សូមអញ្ជើញ! សូមអញ្ជើញ សម្រាប់អ្នកប្រព្រឹត្តបទល្មើចរាចរណ៍ទាំងអស់ បើចង់អស់ លុយពិន័យតិច សូមធ្វើដំណើរឆ្លងកាត់ខណ្ឌ៧មករា រាជធានីភ្នំពេញនៃយើង ព្រោះបើយើង បើកបរល្មើសច្បាប់ចរាចរណ៍ ប៉ូលិសចរាចរនៅទីនោះនឹងពិន័យប្រាក់Discount (បញ្ចុះតម្លៃ)អស់លុយតិច ទុកលុយ Discount នោះគ្រាន់ទិញត្រកួនស្ងោរឲ្យកូនហូបបានមួយពេលដែរ ។
នេះពិតជាចម្លែកនិងមិនធ្លាប់ឮទាល់តែសោះ កាលដែលប៉ូលិសប្រើស្ទីលរកលុយតាមរយៈផាកពិន័យអ្នកល្មើសច្បាប់ចរាចរណ៍មានឌីសខោនដូចទំនិញ។
នាយជាលគិតថានៅប៉ុន្មានថ្ងៃមកនេះព័ត៌មានមិនសូវល្អមួយកើតមានសម្រាប់ប៉ូលិសចរាចរ ឈរជើងនៅខណ្ឌ៧មករា ដែលកំពុងប្រើស្ទីលចម្លែកក្នុងការផាកពិន័យអ្នកល្មើសច្បាប់ចរាចរណ៍ ដោយមិនបាច់ចេញវិក្កយប័ត្រ ជាថ្នូរយកលុយតិចជាងច្បាប់កំណត់ ហើយប្រាប់ថា គាត់អាណិត គាត់ Discount ឲ្យប៉ុណ្ណោះ។បានន័យថា បើច្បាប់កំណត់ពិន័យ ៥ម៉ឺន រៀល គាត់យកតែ ២ ម៉ឺនរៀលទេ ឯ៣ម៉ឺនរៀលទៀតចាត់ទុកជាលុយ Discount ទៅចុះ តែកុំភ្លេចថា វិធី Discount នេះលុះត្រាតែអ្នកមានកំហុសនោះមិនទាមទារយកវិក្កយប័ត្រផាកពិន័យ បើពុំដូច្នោះទេលោកប៉ូលិសនឹងគំរាមឲ្យបង់មួយជាពីរនៃប្រាក់ផាកពិន័យ ឬ សួរនាំរកឯកសាររថយន្ត និង អូសរថយន្តទៅកានការិយាល័យគាត់មិនខាន ។វីធីសាស្ត្រក្នុងការពិន័យនេះ តាមនាយជាលដឹងគឺមិនមែនមានតែមួយនឹងទេ នៅមាន ច្រើនទៀត ដើម្បីរកលុយចូលក្នុងហោប៉ៅស្របច្បាប់យ៉ាងស្រួល ទោះបីដឹងថាច្បាប់ចរាចរណ៍ផ្លូវគោក កំពុងរឹតបន្តឹងក៏ដោយ ។
និយាយបែបនេះ តិចលោហ៍ថានាយជាលហែកកេរលោកប៉ូលិសចរាចរទៅ ? កុំខឹងអី នាយជាលនិយាយនេះគឺចង់ឲ្យអ្នកល្មើសច្បាប់ចរាចរណ៍ដឹង កុំឲ្យពួកគាត់ខាតប្រាក់ Discount ក្នុងការពិន័យទេណា!
នាយជាល
