផ្សាយថានៅក្នុងពិធីទទួលពានរង្វាន់សារព័ត៌មានPulitzer ធ្វើឡើងនៅសាកលវិទ្យាល័យកូឡុំប៊ី នៅទីក្រុងញូវយ៉ក ដោយក្នុងនោះបណ្តាញព័ត៌មានAP ទទួលបានពានរង្វាន់សំខាន់បំផុតដែលមានចំណងជើងថា «បម្រើសហគមន៍» ដោយមានអត្ថបទជាច្រើនបានសរសេរពីការកេងប្រវ័ញ្ចពលកម្ម និងទាសករនៅក្នុងនាវានេសាទក្នុងប្រទេសតំបន់អាស៊ីភាគអាគ្នេយ។
អាស្រ័យដោយអត្ថបទរបស់បណ្តាញព័ត៌មានAP បានផ្សាព្វផ្សាយថា ពលរដ្ឋថៃ ឡាវ កម្ពុជា និងមីយ៉ាន់ម៉ាត្រូវបានរំដោះចេញពីទាសករនៅលើនាវានេសាទក្នុងប្រទេសមួយនៅអាស៊ាន។ ការផ្សព្វផ្សាយរបស់AP បានធ្វើឲ្យក្រុមហ៊ុនអាមេរិកឈប់ទិញ គ្រឿងសមុទ្រពីប្រទេសមួយចំនួននៅក្នុងតំបន់អាស៊ានដោយសារតែប្រទេសនោះបានប្រើប្រាស់ទាសករពលកម្មនៅលើនាវានេសាទ។
ក្រោយការផ្សព្វផ្សាយរបស់បណ្តាញព័ត៌មានAP ក្នុងរយៈពេលមួយឆ្នាំកន្លងមក កម្មករជាង ២,០០០នាក់ជាជនជាតិថៃ ឡាវ កម្ពុជា និងមីយ៉ានម៉ា ត្រូវបានរំដោះចេញពីទាសករនេសាទនៅលើនាវាកប៉ាល់ ទូកនេសាទធំៗនៅក្នុងប្រទេសតំបន់អាស៊ីភាគអាគ្នេយ៍ ។
សារព័ត៌មាន AP បានផ្សាយថា ក្រុមជួញដូរមនុស្សបានប្រើប្រាស់ការជ្រើសរើសពលករមកពីប្រទេសនៅក្នុងតំបន់អាស៊ីភាគអាគ្នេយ៍ដើម្បីទៅធ្វើការ នៅក្នុងការដ្ឋានក្នុងក្រុងបាងកកប៉ុន្តែក្រោយមកក៏បញ្ជូនពួកគេឲ្យទៅធ្វើការជាទាសករនៅលើទូកនេសាទបំពាក់ទង់ជាតិថៃទៅវិញ។ ខ្សែបណ្តាញខាងលើត្រូវបានគេប្រទះឃើញនិងទប់ស្កាត់តាមលទ្ធផលស្រាវជ្រាវរបស់អ្នកសារព័ត៌មាន។
កាលពីឆ្នាំ២០១៤ ក្រុមអ្នកសារព័ត៌មានដោយមានការជួយជ្រោមជ្រែងពីក្រុមអ្នកអនុវត្តច្បាប់ឥណ្ឌូនេស៊ីបានប្រកាសព័ត៌មានស្តីពីការប្រើប្រាសស់ពលកម្មទាសករនៅលើនាវានេសាទនៅជាប់ដែនសមុទ្រប្រទេសឥណ្ឌូនេស៊ី។នៅលើកប៉ាល់នេសាទបំពាក់ទង់ជាតិថៃដែលទាហានជើងទឹកឥណ្ឌូនេស៊ីឃាត់ទុកដោយសារតែនេសាទខុសច្បាប់ ក៏បានប្រទះឃើញក្រុមពលករនៅលើកប៉ាល់ត្រូវឃុំទុកនៅក្នុងបន្ទប់មួយ ។ នៅពេលទៅនេសាទនៅឆ្ងាយម្ចាស់កប៉ាល់បានដោះលែងពលករទាសករទាំងនោះឲ្យធ្វើការ។ទាសករទាំងនោះបានត្រឹមតែអាហារប៉ុណ្ណោះ មិនមានប្រាក់ខែនោះឡើយ។មិនត្រឹមតែប៉ុណ្ណោះ ទាសករទាំងនោះមិនអនុញ្ញាតឲ្យឡើងលើដីគោកឡើយត្រូវនៅលើកប៉ាល់ទៅនេសាទជារៀងរហូតមិនអាចទាក់ទងបានជាមួយក្រុមគ្រួសារ ឬប្រពន្ធកូនឡើយ ។
ក្រោយហេតុការណ៍ខាងលើបានបែកធ្លាយ រដ្ឋាភិបាលឥណ្ឌូនេស៊ីនិងថៃបានរួមគ្នាស្រាវជ្រាវពីករណីចាប់បង្ខាំងមនុស្សទុកធ្វើជាទាសករសម្រាប់នេសាទ ។សកម្មភាពខាងលើក្រោយពេលរងសម្ពាធពីអាមេរិកឲ្យបើកការស្រាវជ្រាវដោយអាមេរិកបានឈប់ទិញគ្រឿងសមុទ្រជាច្រើនពីប្រទេសថៃក្រោយទទួលបានព័ត៌មានថា ប្រើទាសករនៅលើកប៉ាល់នេសាទ ។
នៅក្នុងឆ្នាំនេះ កម្លាំងទាហានជើងទឹកថៃនិងឥណ្ឌូនេស៊ីបានរំដោះទាសករជាច្រើនរយនាក់ចេញពីកប៉ាល់នេសាទក្រោយពេលបានចូលមកដីគោកដើម្បីប្រគល់ទំនិញគ្រឿងសមុទ្រ ។ក្នុងពេលចូលដីគោកទាសករទាំងនោះត្រូវឃុំនៅក្នុងបន្ទប់សម្ងាត់មួយចៀសវាងមានអ្នកឃើញឬលួចរត់ឡើងដីគោក ។
មិនត្រឹមតែប៉ុណ្ណោះទាសករទាំងនោះត្រូវបង្ខំឲ្យធ្វើការហួសកម្លាំងហើយឲ្យប្រើប្រាស់គ្រឿងញៀន ដើម្បីឲ្យធ្វើការបានទាំងយប់ទាំងថ្ងៃ ៕
ប្រែសម្រួល៖ ម៉ែវ សាធី
