កាលពីថ្ងៃទី២៤ ខែកក្កដា ឆ្នាំ២០១៥ ប៉ូលិសក្នុងប្រទេសនេប៉ាល់បានចាប់ខ្លួនក្រុមបាតុករជិត២៥០នាក់បន្ទាប់ពីការធ្វើបាតុកម្មក្លាយជាអំពើហិង្សា បង្កឲ្យអគ្គិភ័យឆាបឆេះរថយន្ត ការបិទសាលារៀន ហាងលក់ទំនិញ ក៏ដូចបង្កឲ្យមានការបិទទ្វារអគារពាណិជ្ជកម្មដទៃផ្សេងៗទៀត ដែលជាការប្រឆាំងទៅលើគម្រោងរដ្ឋាភិបាលអនុម័តរដ្ឋធម្មនុញ្ញថ្មី ។
ប៉ូលិសបានអះអាងថា បានចាប់ខ្លួនក្រុមសកម្មជន២៤៧នាក់ ដោយសារតែពាក់ព័ន្ធអំពើហិង្សាអំឡុងពេលធ្វើបាតុកម្ម។ កម្លាំងសន្តិសុខបានប្រដាប់ដោយអាវុធធុនធ្ងន់ដាក់ពង្រាយគ្រប់កន្លែងដែលក្រុមបាតុករធ្វើបាតុកម្មលើកដំបូងបំផុតចាប់តាំងពីប្រទេសនេះទទួលរងការវាយប្រហារពីគ្រោះរញ្ជួយដីកាលពីខែមេសា កន្លងមកនោះ ។
អ្នកនាំពាក្យស្នងការប៉ូលិស លោក Kamal Singh Bam បានថ្លែងប្រាប់ប្រភព AFP ថា រថយន្ត៧គ្រឿង បានរងការឆាបឆេះ និង១៩គ្រឿងផ្សេងទៀតរងការវាយបំផ្លាញ ។ លោកបន្តថារហូតមកដល់ពេលនេះគេនៅមិនទាន់ដឹងថា តើមានជនរងគ្រោះរហូតដល់បាត់បង់ជីវិតប៉ុន្មាននាក់នៅឡើយទេ ។
ក្រុមម៉ៅនិយមក្នុងប្រទេសនេប៉ាល់បានប្រឆាំងជំទាស់ទៅលើភាគីប្រឆាំងស្តីអំពីការព្រាងរដ្ឋធម្មនុញ្ញថ្មីកាលពីខែមុននេះ បន្ទាប់ពីមានការខ្វែងគំនិតគ្នាទៅលើចំណុចមួយចំនួនអូសបន្លាយពេលច្រើនឆ្នាំមកហើយ និងបានអាកខានការតវ៉ាជជែកពិភាក្សាគ្នាដោយសារតែគ្រោះរញ្ជួយដីសម្លាប់មនុស្សជាង៨.៨០០នាក់ ស្ថិតនៅតំបន់ហេម៉ាឡៃនោះ ។
មនការលើកឡើងថា សេចក្តីព្រាងរដ្ឋធម្មនុញ្ញថ្វីនោះបានក្បត់ទៅនឹងគោលការណ៍របស់ក្រុមម៉ៅនិយម ដែលខិតខំប្រយុទ្ធប្រឆាំងរហូតទទួលបានជ័យជម្នះ និងបញ្ចប់សង្គ្រាមស៊ីវិលកាលពីឆ្នាំ២០០៦ ព្រមទាំងបញ្ចប់របបរាជានិយមសក្តិភូមិរាប់សតវត្សរ៍នៅក្នុងប្រទេសនេះ ។
លោក Khadga Bahadur Bishwokarma អ្នកនាំពាក្យរបស់ក្រុម៉ៅនិយមបានថ្លែងប្រាប់ AFP ថា សេចក្តីព្រាងរដ្ឋធម្មនុញ្ញថ្មីនេះបានប្រឆាំង និងផ្ទុយពីឆន្ទៈ ស្មារតី និងក្តីសង្ឃឹមរបស់ប្រជាពលរដ្ឋដែលខិតខំធ្វើសង្គ្រាមតស៊ូប្រឆាំង។ រដ្ឋធម្មនុញ្ញថ្មីនេះមិនឆ្លុះបញ្ចាំងពីបញ្ហារបស់ក្រុមកុលសម្ពន្ធ មិនឆ្លុះបញ្ចាំងពីការប្រយុទ្ធប្រឆាំងទៅលើការបំភិតបំភ័យ ការប្រកាន់បក្ខភាព ពណ៌សម្បុរ និងភេទដូចដែលយើងកំពុងខិតខំតស៊ូពុះពារនេះឡើយ ។
មនុស្សរាប់សិបនាក់បានរងរបួសនៅសប្តាហ៍កន្លងមកនេះ ដោយសារតែការប៉ះទង្គិចគ្នារវាងប៉ូលិស នឹងក្រុមបាតុករដែលធ្វើបាតុកម្មប្រឆាំង ក៏ព្រោះតែខឹងសម្បារចំពោះសេចក្តីព្រាងរដ្ឋធម្មនុញ្ញថ្មីនេះ ក្រោយការប្រកាសជាសាធារណៈដំណើរការពិគ្រោះយោបល់លើធម្មនុញ្ញចាប់ផ្តើមកាលពីថ្ងៃទី២០ ខែកក្កដា ឆ្នាំ២០១៥នោះ ។
ចំណុចដែលមានការខ្វែងគំនិតគ្នានោះនៅត្រង់ការកំណត់ខ័ណ្ឌសីមា បង្កើតខេត្តមួយថ្មីទៀតដែលផ្តល់ផលប្រយោជន៍ជាប្រវត្តិសាស្ត្រដល់សហគមន៍ជាច្រើន។ ប៉ុន្តែភាគីមួយផ្សេងទៀតបានជំទាស់ដោយលើកឡើងថា វិធីសាស្ត្រនេះធ្វើឲ្យបែកបាក់ការឯកភាពជាតិ ៕
