ខេត្តបាត់ដំបង៖ មុខសញ្ញាដែលតែងធ្វើសកម្មភាពក្នុងស្រុកសង្កែ ធ្វើឲ្យអ្នកភូមិស្ទើរដេកមិនលក់ខ្វល់ខ្វាយមិនសប្បាយចិត្តព្រោះតែទ្រព្យសម្បត្តិខ្លួននោះ ពេលនេះសមត្ថកិច្ចក្របួចបាន ០២នាក់ដើម្បីផ្តន្ទាទោសតាមច្បាប់ហើយនៅរសៀលថ្ងៃទី១៦ខែកក្កដា។
មន្ត្រីនគរបាលនៃស្នងការដ្ឋាននគរបាលខេត្តបានឲ្យដឹងថា កិច្ចប្រតិបត្តិការខាងលើបានធ្វើឡើងកាលពីថ្ងៃទី ១៥ ខែ កក្កដា ឆ្នាំ២០២២ ដោយមានការ សម្របសម្រួលនីតិវិធីពី លោក កែវ សុជាតិ ព្រះរាជអាជ្ញានៃអយ្យការអមសាលាដំបូងខេត្តបាត់ដំបង ទើបសមត្ថកិច្ចនគរ បាល ការិយាល័យព្រហ្មទណ្ឌកម្រិតធ្ងន់ដែលមានលោកវរសេនីយ៍ឯក កោ ស៊ុនកាំង ជានាយការិយាល័យ បានដឹកនាំកម្លាំងចុះឃា ត់ខ្លួនជនសង័្សយចំនួន០២ នាក់នៅចំណុចភូមិកាប់គោថ្មី សង្កាត់អូរចារ ក្រុងបាត់ដំបង ខេត្តបាត់ដំបង ក្នុងករណី”លួចម៉ូតូតាមលំនៅដ្ឋាន” ។
ប្រភពខាងលើបន្តថា ជនសង័្សយទាំងពីរនាក់ដែលបានឃាត់ខ្លួនរួមមាន ១.ឈ្មោះ សំ ម៉ារីភេទប្រុស អាយុ ២៧ឆ្នាំ រស់នៅ ភូមិបាសែត ឃុំតាប៉ុន ស្រុកសង្កែ ខេត្តបាត់ដំបងនិង ២.ឈ្មោះ ពៅ រ៉ហ៊ីម ភេទប្រុស អាយុ៣៧ឆ្នាំរស់នៅភូមិបាសែត ឃុំតាប៉ុន ស្រុកសង្កែ ខេត្តបាត់ដំបង។
ក្នុងប្រតិបត្តិការនេះ សមត្ថកិច្ចដកហូតបានម៉ូតូម៉ាកហុងដាសេ ១២៥ ព៌ណខ្មៅសេរីឆ្នាំ ២០១៦ពាក់ស្លាកលេខ បាត់ដំបង 1X.1382 ចំនួន០១គ្រឿង ដែលជារបស់ជនរងគ្រោះ។ ម៉ូតូ០១គ្រឿងខាងលើនេះ បានបាត់ កាលពីថ្ងៃទី១១ ខែ កក្កដា ឆ្នាំ ២០២២ នៅវេលាទៀបភ្លឺឈានចូល ថ្ងៃទី ១២ ខែកក្កដាឆ្នាំ២០២២ ក្នុងលំនៅដ្ឋានរបស់ជនរងគ្រោះឈ្មោះ ម៉ោល តង ភេទស្រី អាយុ៥១ឆ្នាំរស់នៅភូមិបាសែត ឃុំតាប៉ុន ស្រុកសង្កែ ខេត្តបាត់ដំបង ជនសង័្សយបានធ្វើសកម្មភាពលួចហើយជិះគេចខ្លួនបាត់ស្រមោល។
សមត្ថកិច្ចបញ្ជាក់ថា ក្រោយសមត្ថកិច្ចទទួលបន្តឹងពីជនរងគ្រោះ ផ្នែកជំនានបានធ្វើការស្រាវជ្រាវ រហូតដល់ថ្ងៃ ខែខាងលើ សមត្ថកិច្ចនគរបាលបានឃាត់ខ្លួនជនសង័្សយ និងដកហូតម៉ូតូជាភស្តុតាង នៃបទល្មើសយកមកប្រគល់ឲ្យជនរងគ្រោះវិញ ហើយជនសង័្សយទាំងពីរនាក់សមត្ថកិច្ចកំពុងរៀបចំបញ្ជូនទៅសាលាដំបូងខេត្ត ចាត់ការតាមផ្លូវច្បាប់៕
ដោយ៖ សូរិយា
