ភ្នំពេញ ៖ ប្ដីប្រពន្ធ១គូបានដឹកដៃគ្នា ទៅកាន់សាលាសង្កាត់ចោមចៅសុំឲ្យអាជ្ញាធរសង្កាត់រកខុសរកត្រូវឲ្យបន្ទាប់ពីស្ត្រីជាប្រពន្ធបានចោទប្រកាន់ប្ដីថាមានសហាយលួចលាក់ស្នេហាជាមួយស្រីផ្សេង នៅក្រៅផ្ទះដោយមិនបានគិតថារៀបការ ក្លាយជាប្តីប្រពន្ធច្រើនឆ្នាំ រហូតមានទាំង កូនប្រុសស្រីចំនួន៤នាក់ទៅហើយនោះ។ ជាងនេះទៀតប្តីមិនចេះខ្មាសអ្នកជិតខាងឡើយខណៈប្រពន្ធតាមទាន់ដឹកស្រីថ្មីចូលផ្ទះសំណាក់ ។
ស្រ្តីជាប្រពន្ធនិយាយទាំងទឹកភ្នែកថា គាត់ខឹងយ៉ាងខ្លាំងអត់ទ្រាំលែងបានទើបនាំលោកប្ដីទៅកាន់សាលាសង្កាត់ចោមចៅដើម្បីសុំអន្តរាគមន៍ពីអាជ្ញាធរ។ ចំណែកបុរសជាប្តីបានបដិសេធថា គាត់ មិនបានប្រព្រឹត្តដូចជាការចោទប្រកាន់ពី សំណាក់ប្រពន្ធនោះឡើយ ។
ប្រភពព័ត៌មាននៅសាលាសង្កាត់ចោមចៅបានឲ្យដឹងថា ដោយសារការប្រកែកគ្នា រកខុសនិងត្រូវ បែបនេះហើយទើបក្លាយជា អំពើហិង្សាកើតឡើង ហើយប្រពន្ធបានទាម ទារយកសោម៉ូតូពីប្ដី ហើយប្ដីបានប្រាប់ថាគាត់ឲ្យហើយនៅទារអីទៀត ប្រពន្ធខឹង បានដណ្ដើមយកទូរស័ព្ទពីប្តីមកបោកជាច្រើនដងទៀត រហូតបែកខ្ទេចខ្ទីប្រើការលែង កើតទើបឈប់បោក ។ ឈានដល់ការប្រវាយ ប្រតប់គ្នាវិញម្ដងបង្កឲ្យមានការភ្ញាក់ផ្អើលពេញសាលាសង្កាត់ចោមចៅ រហូតមាន ការអន្តរាគមន៍ពីអាជ្ញាធរទើបស្ងប់ស្ងាត់ទៅវិញ។
ហេតុការណ៍នេះបានកើតឡើងកាលវេលាម៉ោង៤និង២០នាទីរសៀលថ្ងៃទី៣ ខែឧសភា ឆ្នាំ២០១៦ នៅក្នុងសាលា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
ស្ត្រីជាប្រពន្ធឈ្មោះ ញ៉ែ ហៀង អាយុ៤៨ឆ្នាំ មុខរបរលក់បន្លែ ចំណែក បុរសជាប្ដីឈ្មោះ ប៊ី ណាត អាយុ៤១ឆ្នាំ អ្នកទាំងពីរមានកូនប្រុសស្រីចំនួន៤នាក់និង មានទីលំនៅក្នុងភូមិជម្ពូវ័ន សង្កាត់ចោម ចៅ ខណ្ឌពោធិ៍សែនជ័យ។
តាមប្រភពព័ត៌មានពីមន្ត្រីសាលា សង្កាត់ចោមចៅបានឲ្យដឹងថា នៅមុនពេលកើតហេតុប្ដីប្រពន្ធ១គូនេះបាននាំគ្នា ទៅសុំឲ្យអាជ្ញាធរសង្កាត់ជួយអន្តរាគមន៍រកខុសរកត្រូវអំពីរឿងរ៉ាវដែលបានកើតឡើងនៅក្នុងក្រុមគ្រួសាររបស់ពួកគាត់ ។ ខណៈនោះនាងជាប្រពន្ធបានប្រាប់ថា ប្ដីគាត់មានចិត្តមិនស្មោះត្រង់ក្បត់ចិត្តគាត់ មានសហាយលួចលាក់ស្នេហាយ៉ាងផ្អែមល្ហែមជាមួយស្រីក្មេងក្រៅផ្ទះមិនបានគិតគូរដល់គាត់និងកូនប្រុសស្រីចំនួន៤នាក់ ឡើយពួកគេបានដើរលេងអត់ធ្វើការរកស៊ីអ្វីទាំងអស់ ។
មិនតែប៉ុណ្ណោះនៅវេលាព្រឹកថ្ងៃទី៣ ខែឧសភា នាងបានតាមទាន់ប្ដីកំពុងស្ថិតនៅជាមួយស្រីនៅក្នុងបន្ទប់ផ្ទះសំណាក់មួយកន្លែង ហើយនាងចាប់បានថែមទៀតផង ទើបមានការក្ដៅក្រហាយសុំឲ្យអាជ្ញាធរ ជួយអន្តរាគមន៍ ។
ប្រភពដដែលបានបន្តថា ចំណែកឯ បុរសជាប្តី បានប្រកែកថាគាត់មិនបានធ្វើអ្វីដូចដែលប្រពន្ធចោទឡើយ។ បន្ទាប់មកលោកចៅសង្កាត់ បានបញ្ជាឲ្យមានការសម្របសម្រួលជូនពួកគាត់កុំឲ្យមាន ទំនាស់គ្នាកើតឡើង។ ក្រោយមកអ្នកទាំង២ក៏បាននាំគ្នាចេញពីសាលាសង្កាត់ហើយស្ត្រីជាប្រពន្ធបានទាមទារយកកូនសោ ម៉ូតូពីប្តី ចំណែកប្តីមិនបានហុចឲ្យផ្ទាល់ដៃនោះទេបានយកកូនសោនោះទៅចាក់ជាប់ នឹងម៉ូតូ ៕
ដោយ៖ សីលា
