ខេត្តបន្ទាយមានជ័យ៖ លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយម ខេត្តបន្ទាយមានជ័យ បានប្រាប់ឲ្យដឹងថា អនុវត្តតមបទបញ្ជារបស់លោករដ្ឋមន្ត្រីក្រសួងធនធានទឹក និងឧតុនិយម លឹម គានហោ ដែលថា ទីណាមានប្រភពទឹក ត្រូវតែអន្តរាគមន៍សង្គ្រោះស្រូវប្រជាកសិករឲ្យខាងតែបាននោះ បច្ចុប្បន្ននេះ មន្ទីរបាននិងកំពុងធ្វើសកម្មភាពទាំងថ្ងៃទាំងយប់ បូមទឹកសង្គ្រោះស្រូវកសិករ ។
លោក ប៊ុនរ៉ុម បន្តថា យើងបានប្រើគ្រប់មធ្យោបាយទាំងម៉ាស៊ីនបូមទឹកចល័ត ទាំងស្ថានីយ និយាយជារួម នៅគ្រប់ទីកន្លែងដែលមានប្រភពទឹក គឺត្រូវតែមានសកម្មភាពអន្តរាគមន៍ ។ មកដល់ពេលនេះ មន្ទីរបានប្រើប្រាស់ម៉ាស៊ីនបូមទឹកជិត 20 គ្រឿង និងស្ថានីយបូមទឹកចំនួន2 ស្ថានីយ ដើម្បីបូមទឹកពីស្ទឹងមង្គលបូរី ទៅសង្គ្រោះស្រូវបងប្អូនប្រជាកសិករ ។
លោកបន្តថា នៅស្រុកមង្គលបូរី មានសកម្មភាព4 កន្លែងនៅឃុំសឿរ 1កន្លែង ដោយប្រើម៉ាស៊ីនកម្លាំង 65 សេះ 5 គ្រឿង បូមទឹកសង្គ្រោះស្រូវ 2.700 ហិកតា ។ នៅឃុំចំណោម ប្រើម៉ាស៊ីនកម្លាំង 65 សេះ 01 គ្រឿង បូមទឹកសង្គ្រោះស្រូវ1.200 ហិកតា នៅឃុំរហាត់ទឹក ដោយប្រើម៉ាស៊ីនកម្លាំង 65 សេះ 01 គ្រឿង , ស្ថានីយបណ្តែត 1 និងស្ថានីយ អចល័ត 01 បូមទឹកសង្គ្រោះស្រូវ 2.400 ហិកតា នៅឃុំសំបួរ ប្រើម៉ាស៊ីនកម្លាំង 65 សេះ 04 គ្រឿង បូមទឹកសង្គ្រោះស្រូវ 2.400 ហិកតា និងនៅសង្កាត់កោះពងសត្វ ក្រុងសិរីសោភ័ណ ប្រើម៉ាស៊ីនកម្លាំង 65 សេះ 2 គ្រឿង បូមទឹកសង្គ្រោះស្រូវ 770 ហិកតា ។
ឥឡូវមន្ទីរកំពុងរៀបចំគ្រឿងចក្រកាយប្រឡាយ ដើម្បីនាំទឹកពីប្រឡាយមេត្រពាំងថ្ម ទៅសង្គ្រោះស្រូវប្រជាពលរដ្ឋ នៅឃុំរហាល ស្រុកព្រះនេត្រព្រះ និង ឃុំស្រះជីក ស្រុកភ្នំស្រុក ប្រមាណ 1.700 ហិកតាទៀត ៕ សុខ ខេមរ៉ា
